ਸਫਾਈ ਕਰਮਚਾਰੀ ਨੂੰ ਕੂੜੇ ''ਚੋਂ ਲੱਭਾ ਖਜ਼ਾਨਾ, ਲੱਖਾਂ ਦਾ ਸਾਮਾਨ ਵੇਖ ਸਭ ਦੇ ਉੱਡੇ ਹੋਸ਼

ਇੰਦੌਰ- ਘਾਹ ਦੇ ਢੇਰ 'ਚ ਸੂਈ ਲੱਭਣ ਵਾਲੀ ਕਹਾਵਤ ਤਾਂ ਤੁਸੀਂ ਸੁਣੀ ਹੋਵੇਗੀ ਪਰ ਦੇਸ਼ ਦੇ ਸਭ ਤੋਂ ਸਵੱਛ ਸ਼ਹਿਰ ਇੰਦੌਰ 'ਚ ਨਗਰ ਨਿਗਮ ਦੇ ਕਰਮਚਾਰੀਆਂ ਨੇ ਕੂੜੇ ਦੇ ਕਈ ਟਨ ਭਾਰੀ ਢੇਰ 'ਚ ਦੱਬੇ ਚਾਂਦੀ ਦੇ ਇਕ ਕਲਸ਼ ਨੂੰ ਲੱਭ ਕੇ ਇਸ ਨੂੰ ਹਕੀਕਤ 'ਚ ਬਦਲ ਦਿੱਤਾ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਰਾਜੇਂਦਰ ਨਗਰ ਖਾਤਰ ਦੇ ਇਕ ਪਰਿਵਾਰ ਦੀ ਬਜ਼ੁਰਗ ਔਰਤ ਨੇ 18 ਜੁਲਾਈ ਨੂੰ ਆਪਣੇ ਘਰ ਦੇ ਕੂੜੇ ਨਾਲ ਅਣਜਾਣੇ 'ਚ ਉਹ ਥੈਲੀ ਵੀ ਨਗਰ ਨਿਗਮ ਦੇ ਕੂੜਾ ਇਕੱਠੇ ਕਰਨ ਵਾਲੇ ਵਾਹਨ 'ਚ ਸੁੱਟ ਦਿੱਤੀ, ਜਿਸ 'ਚ ਚਾਂਦੀ ਦਾ ਕਰੀਬ 2 ਕਿਲੋਗ੍ਰਾਮ ਭਾਰੀ ਕਲਸ਼ ਰੱਖਿਆ ਸੀ।

ਉਨ੍ਹਾਂ ਦੱਸਿਆ ਕਿ ਥੈਲੀ ਬੰਦ ਸੀ ਅਤੇ ਕੂੜੇ ਦੀਆਂ ਦੂਜੀਆਂ ਥੈਲੀਆਂ ਦੇ ਵਿਚ ਰੱਖੀ ਸੀ, ਇਸ ਲਈ ਨਗਰ ਨਿਗਮ ਦੇ ਕਿਸੇ ਵੀ ਕਰਮਚਾਰੀ ਨੂੰ ਔਰਤ ਦੀ ਗਲਤੀ ਦਾ ਅੰਦਾਜਾ ਨਹੀਂ ਹੋਇਆ। ਅਧਿਕਾਰੀਆਂ ਅਨੁਸਾਰ ਔਰਤ ਦੇ ਘਰ 'ਚ ਜਦੋਂ ਕਲਸ਼ ਨਹੀਂ ਮਿਲਿਆ ਤਾਂ ਉਸ ਦੇ ਪਰਿਵਾਰ ਦੇ ਹੋਸ਼ ਉੱਡ ਗਏ, ਕਿਉਂਕਿ ਇਹ ਪੁਸ਼ਤੈਨੀ ਵਿਰਾਸਤ ਵਜੋਂ ਸੰਭਾਲ ਕੇ ਰੱਖੀ ਗਈ ਸੀ ਅਤੇ ਇਸ ਨੂੰ ਪੂਜਾ ਪਾਠ 'ਚ ਇਸਤੇਮਾਲ ਕੀਤਾ ਜਾਂਦਾ ਸੀ। ਘਬਰਾਏ ਪਰਿਵਾਰ ਨੇ ਨਗਰ ਨਿਗਮ ਅਧਿਕਾਰੀਆਂ ਨਾਲ ਸੰਪਰਕ ਕੀਤਾ ਪਰ ਉਦੋਂ ਤੱਕ ਕਲਸ਼ ਲੰਬੀ ਯਾਤਰਾ ਤੈਅ ਕਰ ਚੁੱਕਿਆ ਸੀ।

