ਭਾਰਤੀ ਸ਼ੇਅਰ ਬਾਜ਼ਾਰ ''ਚ FPI ਦੀ ਜ਼ੋਰਦਾਰ ਵਾਪਸੀ, ਜੂਨ ''ਚ ਇੰਨੇ ਕਰੋੜ ਦਾ ਸ਼ੁੱਧ ਨਿਵੇਸ਼

ਨਵੀਂ ਦਿੱਲੀ- ਵਿਦੇਸ਼ੀ ਪੋਰਟਫੋਲੀਓ ਨਿਵੇਸ਼ਕਾਂ (FPI) ਨੇ ਇਸ ਹਫ਼ਤੇ ਭਾਰਤੀ ਬਾਜ਼ਾਰਾਂ 'ਚ ਭਾਰੀ ਨਿਵੇਸ਼ ਕੀਤਾ ਹੈ। ਨੈਸ਼ਨਲ ਸਕਿਓਰਿਟੀਜ਼ ਡਿਪਾਜ਼ਟਰੀ ਲਿਮਟਿਡ (NSDL) ਵਲੋਂ ਜਾਰੀ ਕੀਤੇ ਗਏ ਅੰਕੜਿਆਂ ਅਨੁਸਾਰ ਵਿਦੇਸ਼ੀ ਨਿਵੇਸ਼ਕਾਂ ਨੇ 23 ਜੂਨ ਤੋਂ 27 ਜੂਨ ਦੇ ਹਫ਼ਤੇ ਦੌਰਾਨ ਭਾਰਤੀ ਬਾਜ਼ਾਰਾਂ ਵਿਚ 13,107.54 ਕਰੋੜ ਰੁਪਏ ਦਾ ਸ਼ੁੱਧ ਨਿਵੇਸ਼ ਕੀਤਾ।

ਜੂਨ 'ਚ ਹੁਣ ਤੱਕ 8,915 ਕਰੋੜ ਦਾ ਨਿਵੇਸ਼

ਅੰਕੜਿਆਂ ਤੋਂ ਪਤਾ ਲੱਗਾ ਹੈ ਕਿ ਵਿਦੇਸ਼ੀ ਨਿਵੇਸ਼ਕਾਂ ਨੇ ਖ਼ਾਸ ਕਰ ਕੇ ਸੋਮਵਾਰ ਅਤੇ ਸ਼ੁੱਕਰਵਾਰ ਨੂੰ ਵੱਧ-ਚੜ੍ਹ ਕੇ ਬਾਜ਼ਾਰਾਂ ਵਿਚ ਪੈਸੇ ਲਾਏ। ਇਨ੍ਹਾਂ ਨਵੇਂ ਨਿਵੇਸ਼ਕਾਂ ਨਾਲ ਜੂਨ ਦੇ ਮਹੀਨੇ 'ਚ ਕੁੱਲ ਸ਼ੁੱਧ ਨਿਵੇਸ਼ ਹੁਣ 8,915 ਕਰੋੜ ਰੁਪਏ ਤੱਕ ਪਹੁੰਚ ਗਿਆ। 

ਪੱਛਮੀ ਏਸ਼ੀਆ 'ਚ ਹੋਈ ਜੰਗਬੰਦੀ ਨੇ ਬਾਜ਼ਾਰ ਨੂੰ ਦਿੱਤਾ ਸਹਾਰਾ

ਵਿਦੇਸ਼ੀ ਨਿਵੇਸ਼ਕਾਂ ਦੀਆਂ ਗਤੀਵਿਧੀਆਂ ਵਿਚ ਇਹ ਬਦਲਾਅ ਹਾਲ ਹੀ ਦੇ ਦਿਨਾਂ ਵਿਚ ਅਮਰੀਕਾ, ਈਰਾਨ ਅਤੇ ਇਜ਼ਰਾਈਲ ਨਾਲ ਸਬੰਧਤ ਭੂ-ਰਾਜਨੀਤਿਕ ਤਣਾਅ ਨੂੰ ਘਟਾਉਣ ਤੋਂ ਬਾਅਦ ਵਿਦੇਸ਼ੀ ਨਿਵੇਸ਼ਕ ਗਤੀਵਿਧੀਆਂ 'ਚ ਬਦਲਾਅ ਆਇਆ ਹੈ। ਵਿਸ਼ਵਵਿਆਪੀ ਭਾਵਨਾ ਵਿਚ ਸੁਧਾਰ ਨੇ ਨਿਵੇਸ਼ਕਾਂ ਨੂੰ ਭਾਰਤ ਵਰਗੇ ਉੱਭਰ ਰਹੇ ਬਾਜ਼ਾਰਾਂ ਨੂੰ ਵਧੇਰੇ ਅਨੁਕੂਲਤਾ ਨਾਲ ਦੇਖਣ ਲਈ ਉਤਸ਼ਾਹਿਤ ਕੀਤਾ ਹੈ। ਜੰਗਬੰਦੀ ਮਗਰੋਂ ਗਲੋਬਲ ਬਾਜ਼ਾਰ ਦੀ ਧਾਰਨਾ ਵਿਚ ਸੁਧਾਰ ਹੋਇਆ ਹੈ। 

ਵਿਆਜ ਦਰਾਂ ਵਿਚ ਕਟੌਤੀ

ਘਰੇਲੂ ਮੋਰਚੇ 'ਤੇ ਭਾਰਤੀ ਰਿਜ਼ਰਵ ਬੈਂਕ (RBI) ਨੇ ਹਾਲ ਹੀ ਵਿਚ ਆਪਣੀ ਨਵੀਨਤਮ ਮੁਦਰਾ ਨੀਤੀ ਕਮੇਟੀ (MPC) ਦੀ ਮੀਟਿੰਗ ਵਿਚ ਵਿਆਜ ਦਰਾਂ ਵਿਚ 50 ਅਧਾਰ ਅੰਕਾਂ ਦੀ ਕਟੌਤੀ ਕੀਤੀ ਹੈ, ਜਿਸਦਾ ਉਦੇਸ਼ ਆਰਥਿਕ ਵਿਕਾਸ ਨੂੰ ਵਧਾਉਣਾ ਹੈ। ਮੁਦਰਾ ਸਫੀਤੀ ਵੀ ਕੰਟਰੋਲ ਵਿਚ ਹੈ, ਜਿਸ ਨਾਲ ਨਿਵੇਸ਼ਕਾਂ ਦੀ ਭਰੋਸਾ ਵਧਿਆ ਹੈ। ਇਸ ਤੋਂ ਪਹਿਲਾਂ ਮਈ ਵਿਚ ਸ਼ੁੱਧ FPI ਪ੍ਰਵਾਹ ਸਕਾਰਾਤਮਕ ਰਿਹਾ ਅਤੇ 19,860 ਕਰੋੜ ਰਿਹਾ। ਇਸ ਨਾਲ ਮਈ ਵਿਦੇਸ਼ੀ ਨਿਵੇਸ਼ ਦੇ ਮਾਮਲੇ ਵਿਚ ਇਸ ਸਾਲ ਹੁਣ ਤੱਕ ਦਾ ਸਭ ਤੋਂ ਚੰਗਾ ਪ੍ਰਦਰਸ਼ਨ ਕਰਨ ਵਾਲਾ ਮਹੀਨਾ ਬਣ ਗਿਆ।