ਬਿਹਾਰ 'ਚ ਕਾਊਂਟਿੰਗ ਸੈਂਟਰ ਬਾਹਰ ਹੰਗਾਮਾ, ਭੀੜ ਨੇ ਫੂਕ ਦਿੱਤੀ ਸਕਾਪੀਓ, ਪੁਲਸ ਮੁਲਾਜ਼ਮਾਂ ਦੇ ਪਾੜੇ ਸਿਰ

ਨੈਸ਼ਨਲ ਡੈਸਕ- ਬਿਹਾਰ ਦੇ ਕੈਮੂਰ ਜ਼ਿਲ੍ਹੇ ਵਿੱਚ ਸਥਿਤ ਰਾਮਗੜ੍ਹ ਵਿਧਾਨ ਸਭਾ ਖੇਤਰ ਦੀ ਵੋਟਾਂ ਦੀ ਗਿਣਤੀ ਦੌਰਾਨ ਸ਼ੁੱਕਰਵਾਰ ਨੂੰ ਬਾਜ਼ਾਰ ਸਮਿਤੀ ਮੋਹਨੀਆ ਵਿਖੇ ਮਾਹੌਲ ਅਚਾਨਕ ਤਣਾਅਪੂਰਨ ਹੋ ਗਿਆ। ਕਾਊਂਟਿੰਗ ਸੈਂਟਰ ਦੇ ਬਾਹਰ ਇਕੱਠੇ ਹੋਏ ਸਮਰਥਕਾਂ ਅਤੇ ਪੁਲਸ ਵਿਚਾਲੇ ਜ਼ੋਰਦਾਰ ਝੜਪ (ਝਗੜਾ) ਹੋ ਗਈ।

ਇਹ ਹੰਗਾਮਾ ਉਦੋਂ ਸ਼ੁਰੂ ਹੋਇਆ ਜਦੋਂ ਅੰਤਿਮ ਰਾਊਂਡ ਵਿੱਚ ਵੋਟਾਂ ਦੇ ਅੰਤਰ ਨੂੰ ਲੈ ਕੇ ਗੜਬੜੀ ਹੋ ਗਈ ਅਤੇ ਭੀੜ ਉਤੇਜਿਤ ਹੋ ਗਈ। ਅਧਿਕਾਰੀਆਂ ਮੁਤਾਬਕ, ਝੜਪ ਦੌਰਾਨ ਤਿੰਨ ਪੁਲਸ ਵਾਲਿਆਂ ਦੇ ਸਿਰ ਫਟ ਗਏ। ਹਾਲਾਤ ਕਾਬੂ ਤੋਂ ਬਾਹਰ ਹੁੰਦੇ ਦੇਖ ਕੇ ਪੁਲਸ ਨੇ ਲਾਠੀਚਾਰਜ ਕੀਤਾ। ਇਸ ਤੋਂ ਨਾਰਾਜ਼ ਸਮਰਥਕਾਂ ਨੇ ਪਥਰਾਅ ਸ਼ੁਰੂ ਕਰ ਦਿੱਤਾ। ਤਣਾਅ ਇੰਨਾ ਵਧ ਗਿਆ ਕਿ ਸਮਰਥਕ ਬੈਰੀਕੇਡ ਤੋੜ ਕੇ ਸਿੱਧੇ ਕਾਊਂਟਿੰਗ ਸੈਂਟਰ ਦੇ ਮੁੱਖ ਦਰਵਾਜ਼ੇ ਤੱਕ ਪਹੁੰਚ ਗਏ, ਜਿਸ ਤੋਂ ਬਾਅਦ ਪੁਲਸ ਨੂੰ ਉਨ੍ਹਾਂ ਨੂੰ ਖਦੇੜ ਕੇ ਬਾਹਰ ਕੱਢਣਾ ਪਿਆ।

