ਆਪਣੀ ਹੀ ਪਾਰਟੀ ਦੇ ਬਾਗੀ ਤੋਂ ਹਾਰ ਗਏ CM ਸਟਾਲਿਨ, VS ਬਾਬੂ ਨੇ ਦਿੱਤੀ ਮਾਤ

ਵੈੱਬ ਡੈਸਕ : ਤਾਮਿਲਨਾਡੂ ਵਿਧਾਨ ਸਭਾ ਚੋਣਾਂ 2026 ਦੇ ਨਤੀਜਿਆਂ ਨੇ ਸੂਬੇ ਦੀ ਸਿਆਸਤ 'ਚ ਇੱਕ ਨਵਾਂ ਇਤਿਹਾਸ ਲਿਖ ਦਿੱਤਾ ਹੈ, ਜਿਸ 'ਚ ਸਭ ਤੋਂ ਵੱਡਾ ਉਲਟਫੇਰ ਮੁੱਖ ਮੰਤਰੀ ਅਤੇ ਡੀਐੱਮਕੇ (DMK) ਪ੍ਰਧਾਨ ਐੱਮ.ਕੇ. ਸਟਾਲਿਨ ਦੀ ਹਾਰ ਦੇ ਰੂਪ 'ਚ ਸਾਹਮਣੇ ਆਇਆ ਹੈ। ਸਟਾਲਿਨ ਨੂੰ ਉਨ੍ਹਾਂ ਦੇ ਆਪਣੇ ਹੀ 'ਅਜਿੱਤ ਕਿਲ੍ਹੇ' ਵਜੋਂ ਜਾਣੀ ਜਾਂਦੀ ਕੋਲਾਥੁਰ ਸੀਟ ਤੋਂ ਕਰਾਰੀ ਸ਼ਿਕਸਤ ਦਾ ਸਾਹਮਣਾ ਕਰਨਾ ਪਿਆ ਹੈ।

ਮੁੱਖ ਮੰਤਰੀ ਨੂੰ ਆਪਣੇ ਹੀ ਸਾਬਕਾ ਸਾਥੀ ਨੇ ਹਰਾਇਆ
ਐਮ.ਕੇ. ਸਟਾਲਿਨ ਨੂੰ ਤਮਿਝਗਾ ਵੇਤਰੀ ਕੜਗਮ (TVK) ਦੇ ਉਮੀਦਵਾਰ ਅਤੇ ਉਨ੍ਹਾਂ ਦੀ ਆਪਣੀ ਹੀ ਪਾਰਟੀ ਦੇ ਸਾਬਕਾ ਦਿੱਗਜ ਨੇਤਾ ਵੀ.ਐੱਸ. ਬਾਬੂ ਨੇ 8,500 ਤੋਂ ਵੱਧ ਵੋਟਾਂ ਦੇ ਫਰਕ ਨਾਲ ਹਰਾਇਆ ਹੈ। ਵੀ.ਐੱਸ. ਬਾਬੂ ਨੇ ਹਾਲ ਹੀ 'ਚ 7 ਫਰਵਰੀ 2026 ਨੂੰ ਡੀਐੱਮਕੇ ਛੱਡ ਕੇ ਅਦਾਕਾਰ ਵਿਜੇ ਦੀ ਪਾਰਟੀ TVK ਦਾ ਪੱਲਾ ਫੜਿਆ ਸੀ।

