ਇਸਰੋ ਨੇ ਗਗਨਯਾਨ ਮਿਸ਼ਨ ਦੀ ਪਹਿਲੀ ਟੈਸਟ ਫਲਾਈਟ ਸਫ਼ਲਤਾਪੂਰਵਕ ਕੀਤੀ ਲਾਂਚ

ਸ਼੍ਰੀਹਰਿਕੋਟਾ (ਭਾਸ਼ਾ)- ਗਗਨਯਾਨ ਮਨੁੱਖੀ ਪੁਲਾੜ ਉਡਾਣ ਪ੍ਰੋਗਰਾਮ ਨਾਲ ਸਬੰਧਤ ਪੇਲੋਡ ਦੇ ਨਾਲ ਉਡਾਣ ਭਰਨ ਵਾਲੇ ਟੈਸਟ ਵਾਹਨ ਨੂੰ ਸ਼ਨੀਵਾਰ ਸਵੇਰੇ 10 ਵਜੇ ਸਫ਼ਲਤਾਪੂਰਵਕ ਲਾਂਚ ਕੀਤਾ ਗਿਆ। ਰਾਕੇਟ ਲਾਂਚ ਪਹਿਲਾਂ ਸ਼ਨੀਵਾਰ ਨੂੰ ਸਵੇਰੇ 8 ਵਜੇ ਨਿਰਧਾਰਤ ਕੀਤਾ ਗਿਆ ਸੀ ਪਰ ਬਾਅਦ ਵਿਚ ਇਸ ਨੂੰ 2 ਵਾਰ ਕੁੱਲ 45 ਮਿੰਟਾਂ ਲਈ ਟਾਲਿਆ ਗਿਆ। ਇਸਰੋ ਮੁਖੀ ਐੱਸ. ਸੋਮਨਾਥ ਨੇ ਬਾਅਦ 'ਚ ਕਿਹਾ ਕਿ ਕੁਝ ਗੜਬੜੀਆਂ ਕਾਰਨ ਲਾਂਚਿੰਗ ਤੈਅ ਸਮੇਂ ਮੁਤਾਬਕ ਨਹੀਂ ਹੋ ਸਕੀ। ਉਨ੍ਹਾਂ ਕਿਹਾ ਕਿ ਟੀ.ਵੀ.-ਡੀ1 ਰਾਕੇਟ ਦਾ ਇੰਜਣ ਨਿਰਧਾਰਤ ਪ੍ਰਕਿਰਿਆ ਅਨੁਸਾਰ ਚਾਲੂ ਨਹੀਂ ਹੋ ਸਕਿਆ ਸੀ। ਇਸ ਤੋਂ ਬਾਅਦ ਇਸਰੋ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' 'ਤੇ ਕਿਹਾ,"ਲਾਂਚ ਰੋਕੇ ਜਾਣ ਦਾ ਕਾਰਨ ਪਤਾ ਲਗਾ ਲਿਆ ਗਿਆ ਹੈ ਅਤੇ ਉਸ ਨੂੰ ਸੁਧਾਰ ਦਿੱਤਾ ਗਿਆ ਹੈ। ਲਾਂਚਿੰਗ ਅੱਜ ਸਵੇਰੇ 10 ਵਜੇ ਹੋਵੇਗੀ।'' 2 ਘੰਟੇ ਦੀ ਦੇਰੀ ਅਤੇ ਟੀਵੀ-ਡੀ1 ਇੰਜਣ ਦੇ ਸ਼ੁਰੂਆਤ 'ਚ ਤੈਅ ਸਮਾਂ-ਸਾਰਣੀ ਅਨੁਸਾਰ ਚਾਲੂ ਨਾ ਹੋ ਸਕਣ ਤੋਂ ਬਾਅਦ ਪੈਦਾ ਹੋਈ ਘਬਰਾਹਟ ਦਰਮਿਆਨ ਇਸਰੋ ਦੇ ਵਿਗਿਆਨੀਆਂ ਨੇ ਰਾਕੇਟ ਨੂੰ ਸਫ਼ਲਤਾਪੂਰਵਕ ਲਾਂਚ ਕੀਤਾ।