ਅਧਿਕਾਰੀਆਂ ਨੇ ਦੱਸਿਆ ਕਿ ਚਾਂਦੀ ਦੇ ਕਲਸ਼ ਨੂੰ ਦੂਜੇ ਕੂੜੇ ਨਾਲ ਪਹਿਲੇ ਇਕ ਕੂੜਾ ਟਰਾਂਸਫਰ ਸਟੇਸ਼ਨ ਲਿਜਾਇਆ ਗਿਆ ਅਤੇ ਉੱਥੋਂ ਇਸ ਨੂੰ ਸ਼ਹਿਰ ਦੇ ਟ੍ਰੈਂਚਿੰਗ ਗਰਾਊਂਡ ਦੇ ਕੇਂਦਰੀਕ੍ਰਿਤ ਕੂੜਾ ਪ੍ਰੋਸੈਸਿੰਗ ਸੈਂਟਰ ਪਹੁੰਚਾ ਦਿੱਤਾ ਗਿਆ। ਮੁੱਖ ਸਿਹਤ ਇੰਸਪੈਕਟਰ (ਸੀਐੱਸਆਈ) ਵਿਜੇ ਯਾਦਵ ਨੇ ਸੋਮਵਾਰ ਨੂੰ ਦੱਸਿਆ,''ਸੁਰੂਆਤ 'ਚ ਸਾਨੂੰ ਲੱਗਾ ਕਿ ਇਸ ਕਲਸ਼ ਨੂੰ ਲੱਭਣਾ ਲਗਭਗ ਅਸੰਭਵ ਹੈ, ਕਿਉਂਕਿ ਪ੍ਰੋਸੈਸਿੰਗ ਸੈਂਟਰ 'ਚ ਹਰ ਰੋਜ਼ ਪੂਰੇ ਸ਼ਹਿਰ ਦਾ ਸੈਂਕੜੇ ਟਨ ਕੂੜਾ ਪਹੁੰਚਦਾ ਹੈ। ਇਹ ਸਚਮੁੱਚ ਘਾਹ 'ਚ ਸੂਈ ਲੱਭਣ ਵਰਗਾ ਕੰਮ ਸੀ।''

ਯਾਦਵ ਨੇ ਦੱਸਿਆ ਕਿ ਪ੍ਰੋਸੈਸਿੰਗ ਕੇਂਦਰ 'ਚ ਕੂੜੇ ਦੀ ਛਾਂਟੀ ਕਰਨ ਵਾਲੇ ਕਰਮਚਾਰੀਆਂ ਨੂੰ ਚਾਂਦੀ ਦੇ ਕਲਸ਼ ਬਾਰੇ ਸੂਚਨਾ ਦਿੱਤੀ। ਇਸ ਕੇਂਦਰ 'ਚ ਪਲਾਸਟਿਕ, ਧਾਤੂ, ਤਾਰ, ਥਰਮੋਕੋਲ, ਬੂਟ-ਚੱਪਲਾਂ ਅਤੇ ਹੋਰ ਵਸਤੂਆਂ ਵੱਖ-ਵੱਖ ਕੀਤੀਆਂ ਜਾਂਦੀਆਂ ਹਨ ਅਤੇ ਬਾਅਦ 'ਚ ਉਨ੍ਹਾਂ ਦਾ ਪ੍ਰੋਸੈੱਸ ਕੀਤਾ ਜਾਂਦਾ ਹੈ। ਉਨ੍ਹਾਂ ਦੱਸਿਆ,''ਪ੍ਰੋਸੈਸਿੰਗ ਕੇਂਦਰ ਦੇ ਕਰਮਚਾਰੀਆਂ ਨੇ ਕਲਸ਼ ਨੂੰ ਧਾਤੂ ਦੇ ਕਬਾੜ ਦੇ ਕਈ ਟਨ ਭਾਰੀ ਢੇਰ 'ਚ ਰੱਖ ਦਿੱਤਾ ਸੀ, ਕਿਉਂਕਿ ਕਿਸੇ ਵੀ ਵਿਅਕਤੀ ਨੂੰ ਅੰਦਾਜਾ ਨਹੀਂ ਸੀ ਕਿ ਇਹ ਚਾਂਦੀ ਦਾ ਹੈ।''

