ਭਾਰਤ ''ਚ ਵਧਿਆ ''ਮਾਊਂਜਾਰੋ ਬ੍ਰਾਈਡਜ਼'' ਦਾ ਰੁਝਾਨ: ਵਿਆਹ ਤੋਂ ਪਹਿਲਾਂ ਭਾਰ ਘਟਾਉਣ ਲਈ ਲੜਕੀਆਂ ਲੈ ਰਹੀਆਂ ਨੇ ਮਹਿੰਗੇ ਇੰਜੈਕਸ਼ਨ

ਨਵੀਂ ਦਿੱਲੀ - ਭਾਰਤ 'ਚ ਵਿਆਹਾਂ ਦੇ ਸੀਜ਼ਨ ਦੌਰਾਨ ਇਕ ਨਵਾਂ ਅਤੇ ਚਿੰਤਾਜਨਕ ਰੁਝਾਨ ਸਾਹਮਣੇ ਆ ਰਿਹਾ ਹੈ, ਜਿੱਥੇ ਹੋਣ ਵਾਲੀਆਂ ਲਾੜੀਆਂ ਵਿਆਹ ਦੇ ਦਿਨ ਸੁੰਦਰ ਅਤੇ ਪਤਲੇ ਦਿਖਣ ਲਈ 'ਵੇਟ-ਲੌਸ ਇੰਜੈਕਸ਼ਨਾਂ' ਦਾ ਸਹਾਰਾ ਲੈ ਰਹੇ ਹਨ। ਇਸ ਰੁਝਾਨ ਨੂੰ 'ਮਾਊਂਜਾਰੋ ਬ੍ਰਾਈਡਜ਼' ਦਾ ਨਾਮ ਦਿੱਤਾ ਜਾ ਰਿਹਾ ਹੈ।

ਕਲੀਨਿਕਾਂ ਵੱਲੋਂ ਖ਼ਾਸ ਪੈਕੇਜਾਂ ਦੀ ਪੇਸ਼ਕਸ਼
ਦੇਸ਼ ਦੇ ਕਈ ਨਾਮੀ ਹੈਲਥ ਕਲੀਨਿਕ ਹੁਣ ਵਿਸ਼ੇਸ਼ 'ਪ੍ਰੀ-ਵੈਡਿੰਗ ਟ੍ਰਾਂਸਫਾਰਮੇਸ਼ਨ' ਪੈਕੇਜ ਪੇਸ਼ ਕਰ ਰਹੇ ਹਨ। ਇਸ ਦੌਰਾਨ ਨਵੀਂ ਦਿੱਲੀ ਦਾ ਇਕ ਕਲੀਨਿਕ 'ਮਾਊਂਜਾਰੋ ਬ੍ਰਾਈਡ' ਪੈਕੇਜ ਦੀ ਪੇਸ਼ਕਸ਼ ਕਰ ਰਿਹਾ ਹੈ, ਜਿਸ 'ਚ ਖ਼ੁਰਾਕ ਦੇ ਨਾਲ-ਨਾਲ ਭਾਰ ਘਟਾਉਣ ਵਾਲੇ ਇੰਜੈਕਸ਼ਨ ਸ਼ਾਮਲ ਕੀਤੇ ਗਏ ਹਨ। ਡਾਕਟਰਾਂ ਅਨੁਸਾਰ, ਅੱਜਕੱਲ੍ਹ ਮੋਟਾਪੇ ਦੇ ਇਲਾਜ ਲਈ ਆਉਣ ਵਾਲੀਆਂ 20% ਤੋਂ ਵੱਧ ਪੁੱਛਗਿੱਛਾਂ ਉਨ੍ਹਾਂ ਲੜਕੀਆਂ ਦੀਆਂ ਹੁੰਦੀਆਂ ਹਨ, ਜਿਨ੍ਹਾਂ ਦਾ ਜਲਦੀ ਵਿਆਹ ਹੋਣ ਵਾਲਾ ਹੁੰਦਾ ਹੈ।

