"ਮਾਸਿਕ ਧਰਮ ਕੁਦਰਤੀ ਹੈ ਕੋਈ ਕਲੰਕ ਨਹੀਂ", ਰਾਘਵ ਚੱਢਾ ਨੇ ਸੰਸਦ 'ਚ ਔਰਤਾਂ ਦੇ ਹੱਕ 'ਚ ਚੁੱਕੀ ਆਵਾਜ਼

ਨਵੀਂ ਦਿੱਲੀ- ਰਾਜ ਸਭਾ ਮੈਂਬਰ ਰਾਘਵ ਚੱਢਾ ਨੇ ਸ਼ੁੱਕਰਵਾਰ ਨੂੰ ਸਦਨ ਵਿੱਚ ਮਾਸਿਕ ਧਰਮ (ਪੀਰੀਅਡਸ) ਨਾਲ ਜੁੜੇ ਸਮਾਜਿਕ ਕਲੰਕ ਨੂੰ ਖਤਮ ਕਰਨ ਦੀ ਜ਼ੋਰਦਾਰ ਵਕਾਲਤ ਕੀਤੀ। ਉਨ੍ਹਾਂ ਕਿਹਾ ਕਿ ਜੇਕਰ ਦੇਸ਼ ਦੀਆਂ 35 ਕਰੋੜ ਔਰਤਾਂ ਅਤੇ ਲੜਕੀਆਂ ਮਾਸਿਕ ਧਰਮ ਬਾਰੇ ਬਿਨਾਂ ਕਿਸੇ ਸ਼ਰਮ ਜਾਂ ਡਰ ਦੇ ਗੱਲ ਨਹੀਂ ਕਰ ਸਕਦੀਆਂ, ਤਾਂ ਅਸੀਂ ਖੁਦ ਨੂੰ ਸੱਚਮੁੱਚ ਪ੍ਰਗਤੀਸ਼ੀਲ ਨਹੀਂ ਕਹਿ ਸਕਦੇ।

ਰਾਘਵ ਚੱਢਾ ਨੇ ਸਪੱਸ਼ਟ ਕੀਤਾ ਕਿ ਮਾਸਿਕ ਧਰਮ ਦੀ ਸਵੱਛਤਾ ਕੋਈ ਦਾਨ ਜਾਂ ਅਹਿਸਾਨ ਨਹੀਂ ਹੈ, ਸਗੋਂ ਇਹ ਸਿਹਤ, ਸਿੱਖਿਆ ਅਤੇ ਸਮਾਨਤਾ ਨਾਲ ਜੁੜਿਆ ਵਿਸ਼ਾ ਹੈ।
ਉਨ੍ਹਾਂ ਕਿਹਾ ਕਿ ਇਹ ਸਭ ਤੋਂ ਉੱਪਰ ਔਰਤਾਂ ਦੀ ਗ਼ੈਰਤ (ਗਰਿਮਾ) ਦਾ ਸਵਾਲ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਜੇਕਰ ਕਿਸੇ ਲੜਕੀ ਨੂੰ ਸੈਨੀਟਰੀ ਪੈਡ, ਪਾਣੀ ਜਾਂ ਨਿੱਜਤਾ ਦੀ ਘਾਟ ਕਾਰਨ ਸਕੂਲ ਛੱਡਣਾ ਪੈਂਦਾ ਹੈ, ਤਾਂ ਇਹ ਉਸ ਦੀ ਨਿੱਜੀ ਸਮੱਸਿਆ ਨਹੀਂ ਬਲਕਿ ਸਾਡੀ ਸਮੂਹਿਕ ਅਸਫਲਤਾ ਹੈ।

ਸਮਾਜਿਕ ਕੁਰੀਤੀਆਂ 'ਤੇ ਚੋਟ ਕਰਦਿਆਂ ਚੱਢਾ ਨੇ ਕਿਹਾ, "ਅਸੀਂ ਅਜਿਹੇ ਦੇਸ਼ ਵਿੱਚ ਰਹਿੰਦੇ ਹਾਂ ਜਿੱਥੇ ਸ਼ਰਾਬ ਅਤੇ ਸਿਗਰੇਟ ਸ਼ਰੇਆਮ ਵਿਕਦੇ ਹਨ ਪਰ ਸੈਨੀਟਰੀ ਪੈਡ ਅੱਜ ਵੀ ਅਖਬਾਰ ਵਿੱਚ ਲਪੇਟ ਕੇ ਦਿੱਤੇ ਜਾਂਦੇ ਹਨ, ਮਾਨੋ ਉਨ੍ਹਾਂ ਨੂੰ ਛਿਪਾਉਣਾ ਜ਼ਰੂਰੀ ਹੋਵੇ।" ਉਨ੍ਹਾਂ ਅਫਸੋਸ ਜਤਾਇਆ ਕਿ ਸਮਾਜ ਨੇ ਇੱਕ ਜੈਵਿਕ ਤੱਥ ਨੂੰ ਸਮਾਜਿਕ ਬੁਰਾਈ ਬਣਾ ਦਿੱਤਾ ਹੈ ਅਤੇ ਵਿਗਿਆਨ ਨਾਲ ਜੁੜੇ ਮੁੱਦੇ ਨੂੰ ਚੁੱਪੀ ਦਾ ਵਿਸ਼ਾ ਬਣਾ ਦਿੱਤਾ ਗਿਆ ਹੈ।

