ਖੁੱਲ੍ਹਣ ਠੇਕੇ! ਕਾਂਗਰਸ ਵਿਧਾਇਕ ਬੋਲੇ- ਸ਼ਰਾਬ ਪੀਣ ਨਾਲ ਗਲੇ ''ਚੋਂ ਖਤਮ ਹੋਵੇਗਾ ਕੋਰੋਨਾ

ਕੋਟਾ (ਭਾਸ਼ਾ)— ਰਾਜਸਥਾਨ ਵਿਚ ਸ਼ਰਾਬ ਦੀਆਂ ਦੁਕਾਨਾਂ ਨੂੰ ਖੋਲ੍ਹਣ ਦੀ ਮੰਗ ਕਰਦੇ ਹੋਏ ਕਾਂਗਰਸ ਵਿਧਾਇਕ ਨੇ ਬਿਆਨ ਦਿੱਤਾ ਹੈ। ਕਾਂਗਰਸ ਵਿਧਾਇਕ ਭਰਤ ਸਿੰਘ ਕੁੰਦਨਪੁਰ ਨੇ ਵੀਰਵਾਰ ਭਾਵ ਅੱਜ ਕਿਹਾ ਕਿ ਜੇਕਰ ਅਲਕੋਹਲ ਦੇ ਮਿਸ਼ਰਣ ਵਾਲਾ ਸੈਨੇਟਾਈਜ਼ਰ ਹੱਥਾਂ 'ਤੇ ਕੋਰੋਨਾ ਵਾਇਰਸ ਨੂੰ ਮਾਰ ਸਕਦਾ ਹੈ ਤਾਂ ਸ਼ਰਾਬੀਆਂ ਦੇ ਗਲੇ 'ਚੋਂ ਸ਼ਰਾਬ ਇਸ ਵਾਇਰਸ ਨੂੰ ਕਿਉਂ ਨਹੀਂ ਮਾਰ ਸਕਦੀ। ਵਿਧਾਇਕ ਭਰਤ ਨੇ ਇਸ ਲਈ ਰਾਜਸਥਾਨ ਦੇ ਮੁੱਖ ਮੰਤਰੀ ਅਸ਼ੋਕ ਗਹਿਲੋਤ ਨੂੰ ਚਿੱਠੀ ਲਿਖ ਕੇ ਕਿਹਾ ਕਿ ਜਦੋਂ ਸ਼ਰਾਬ ਨਾਲ ਹੱਥਾਂ 'ਤੇ ਕੋਰੋਨਾ ਵਾਇਰਸ ਦੇ ਵਿਸ਼ਾਣੂ ਮਰ ਸਕਦੇ ਹਨ ਤਾਂ ਇਹ ਸ਼ਰਾਬ ਪੀਣ ਵਾਲਿਆਂ ਦੇ ਗੱਲੇ ਤੋਂ ਵੀ ਵਿਸ਼ਾਣੂ ਨੂੰ ਖਤਮ ਕਰ ਦੇਵੇਗੀ।

ਉਨ੍ਹਾਂ ਨੇ ਦਲੀਲ ਦਿੱਤੀ ਕਿ ਸ਼ਰਾਬ ਦੀਆਂ ਦੁਕਾਨਾਂ ਨੂੰ ਖੋਲ੍ਹਣ ਦਾ ਇਹ ਕਦਮ ਨਾ ਸਿਰਫ ਨਕਲੀ ਸ਼ਰਾਬ ਪੀਣ ਵਾਲੇ ਸ਼ਰਾਬੀਆਂ ਨੂੰ ਮਰਨ ਤੋਂ ਬਚਾਏਗਾ ਸਗੋਂ ਕਿ ਲਾਕਡਾਊਨ ਕਾਰਨ ਅਰਥਵਿਵਸਥਾ ਪ੍ਰਭਾਵਿਤ ਹੋਣ ਦੇ ਮੱਦੇਨਜ਼ਰ ਸੂਬੇ ਲਈ ਮਾਲੀਆ ਵੀ ਮਿਲੇਗਾ, ਜਿਸ ਦੀ ਉਸ ਨੂੰ ਬਹੁਤ ਲੋੜ ਹੈ। ਕੋਟਾ ਜ਼ਿਲੇ ਦੇ ਸਾਂਗੋਦ ਚੋਣ ਖੇਤਰ ਤੋਂ ਵਿਧਾਇਕ ਭਰਤ ਨੇ ਕਿਹਾ ਕਿ ਸ਼ਰਾਬ ਸਭ ਤੋਂ ਬਦਨਾਮ ਚੀਜ਼ ਹੈ। ਇਸ ਲਈ ਨਾ ਤਾਂ ਕੇਂਦਰ ਸੂਬਿਆਂ ਨੂੰ ਸ਼ਰਾਬ ਦੀਆਂ ਦੁਕਾਨਾਂ ਖੋਲ੍ਹਣ ਦੀ ਆਗਿਆ ਦੇਵੇਗਾ ਅਤੇ ਨਾ ਹੀ ਸੂਬੇ ਖੁਦ ਤੋਂ ਇਸ ਦੀ ਵਿਕਰੀ 'ਤੇ ਫੈਸਲਾ ਲੈਣਗੇ। ਉਨ੍ਹਾਂ ਕਿਹਾ ਕਿ ਸ਼ਰਾਬ ਦੀਆਂ ਦੁਕਾਨਾਂ ਬੰਦ ਹੋਣ ਨਾਲ ਸੂਬੇ ਦੀ ਅਰਥਵਿਵਸਥਾ ਵਿਗੜ ਰਹੀ ਹੈ ਅਤੇ ਨਾਲ ਹੀ ਸੂਬੇ ਵਿਚ ਨਾਜਾਇਜ਼ ਸ਼ਰਾਬ ਦਾ ਕਾਰੋਬਾਰ ਵਧ ਰਿਹਾ ਹੈ, ਜਿਸ ਨੂੰ ਪੀ ਕੇ ਲੋਕਾਂ ਦੀ ਜਾਨ ਜਾ ਰਹੀ ਹੈ।