ਵਾਤਾਵਰਨ-ਅਨੁਕੂਲ ਮਹਾਕੁੰਭ ਲਈ ਮੇਲਾ ਅਥਾਰਟੀ, ਐੱਨਜੀਟੀ ਤੇ ਐੱਨਜੀਓ ਮਿਲ ਕੇ ਕਰ ਰਹੇ ਕੰਮ

ਪ੍ਰਯਾਗਰਾਜ (ਨਰੇਸ਼ ਕੁਮਾਰ) : ਪ੍ਰਯਾਗਰਾਜ 'ਚ ਚੱਲ ਰਹੇ ਕੁੰਭ ਮੇਲੇ 'ਚ, ਹੁਣ ਤੱਕ 6 ਦਿਨਾਂ 'ਚ 7 ​​ਕਰੋੜ ਲੋਕਾਂ ਨੇ ਪਵਿੱਤਰ ਤ੍ਰਿਵੇਣੀ ਸੰਗਮ 'ਚ ਪਵਿੱਤਰ ਡੁਬਕੀ ਲਗਾਈ ਹੈ ਅਤੇ ਹਰ ਰੋਜ਼ ਲਗਭਗ 20 ਲੱਖ ਲੋਕ ਪ੍ਰਯਾਗਰਾਜ ਆ ਰਹੇ ਹਨ, ਪਰ ਇੰਨੀ ਵੱਡੀ ਗਿਣਤੀ 'ਚ ਸ਼ਰਧਾਲੂਆਂ ਦੀ ਆਵਾਜਾਈ ਦੇ ਬਾਵਜੂਦ, ਮੇਲੇ ਵਾਲੇ ਇਲਾਕੇ 'ਚ ਕੂੜੇ ਦਾ ਕੋਈ ਨਾਮੋ ਨਿਸ਼ਾਨ ਨਹੀਂ ਹੈ। ਮੇਲੇ 'ਚ ਹਿੱਸਾ ਲੈਣ ਵਾਲੇ ਸ਼ਰਧਾਲੂਆਂ ਦੇ ਨਾਲ-ਨਾਲ ਮੇਲਾ ਅਥਾਰਟੀ ਸਫ਼ਾਈ ਦਾ ਵੀ ਵਿਸ਼ੇਸ਼ ਧਿਆਨ ਰੱਖ ਰਹੀ ਹੈ। ਮੇਲੇ 'ਚ ਪਲਾਸਟਿਕ ਦੀ ਵਰਤੋਂ ਘਟਾਉਣ ਲਈ, ਪ੍ਰਸ਼ਾਸਨ 'ਇੱਕ ਸ਼ਰਧਾਲੂ ਇੱਕ ਥੈਲਾ, ਸਵੱਛ ਮੇਲਾ' ਨਾਮਕ ਇੱਕ ਮੁਹਿੰਮ ਵੀ ਚਲਾ ਰਿਹਾ ਹੈ ਤੇ ਮੇਲੇ ਨੂੰ ਕਈ ਤਰੀਕਿਆਂ ਨਾਲ ਵਾਤਾਵਰਣ ਪੱਖੀ ਬਣਾਉਣ ਦੇ ਯਤਨ ਕੀਤੇ ਜਾ ਰਹੇ ਹਨ।

ਸਹਿ-ਮੇਲਾ ਅਧਿਕਾਰੀ ਐੱਸਡੀਐੱਮ ਵਿਵੇਕ ਚਤੁਰਵੇਦੀ ਨੇ ਕਿਹਾ ਕਿ ਮੇਲੇ 'ਚ ਲਗਾਏ ਜਾਣ ਵਾਲੇ ਲੰਗਰ ਦੌਰਾਨ ਪੈਦਾ ਹੋਣ ਵਾਲੇ ਕੂੜੇ ਦੇ ਪ੍ਰਬੰਧਨ ਲਈ ਇੱਕ ਵਿਸ਼ੇਸ਼ ਟੀਮ ਕੰਮ ਕਰ ਰਹੀ ਹੈ ਤੇ 15,000 ਤੋਂ ਵੱਧ ਸਫਾਈ ਕਰਮਚਾਰੀ ਸਫਾਈ ਬਣਾਈ ਰੱਖਣ ਲਈ ਡਿਊਟੀ 'ਤੇ ਹਨ। ਇਸ ਸਮੇਂ ਦੌਰਾਨ, ਮੇਲਾ ਖੇਤਰ 'ਚ ਪੈਦਾ ਹੋਣ ਵਾਲਾ ਸਾਰਾ ਕੂੜਾ ਬਡਿਆਲ ਸਥਿਤ ਪ੍ਰੋਸੈਸਿੰਗ ਪਲਾਂਟ ਵਿੱਚ ਪ੍ਰੋਸੈਸਿੰਗ ਲਈ ਭੇਜਿਆ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ, ਮੇਲਾ ਖੇਤਰ 'ਚ ਹਰ 50 ਮੀਟਰ 'ਤੇ ਕੂੜੇਦਾਨ ਲਗਾਏ ਗਏ ਹਨ ਤੇ ਸ਼ਰਧਾਲੂ ਖੁਦ ਮੇਲਾ ਖੇਤਰ 'ਚ ਸਫਾਈ ਪ੍ਰਤੀ ਜਾਗਰੂਕ ਹਨ ਤੇ ਉਨ੍ਹਾਂ ਦੀ ਵਰਤੋਂ ਕਰ ਰਹੇ ਹਨ! ਇਨ੍ਹਾਂ ਡਸਟਬਿਨਾਂ ਨੂੰ ਖਾਲੀ ਕਰਨ ਲਈ ਟੀਮਾਂ ਤਾਇਨਾਤ ਕੀਤੀਆਂ ਗਈਆਂ ਹਨ ਅਤੇ ਸਫਾਈ ਦੇ ਕੰਮ ਦੀ ਨਿਰੰਤਰ ਨਿਗਰਾਨੀ ਵੀ ਕੀਤੀ ਜਾ ਰਹੀ ਹੈ।