Periods are natural. Stigma is not.

If a girl misses school because there are no sanitary pads, no water and no privacy, it is not her personal problem. It is our collective failure.

We live in a country where alcohol and cigarettes are sold openly, but sanitary pads are still… pic.twitter.com/C0KJt4du8J

— Raghav Chadha (@raghav_chadha) March 13, 2026

ਇਸ ਦੌਰਾਨ ਸਰਕਾਰ ਵੱਲੋਂ ਵੀ ਇਸ ਦਿਸ਼ਾ ਵਿੱਚ ਕੀਤੇ ਜਾ ਰਹੇ ਕੰਮਾਂ ਦਾ ਵੇਰਵਾ ਸਾਹਮਣੇ ਆਇਆ ਹੈ:

ਵਧਦੀ ਜਾਗਰੂਕਤਾ: ਰਾਸ਼ਟਰੀ ਪਰਿਵਾਰ ਸਿਹਤ ਸਰਵੇਖਣ ਅਨੁਸਾਰ, 15 ਤੋਂ 24 ਸਾਲ ਦੀਆਂ ਔਰਤਾਂ ਵਿੱਚ ਸੁਰੱਖਿਅਤ ਤਰੀਕਿਆਂ ਦੀ ਵਰਤੋਂ 57.6% ਤੋਂ ਵੱਧ ਕੇ 77.3% ਹੋ ਗਈ ਹੈ।

ਸੁਵਿਧਾ ਨੈਪਕਿਨ: ਜਨਔਸ਼ਧੀ ਕੇਂਦਰਾਂ ਰਾਹੀਂ ਸਿਰਫ਼ 1 ਰੁਪਏ ਵਿੱਚ 'ਸੁਵਿਧਾ' ਆਕਸੋ-ਬਾਇਓਡੀਗ੍ਰੇਡੇਬਲ ਸੈਨੀਟਰੀ ਨੈਪਕਿਨ ਮੁਹੱਈਆ ਕਰਵਾਏ ਜਾ ਰਹੇ ਹਨ।
ਵੱਡੀ ਵਿਕਰੀ: 30 ਨਵੰਬਰ 2025 ਤੱਕ 96.30 ਕਰੋੜ ਤੋਂ ਵੱਧ 'ਸੁਵਿਧਾ' ਪੈਡਾਂ ਦੀ ਵਿਕਰੀ ਹੋ ਚੁੱਕੀ ਹੈ।

ਸਕੂਲਾਂ ਲਈ ਨੀਤੀ: ਸਰਕਾਰ ਨੇ ਸਕੂਲਾਂ ਲਈ ਵਿਸ਼ੇਸ਼ ਮਾਸਿਕ ਧਰਮ ਸਫਾਈ ਨੀਤੀ ਤਿਆਰ ਕੀਤੀ ਹੈ, ਜਿਸ ਵਿੱਚ ਵੱਖਰੇ ਪਖਾਨੇ ਅਤੇ ਸੁਰੱਖਿਅਤ ਨਿਪਟਾਰੇ ਦੇ ਪ੍ਰਬੰਧਾਂ 'ਤੇ ਜ਼ੋਰ ਦਿੱਤਾ ਗਿਆ ਹੈ।

ਰਾਘਵ ਚੱਢਾ ਨੇ ਅੰਤ ਵਿੱਚ ਕਿਹਾ ਕਿ ਕਿਸੇ ਵੀ ਦੇਸ਼ ਦੀ ਤਰੱਕੀ ਦੀ ਅਸਲ ਕਸੌਟੀ ਇਹੀ ਹੈ ਕਿ ਹਰ ਲੜਕੀ ਬਿਨਾਂ ਕਿਸੇ ਡਰ ਦੇ ਸਕੂਲ ਜਾ ਸਕੇ ਅਤੇ ਸਨਮਾਨ ਨਾਲ ਜੀਵਨ ਜੀ ਸਕੇ।