ਯਾਨ ਦੇ 'ਕਰੂ ਮਾਡਿਊਲ' (ਜਿਸ 'ਚ ਪੁਲਾੜ ਯਾਤਰੀ ਸਵਾਰ ਹੋਣਗੇ) ਅਤੇ 'ਕਰੂ ਏਸਕੇਪ' (ਚਾਲਕ ਦਲ ਬਚਾਅ ਪ੍ਰਣਾਲੀ) ਵੱਖ ਕਰਨ ਦਾ ਟੀਚਾ ਹਾਸਲ ਕਰਦੇ ਹੀ ਸ਼੍ਰੀਹਰਿਕੋਟਾ ਸਥਿਤ ਮਿਸ਼ਨ ਕੰਟਰੋਲ ਕੇਂਦਰ 'ਚ ਬੈਠੇ ਵਿਗਿਆਨੀਆਂ ਨੇ ਤਾੜੀਆਂ ਵਜਾ ਕੇ ਇਸ ਦਾ ਸੁਆਗਤ ਕੀਤਾ। ਇਸਰੋ ਨੇ ਐਲਾਨ ਕੀਤਾ ਕਿ ਟੀਵੀ-ਡੀ1 ਮਿਸ਼ਨ ਪੂਰੀ ਤਰ੍ਹਾਂ ਸਫ਼ਲ ਰਿਹਾ। ਤੈਅ ਯੋਜਨਾ ਅਨੁਸਾਰ ਪੇਲੋਡ ਬਾਅਦ 'ਚ ਸਮੁੰਦਰ 'ਚ ਸੁਰੱਖਿਅਤ ਤਰੀਕੇ ਨਾਲ ਡਿੱਗ ਗਏ। ਇਸਰੋ ਨੇ ਸਿੰਗਲ-ਸਟੇਜ ਲਿਕਵਿਡ ਪ੍ਰੋਪੇਲੈਂਟ ਵਾਲੇ ਰਾਕੇਟ ਦੇ ਇਸ ਲਾਂਚ ਰਾਹੀਂ ਮਨੁੱਖ ਨੂੰ ਪੁਲਾੜ 'ਚ ਭੇਜਣ ਦੇ ਆਪਣੇ ਅਭਿਲਾਸ਼ੀ ਪ੍ਰੋਗਰਾਮ 'ਗਗਨਯਾਨ' ਦੀ ਦਿਸ਼ਾ 'ਚ ਅੱਗੇ ਕਦਮ ਵਧਾਇਆ। ਇਸਰੋ ਦਾ ਟੀਚਾ ਤਿੰਨ ਦਿਨਾ ਗਗਨਯਾਨ ਮਿਸ਼ਨ ਲਈ ਮਨੁੱਖ ਨੂੰ 400 ਕਿਲੋਮੀਟਰ ਦੀ ਧਰਤੀ ਦੇ ਹੇਠਲੀ ਜਮਾਤ 'ਚ ਪੁਲਾੜ 'ਚ ਭੇਜਣਾ ਅਤੇ ਧਰਤੀ 'ਤੇ ਸੁਰੱਖਿਅਤ ਵਾਪਸ ਲਿਆਉਣਾ ਹੈ। ਇਸਰੋ ਨੇ ਸ਼ੁੱਕਰਵਾਰ ਨੂੰ ਕਿਹਾ ਸੀ ਕਿ ਇਸ ਲਾਂਚ ਉਡਾਣ ਦੀ ਸਫ਼ਲਤਾ ਬਾਕੀ ਲਾਂਚ ਅਤੇ ਮਨੁੱਖ ਰਹਿਤ ਮਿਸ਼ਨ ਲਈ ਆਧਾਰ ਤਿਆਰ ਕਰੇਗੀ, ਜਿਸ ਨਾਲ ਪਹਿਲਾ ਗਗਨਯਾਨ ਪ੍ਰੋਗਰਾਮ ਸ਼ੁਰੂ ਹੋਵੇਗਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8