ਸਮਾਜਿਕ ਦਬਾਅ ਅਤੇ ਬਾਡੀ ਸ਼ੇਮਿੰਗ ਮੁੱਖ ਕਾਰਨ 
ਇਸ ਰੁਝਾਨ ਪਿੱਛੇ ਮੁੱਖ ਕਾਰਨ ਸਮਾਜਿਕ ਦਬਾਅ ਅਤੇ ਵਿਆਹ ਵੇਲੇ 'ਪਰਫੈਕਟ' ਦਿਖਣ ਦੀ ਚਾਹਤ ਹੈ। ਮੁੰਬਈ ਦੀ ਇਕ 26 ਸਾਲਾ ਵਿੱਤ ਕਰਮਚਾਰੀ ਅਦਿਤੀ ਨੇ ਦੱਸਿਆ ਕਿ ਉਸ ਨੇ ਆਪਣੇ ਵਿਆਹ ਤੋਂ ਪਹਿਲਾਂ ਮਾਊਂਜਾਰੋ ਰਾਹੀਂ 10 ਕਿਲੋ ਭਾਰ ਘਟਾਇਆ ਕਿਉਂਕਿ ਉਹ ਆਤਮ-ਵਿਸ਼ਵਾਸ ਮਹਿਸੂਸ ਕਰਨਾ ਚਾਹੁੰਦੀ ਸੀ। ਇਸੇ ਤਰ੍ਹਾਂ ਬੈਂਗਲੁਰੂ ਦੀ ਇਕ ਹੋਰ ਲੜਕੀ ਪ੍ਰਿਆ ਨੇ ਦੱਸਿਆ ਕਿ ਉਸ ਨੂੰ ਮੁੰਡੇ ਵਾਲਿਆਂ ਵੱਲੋਂ ਮੋਟਾਪੇ ਕਾਰਨ ਕਈ ਵਾਰ ਰਿਜੈਕਟ ਕੀਤਾ ਗਿਆ, ਜਿਸ ਕਾਰਨ ਉਸ ਨੇ ਇਨ੍ਹਾਂ ਦਵਾਈਆਂ ਦਾ ਸਹਾਰਾ ਲਿਆ।

ਕੀਮਤ ਅਤੇ ਉਪਲਬਧਤਾ
ਭਾਰਤ 'ਚ ਇਨ੍ਹਾਂ ਦਵਾਈਆਂ ਦਾ ਬਾਜ਼ਾਰ 2030 ਤੱਕ 80 ਅਰਬ ਰੁਪਏ ਤੱਕ ਪਹੁੰਚਣ ਦੀ ਉਮੀਦ ਹੈ। ਮਾਊਂਜਾਰੋ ਦੇ ਇਕ ਮਹੀਨੇ ਦੇ ਕੋਰਸ ਦੀ ਕੀਮਤ ₹13,125 ਤੋਂ ₹25,781 ਤੱਕ ਹੈ, ਜਦਕਿ ਨੋਵੋ ਨੋਰਡਿਸਕ ਦੀ ਵੇਗੋਵੀ ₹5,660 ਤੋਂ ₹16,400 ਪ੍ਰਤੀ ਮਹੀਨਾ 'ਚ ਮਿਲ ਰਹੀ ਹੈ। ਹਾਲਾਂਕਿ ਹੁਣ ਭਾਰਤੀ ਕੰਪਨੀਆਂ ਨੇ ਵੀ ਇਨ੍ਹਾਂ ਦੇ ਸਸਤੇ ਵਰਜ਼ਨ ਲਾਂਚ ਕੀਤੇ ਹਨ।

ਡਾਕਟਰਾਂ ਦੀ ਚਿਤਾਵਨੀ 
ਮਾਹਿਰ ਡਾਕਟਰਾਂ ਅਤੇ ਰੈਗੂਲੇਟਰਾਂ ਨੇ ਇਸ 'ਤੇ ਚਿੰਤਾ ਜਤਾਈ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਦਵਾਈਆਂ ਸਿਰਫ਼ ਗੰਭੀਰ ਮੋਟਾਪੇ ਜਾਂ ਸ਼ੂਗਰ ਵਰਗੀਆਂ ਬਿਮਾਰੀਆਂ ਨਾਲ ਜੂਝ ਰਹੇ ਮਰੀਜ਼ਾਂ ਲਈ ਹਨ। ਡਾਕਟਰ ਸਵਾਤੀ ਪ੍ਰਧਾਨ ਅਨੁਸਾਰ, ਭਾਰ ਘਟਾਉਣ ਲਈ ਇਨ੍ਹਾਂ ਦਵਾਈਆਂ ਨੂੰ 'ਸ਼ਾਰਟਕੱਟ' ਵਜੋਂ ਨਹੀਂ ਵਰਤਣਾ ਚਾਹੀਦਾ। ਕੰਪਨੀਆਂ ਜਿਵੇਂ ਕਿ ਐਲੀ ਲਿਲੀ ਅਤੇ ਨੋਵੋ ਨੇ ਵੀ ਸਪੱਸ਼ਟ ਕੀਤਾ ਹੈ ਕਿ ਇਹ ਦਵਾਈਆਂ ਸਿਰਫ਼ ਡਾਕਟਰੀ ਨਿਗਰਾਨੀ ਹੇਠ ਹੀ ਵਰਤੀਆਂ ਜਾਣੀਆਂ ਚਾਹੀਦੀਆਂ ਹਨ।