ਕੌਣ ਹਨ ਵੀ.ਐੱਸ. ਬਾਬੂ?
75 ਸਾਲਾ ਵੀ.ਐੱਸ. ਬਾਬੂ ਤਾਮਿਲਨਾਡੂ ਦੀ ਸਿਆਸਤ ਦਾ ਇੱਕ ਬਹੁਤ ਹੀ ਤਜਰਬੇਕਾਰ ਚਿਹਰਾ ਹਨ, ਜਿਨ੍ਹਾਂ ਕੋਲ 20 ਸਾਲਾਂ ਤੋਂ ਵੱਧ ਦਾ ਸਰਗਰਮ ਸਿਆਸੀ ਅਨੁਭਵ ਹੈ। ਉਹ 2006 ਤੋਂ 2011 ਤੱਕ ਡੀਐੱਮਕੇ ਦੇ ਵਿਧਾਇਕ ਰਹਿ ਚੁੱਕੇ ਹਨ। ਸਾਲ 2006 ਵਿੱਚ ਉਨ੍ਹਾਂ ਨੇ ਪੁਰਾਸਵਾਲਕਮ ਸੀਟ ਤੋਂ 90,000 ਤੋਂ ਵੱਧ ਵੋਟਾਂ ਦੇ ਵੱਡੇ ਫਰਕ ਨਾਲ ਜਿੱਤ ਹਾਸਲ ਕੀਤੀ ਸੀ। 2026 ਦੇ ਚੋਣ ਹਲਫਨਾਮੇ ਮੁਤਾਬਕ ਉਨ੍ਹਾਂ ਕੋਲ 3.7 ਕਰੋੜ ਰੁਪਏ ਦੀ ਜਾਇਦਾਦ ਹੈ।

ਡੀਐੱਮਕੇ ਦੇ ਇਤਿਹਾਸ ਦੀ ਸਭ ਤੋਂ ਸ਼ਰਮਨਾਕ ਹਾਰ
ਇਹ ਪਹਿਲੀ ਵਾਰ ਹੈ ਜਦੋਂ ਡੀਐੱਮਕੇ ਦੇ ਗਠਨ ਤੋਂ ਬਾਅਦ ਪਾਰਟੀ ਦੇ ਪ੍ਰਧਾਨ (ਐੱਮ.ਕੇ. ਸਟਾਲਿਨ) ਅਤੇ ਜਨਰਲ ਸਕੱਤਰ (ਦੁਰਈਮੁਰੂਗਨ) ਦੋਵੇਂ ਹੀ ਵਿਧਾਨ ਸਭਾ ਚੋਣਾਂ ਹਾਰ ਗਏ ਹਨ। ਕੋਲਾਥੁਰ ਸੀਟ, ਜਿਸ ਤੋਂ ਸਟਾਲਿਨ ਨੇ 2011, 2016 ਅਤੇ 2021 ਵਿੱਚ ਲਗਾਤਾਰ ਤਿੰਨ ਵਾਰ ਜਿੱਤ ਪ੍ਰਾਪਤ ਕੀਤੀ ਸੀ, ਇਸ ਵਾਰ ਉਨ੍ਹਾਂ ਦੇ ਹੱਥੋਂ ਨਿਕਲ ਗਈ ਹੈ।

'ਥਲਪਤੀ' ਵਿਜੇ ਦੀ ਲਹਿਰ ਦਾ ਅਸਰ
ਸਿਆਸੀ ਮਾਹਿਰਾਂ ਅਨੁਸਾਰ, ਅਦਾਕਾਰ ਵਿਜੇ (ਥਲਪਤੀ) ਦੀ ਪਾਰਟੀ TVK ਦੇ ਵਧਦੇ ਕ੍ਰੇਜ਼ ਅਤੇ ਵੀ.ਐੱਸ. ਬਾਬੂ ਦੀ ਇਲਾਕੇ ਵਿੱਚ ਮਜ਼ਬੂਤ ਸਥਾਨਕ ਪਕੜ ਨੇ ਮਿਲ ਕੇ ਸਟਾਲਿਨ ਦੇ ਇਸ ਕਿਲ੍ਹੇ ਨੂੰ ਢਾਹ ਲਾਈ ਹੈ। ਸਟਾਲਿਨ ਦੀ ਇਹ ਹਾਰ ਨਾ ਸਿਰਫ਼ ਡੀਐਮਕੇ ਲਈ ਵੱਡਾ ਝਟਕਾ ਹੈ, ਸਗੋਂ ਦੱਖਣ ਦੀ ਸਿਆਸਤ ਵਿੱਚ ਇੱਕ ਨਵੇਂ ਯੁੱਗ ਦੇ ਉਭਾਰ ਦਾ ਸੰਕੇਤ ਵੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e