ਬਦਲ ਗਿਆ ਮਿਰਜ਼ਾਪੁਰ ਦਾ ਨਾਂ, ਹੁਣ ਇਸ ਨਾਂ ਨਾਲ ਜਾਣਿਆ ਜਾਵੇਗਾ

ਮਿਰਜ਼ਾਪੁਰ  - ਇਲਾਹਾਬਾਦ (ਪ੍ਰਯਾਗਰਾਜ) ਅਤੇ ਫੈਜ਼ਾਬਾਦ (ਅਯੁੱਧਿਆ ਧਾਮ) ਤੋਂ ਬਾਅਦ ਹੁਣ ਉੱਤਰ ਪ੍ਰਦੇਸ਼ ਵਿਚ ਮਿਰਜ਼ਾਪੁਰ ਜ਼ਿਲੇ ਦਾ ਨਾਂ ਬਦਲਣ ਦੀ ਪ੍ਰਕਿਰਿਆ ਸ਼ੁਰੂ ਹੋ ਗਈ ਹੈ। ਮਿਰਜ਼ਾਪੁਰ ਨੂੰ ਵਿੰਧਯ ਖੇਤਰ ਦੀ ਅਧਿਸ਼ਠਾਤਰੀ ਦੇਵੀ ਮਾਂ  ਵਿੰਧਿਆਂਵਾਸਿਨੀ ਦੇ ਪ੍ਰਸਿੱਧ ਸ਼ਕਤੀਪੀਠ ਦੇ ਨਾਂ ’ਤੇ ‘ਵਿੰਧਿਆਂਚਲ ਧਾਮ’ ਕੀਤਾ ਜਾਏਗਾ। 

ਇਹ ਪ੍ਰਸਤਾਵ ਵੀਰਵਾਰ ਨੂੰ ਜ਼ਿਲਾ ਇੰਚਾਰਜ ਮੰਤਰੀ ਨੰਦ ਗੋਪਾਲ ‘ਨੰਦੀ’ ਦੀ ਪ੍ਰਧਾਨਗੀ ਹੇਠ ਹੋਈ ਜਨਤਕ ਪ੍ਰਤੀਨਿਧੀਆਂ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦੀ ਮੀਟਿੰਗ ਵਿਚ ਪਾਸ ਕੀਤਾ ਗਿਆ। ਇਸਨੂੰ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਦੇ ਸਾਹਮਣੇ  ਪੇਸ਼ ਕੀਤਾ ਜਾਵੇਗਾ। 

ਰੇਲਵੇ ਸਟੇਸ਼ਨ ਦਾ ਨਾਂ ਪਹਿਲਾਂ ਹੀ ਵਿੰਧਿਆਂਚਲ ਧਾਮ ਕਰਨ ਦੀ  ਪ੍ਰਵਾਨਗੀ ਮਿਲ ਚੁੱਕੀ ਹੈ। ਮਿਰਜ਼ਾਪੁਰ ਦਾ ਨਾਂ ਪਹਿਲਾਂ ਮੁਗਲ ਸ਼ਾਸਕ ਮੀਰ ਜਾਫਰ ਦੇ ਨਾਂ ’ਤੇ ਰੱਖਿਆ ਗਿਆ ਸੀ। ਸਥਾਨਕ ਲੋਕ ਇਸਨੂੰ  ‘ਮਿਰਜ਼ਾਪੁਰ’ ਜਾਂ ‘ਲਕਸ਼ਮੀਪੁਰ’ ਦੇ ਨਾਂ ਨਾਲ ਜਾਣਦੇ ਹਨ। ਦੂਜੇ ਪਾਸੇ, ਸਤਨਾਮੀ ਅਖਾੜੇ ਵੱਲੋਂ ਚਲਾਏ ਜਾ ਰਹੇ ਬੁੱਢੇਨਾਥ ਮੰਦਰ ਦੇ ਮਹੰਤ ਯੋਗਾਨੰਦ ਗਿਰੀ ਨੇ ਜ਼ਿਲੇ ਦਾ ਨਾਂ ਧਾਰਮਿਕ ਸੰਦਰਭਾਂ ਮੁਤਾਬਕ ‘ਗਿਰਜਾਪੁਰ’ ਰੱਖਣ ਦੀ ਮੰਗ ਕੀਤੀ ਸੀ।