ਇੰਨਾ ਹੀ ਨਹੀਂ, ਮੇਲਾ ਖੇਤਰ ਤੋਂ ਇਲਾਵਾ, ਪਵਿੱਤਰ ਸੰਗਮ 'ਚ ਇਸ਼ਨਾਨ ਦੌਰਾਨ ਘਾਟਾਂ ਦੀ ਸਫਾਈ ਵੱਲ ਵੀ ਵਿਸ਼ੇਸ਼ ਧਿਆਨ ਦਿੱਤਾ ਜਾ ਰਿਹਾ ਹੈ ਅਤੇ ਘਾਟਾਂ 'ਤੇ ਸਫਾਈ ਦਾ ਕੰਮ ਵੀ ਲਗਾਤਾਰ ਚੱਲ ਰਿਹਾ ਹੈ ਅਤੇ ਸਥਾਨਕ ਐੱਨਜੀਓ ਦੇ ਕਰਮਚਾਰੀ ਵੀ ਇਸ ਕੰਮ ਵਿਚ ਪ੍ਰਸ਼ਾਸਨ ਦੀ ਮਦਦ ਕਰ ਰਹੇ ਹਨ।

ਮੇਲਾ ਖੇਤਰ 'ਚ ਸਫ਼ਾਈ ਤੋਂ ਇਲਾਵਾ, ਪਾਣੀ ਵਿੱਚ ਸਫ਼ਾਈ ਦਾ ਵੀ ਵਿਸ਼ੇਸ਼ ਪ੍ਰਬੰਧ ਹੈ ਜਿੱਥੇ ਲੱਖਾਂ ਸ਼ਰਧਾਲੂ ਪਵਿੱਤਰ ਸੰਗਮ 'ਚ ਡੁਬਕੀ ਲਗਾ ਰਹੇ ਹਨ। ਸੰਗਮ ਦੇ ਸਾਰੇ ਘਾਟਾਂ 'ਤੇ ਸਫਾਈ ਕਰਮਚਾਰੀਆਂ ਦੀਆਂ ਟੀਮਾਂ ਤਾਇਨਾਤ ਹਨ ਜੋ ਸ਼ਰਧਾਲੂਆਂ ਦੁਆਰਾ ਨਹਾਉਣ ਤੋਂ ਬਾਅਦ ਪਾਣੀ 'ਚ ਸੁੱਟੇ ਗਏ ਫੁੱਲਾਂ ਤੇ ਨਾਰੀਅਲ ਨੂੰ ਜਾਲ ਰਾਹੀਂ ਹਟਾਉਣ ਦੇ ਕੰਮ 'ਚ ਰੁੱਝੀਆਂ ਹੋਈਆਂ ਹਨ। ਪਾਣੀ ਦੇ ਬੀਓਡੀ ਪੱਧਰ ਦੀ ਵੀ ਲਗਾਤਾਰ ਨਿਗਰਾਨੀ ਕੀਤੀ ਜਾ ਰਹੀ ਹੈ ਤੇ ਪਿਛਲੇ ਕੁੰਭ ਦੇ ਮੁਕਾਬਲੇ ਪਾਣੀ ਦੀ ਗੁਣਵੱਤਾ ਵਿੱਚ ਬਹੁਤ ਸੁਧਾਰ ਹੋਇਆ ਹੈ।

ਪਿਛਲੇ 2 ਸਾਲਾਂ 'ਚ, ਇਕੱਲੇ ਪ੍ਰਯਾਗਰਾਜ ਖੇਤਰ 'ਚ, ਗੰਗਾ 'ਚ ਗੰਦੇ ਪਾਣੀ ਨੂੰ ਛੱਡਣ ਦੇ 81 ਰਸਤੇ ਬੰਦ ਕਰ ਦਿੱਤੇ ਗਏ ਹਨ ਤੇ ਗੰਗਾ 'ਚ ਗੰਦੇ ਪਾਣੀ ਦੇ ਵਹਾਅ ਨੂੰ ਰੋਕਣ ਕਾਰਨ ਪਾਣੀ ਦੀ ਗੁਣਵੱਤਾ 'ਚ ਸੁਧਾਰ ਹੋਇਆ ਹੈ। ਇਸ ਪ੍ਰੋਜੈਕਟ 'ਚ ਨਮਾਮਿ ਗੰਗੇ ਨੂੰ ਵੀ ਸ਼ਾਮਲ ਕੀਤਾ ਗਿਆ ਹੈ। ਨਮਾਮਿ ਗੰਗੇ ਅਧੀਨ ਕੀਤੇ ਜਾ ਰਹੇ ਕੰਮ ਦਾ ਪਾਣੀ ਦੀ ਗੁਣਵੱਤਾ 'ਤੇ ਵੀ ਪ੍ਰਭਾਵ ਪਿਆ ਹੈ ਤੇ ਪਾਣੀ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਸਾਫ਼ ਹੋ ਗਿਆ ਹੈ।

ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e