ਸੀਐੱਸਆਈ ਨੇ ਰਿਪੋਰਟ ਦਿੱਤੀ ਕਿ ਔਰਤ ਦੇ ਪਰਿਵਾਰ ਨੇ ਨਗਰ ਨਿਗਮ ਅਧਿਕਾਰੀਆਂ ਨੂੰ ਕਲਸ਼ ਦੀ ਇਕ ਫੋਟੋ ਉਪਲੱਬਧ ਕਰਵਾਈ, ਜਿਸ ਤੋਂ ਬਾਅਦ ਸਟਾਫ ਨੇ ਇਸ ਦੀ ਭਾਲ ਸ਼ੁਰੂ ਕਰ ਦਿੱਤੀ। ਉਨ੍ਹਾਂ ਦੱਸਿਆ,"ਸਾਨੂੰ ਦੋ ਦਿਨਾਂ ਦੀ ਭਾਲ ਤੋਂ ਬਾਅਦ ਅਜਿਹਾ ਕਲਸ਼ ਮਿਲਿਆ ਜਿਸ ਦਾ ਡਿਜ਼ਾਈਨ ਫੋਟੋ ਨਾਲ ਮੇਲ ਖਾਂਦਾ ਸੀ। ਕਲਸ਼ 'ਤੇ ਪਰਿਵਾਰ ਦਾ ਨਾਮ ਵੀ ਲਿਖਿਆ ਹੋਇਆ ਸੀ। ਜਦੋਂ ਪਰਿਵਾਰ ਨੂੰ ਕਲਸ਼ ਦੀ ਬਰਾਮਦਗੀ ਦੀ ਸੂਚਨਾ ਮਿਲੀ ਤਾਂ ਉਹ ਬਹੁਤ ਖੁਸ਼ ਹੋਏ।" ਯਾਦਵ ਨੇ ਹਾਲਾਂਕਿ ਕਿਹਾ ਕਿ ਜੇਕਰ ਨਗਰ ਨਿਗਮ ਨੂੰ ਕਲਸ਼ ਗੁੰਮ ਹੋਣ ਦੀ ਸੂਚਨਾ ਦੇਰ ਨਾਲ ਮਿਲਦੀ ਤਾਂ ਇਸ ਭਾਂਡੇ ਦਾ ਬਚਣਾ ਮੁਸ਼ਕਲ ਸੀ।

ਔਰਤ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ 'ਤੇ ਕਿਹਾ,''ਸਾਡੇ ਪੁਸ਼ਤੈਨੀ ਕਲਸ਼ ਦਾ ਮਿਲਣਾ ਕਿਸੇ ਚਮਤਕਾਰ ਤੋਂ ਘੱਟ ਨਹੀਂ ਹੈ। ਇਸ ਨੂੰ ਲੱਭਣ ਲਈ ਨਗਰ ਨਿਗਮ ਦੇ ਕਰਮਚਾਰੀਆਂ ਦੀ ਜਿੰਨੀ ਤਾਰੀਫ਼ ਕੀਤੀ ਜਾਵੇ, ਘੱਟ ਹੈ।" ਸਥਾਨਕ ਕੌਂਸਲਰ ਪ੍ਰਸ਼ਾਂਤ ਬਡਵੇ ਨੇ ਕਿਹਾ ਕਿ ਚਾਂਦੀ ਦੇ ਕਲਸ਼ ਦਾ ਭਾਰ ਲਗਭਗ 2 ਕਿਲੋਗ੍ਰਾਮ ਹੈ ਅਤੇ ਮੌਜੂਦਾ ਦਰਾਂ 'ਤੇ ਇਸ ਦੀ ਕੀਮਤ 4 ਤੋਂ 5 ਲੱਖ ਰੁਪਏ ਦੇ ਵਿਚਕਾਰ ਹੋਣ ਦਾ ਅਨੁਮਾਨ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e