ਇਸ ਹਫੜਾ-ਦਫੜੀ ਦੌਰਾਨ, ਕੁਝ ਸਮਰਥਕਾਂ ਨੇ ਨਗਰ ਆਵਾਸ ਅਤੇ ਵਿਕਾਸ ਕਾਰਜਪਾਲਕ ਅਧਿਕਾਰੀ ਦੀ ਸਰਕਾਰੀ ਸਕਾਰਪੀਓ ਗੱਡੀ ਨੂੰ ਅੱਗ ਲਗਾ ਦਿੱਤੀ। ਗੱਡੀ ਨੂੰ ਅੱਗ ਲੱਗਣ ਕਾਰਨ ਮੌਕੇ 'ਤੇ ਭਾਜੜਾਂ ਪੈ ਗਈਆਂ।

ਕਿਉਂ ਹੋਇਆ ਹੰਗਾਮਾ?

ਇਸ ਹੰਗਾਮੇ ਦਾ ਮੁੱਖ ਕਾਰਨ ਰਾਮਗੜ੍ਹ ਸੀਟ 'ਤੇ ਭਾਜਪਾ ਦੇ ਉਮੀਦਵਾਰ ਅਸ਼ੋਕ ਕੁਮਾਰ ਸਿੰਘ ਅਤੇ ਬਸਪਾ ਦੇ ਉਮੀਦਵਾਰ ਸਤੀਸ਼ ਕੁਮਾਰ ਯਾਦਵ ਵਿਚਕਾਰ 175 ਵੋਟਾਂ ਦਾ ਬੇਹੱਦ ਸਖ਼ਤ ਮੁਕਾਬਲਾ ਸੀ। ਇਸ ਕਾਰਨ ਦਿਨ ਭਰ ਮਾਹੌਲ ਗਰਮ ਰਿਹਾ ਅਤੇ ਹਜ਼ਾਰਾਂ ਸਮਰਥਕ ਸੜਕ 'ਤੇ ਮੌਜੂਦ ਸਨ।

ਵੋਟਾਂ ਦੀ ਗਿਣਤੀ ਦੇ ਅੰਤ ਵਿੱਚ ਰਾਮਗੜ੍ਹ ਵਿਧਾਨ ਸਭਾ ਸੀਟ ਤੋਂ ਬਸਪਾ ਦੇ ਸਤੀਸ਼ ਕੁਮਾਰ ਸਿੰਘ 30 ਵੋਟਾਂ ਦੇ ਮਾਮੂਲੀ ਅੰਤਰ ਨਾਲ ਜੇਤੂ ਰਹੇ। ਸਤੀਸ਼ ਕੁਮਾਰ ਸਿੰਘ ਨੂੰ 72,689 ਵੋਟਾਂ ਮਿਲੀਆਂ ਜਦੋਂ ਕਿ ਭਾਜਪਾ ਦੇ ਅਸ਼ੋਕ ਸਿੰਘ ਨੂੰ 72,659 ਵੋਟਾਂ ਮਿਲੀਆਂ।

ਪ੍ਰਸ਼ਾਸਨ ਨੇ ਸਥਿਤੀ ਨੂੰ ਕਾਬੂ ਵਿੱਚ ਰੱਖਣ ਲਈ ਖੇਤਰ ਵਿੱਚ ਵਾਧੂ ਸੁਰੱਖਿਆ ਬਲ ਤਾਇਨਾਤ ਕੀਤੇ ਹਨ। ਸੁਰੱਖਿਆ ਵਧਾ ਦਿੱਤੀ ਗਈ ਹੈ ਅਤੇ ਅਧਿਕਾਰੀਆਂ ਨੇ ਕਿਸੇ ਵੀ ਅਣਸੁਖਾਵੀਂ ਘਟਨਾ ਤੋਂ ਬਚਣ ਲਈ ਪੂਰੇ ਖੇਤਰ ਦੀ ਘੇਰਾਬੰਦੀ ਕਰ ਦਿੱਤੀ ਹੈ। ਪੂਰੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।