ਭਾਰਤੀ ਨਿਆਪਾਲਿਕਾ ਵਿਵਾਦ ਸੁਲਝਾਉਣ ਲਈ ਵਿਚੋਲਗੀ ਨੂੰ ਕਰਦੀ ਹੈ ਉਤਸ਼ਾਹਿਤ : ਚੀਫ ਜਸਟਿਸ ਸੂਰਿਆਕਾਂਤ

ਨਵੀਂ ਦਿੱਲੀ - ਲੰਡਨ ’ਚ ਭਾਰਤੀ ਹਾਈ ਕਮਿਸ਼ਨ ਵੱਲੋਂ ਆਯੋਜਿਤ ਵਿਚਾਰ-ਚਰਚਾ ਦੌਰਾਨ ਭਾਰਤ ਦੇ ਚੀਫ ਜਸਟਿਸ ਸੂਰਿਆਕਾਂਤ ਨੇ ਕਿਹਾ ਕਿ ਭਾਰਤੀ ਨਿਆਪਾਲਿਕਾ ਨੇ ਵਿਚੋਲਗੀ ਨੂੰ ਨਾ ਕੇਵਲ ਇਕ ਬਦਲ ਵਜੋਂ ਸਗੋਂ ਵਿਵਾਦ ਸੁਲਝਾਉਣ ਦੇ ਮਜ਼ਬੂਤ ਤਰੀਕੇ ਵਜੋਂ ਵੀ ਉਤਸ਼ਾਹਿਤ ਕੀਤਾ ਹੈ। ਜਸਟਿਸ ਸੂਰਿਆਕਾਂਤ ਨੇ ਵਿਚੋਲਗੀ ਨੂੰ ਆਪਣੇ ਦਿਲ ਦੇ ਬਹੁਤ ਨੇੜੇ ਦਸਦਿਆਂ ਕਿਹਾ ਕਿ ਸੁਪਰੀਮ ਕੋਰਟ ਕਾਨੂੰਨੀ ਸੇਵਾਵਾਂ ਕਮੇਟੀ (ਐੱਸ. ਸੀ. ਐੱਲ. ਐੱਸ. ਸੀ.) ਨੇ ਨਿਪੁੰਨ ਵਿਚੋਲਿਆਂ ਦੀ ਵੱਡੀ ਟੀਮ ਤਿਆਰ ਕੀਤੀ ਹੈ।

ਉਨ੍ਹਾਂ ਕਿਹਾ, ‘‘ਮੈਂ ਮਾਣ ਨਾਲ ਕਹਿ ਸਕਦਾ ਹਾਂ ਕਿ (ਭਾਰਤ ’ਚ) ਹਰ ਸ਼ਹਿਰ, ਗਲੀ-ਗਲੀ ’ਚ ਲੋਕ ਜਾਣਦੇ ਹਨ ਕਿ ਵਿਚੋਲਗੀ ਕੀ ਹੈ।’’ ਇਕ ਪ੍ਰੈੱਸ ਬਿਆਨ ਅਨੁਸਾਰ, ਲੰਡਨ ਸਥਿਤ ਹਾਈ ਕਮਿਸ਼ਨ ਨੇ ਬੁੱਧਵਾਰ ਨੂੰ ‘ਟੈਕਨਾਲੋਜੀ ਅਤੇ ਵਿਚੋਲਗੀ ਦਾ ਭਵਿੱਖ’ ਵਿਸ਼ੇ ’ਤੇ ਉੱਚ-ਪੱਧਰੀ ਵਿਚਾਰ-ਚਰਚਾ ਆਯੋਜਿਤ ਕੀਤੀ ਅਤੇ ਇਸ ’ਚ ਭਾਰਤ ਤੇ ਬ੍ਰਿਟੇਨ ਦੀ ਨਿਆਪਾਲਿਕਾ ਅਤੇ ਕਾਨੂੰਨੀ ਖੇਤਰ ਦੀਆਂ ਪ੍ਰਮੁੱਖ ਹਸਤੀਆਂ ਸ਼ਾਮਲ ਹੋਈਆਂ। ਚੀਫ ਜਸਟਿਸ ਤੋਂ ਇਲਾਵਾ ਇਸ ’ਚ ਬ੍ਰਿਟੇਨ ਦੇ ਸੁਪਰੀਮ ਕੋਰਟ ਦੇ ਜੱਜ ਲਾਰਡ ਹੈਮਬਲਨ ਆਫ ਕੇਰਸੀ, ਇੰਗਲੈਂਡ ਅਤੇ ਵੇਲਜ਼ ਬਾਰ ਕੌਂਸਲ ਦੀ ਪ੍ਰਧਾਨ ਕਿਰਸਟੀ ਬ੍ਰਿਮੇਲੋ ਕੇਸੀ ਅਤੇ ਇੰਗਲੈਂਡ ਅਤੇ ਵੇਲਜ਼ ਲਾਅ ਸੁਸਾਇਟੀ ਦੇ ਉਪ-ਪ੍ਰਧਾਨ ਬ੍ਰੈਟ ਡਿਕਸਨ ਸ਼ਾਮਲ ਹੋਏ।