ਕਿੰਨੀ ਜਾਇਦਾਦ ਛੱਡ ਗਏ ਹਨ ਸੀਤਾਰਾਮ ਯੇਚੁਰੀ, ਜਾਣੋ ਉਨ੍ਹਾਂ ਦੀ ਦੌਲਤ ਦਾ ਵੇਰਵਾ

ਨੈਸ਼ਨਲ ਡੈਸਕ - ਸੀ.ਪੀ.ਆਈ. (ਐਮ) ਦੇ ਜਨਰਲ ਸਕੱਤਰ ਸੀਤਾਰਾਮ ਯੇਚੁਰੀ ਦਾ 12 ਸਤੰਬਰ ਨੂੰ ਲੰਬੀ ਬਿਮਾਰੀ ਤੋਂ ਬਾਅਦ ਦਿਹਾਂਤ ਹੋ ਗਿਆ। ਪਿਛਲੇ ਕਈ ਦਿਨਾਂ ਤੋਂ ਸੀ.ਪੀ.ਆਈ. ਆਗੂ ਦਾ ਰਾਜਧਾਨੀ ਦਿੱਲੀ ਦੇ ਏਮਜ਼ ਹਸਪਤਾਲ ਵਿੱਚ ਇਲਾਜ ਚੱਲ ਰਿਹਾ ਸੀ। ਉਹ ਲੰਬੇ ਸਮੇਂ ਤੋਂ ਸਾਹ ਦੀ ਨਾਲੀ ਦੀ ਗੰਭੀਰ ਲਾਗ ਤੋਂ ਪੀੜਤ ਸਨ ਅਤੇ ਅੱਜ 72 ਸਾਲ ਦੇ ਸੀਨੀਅਰ ਨੇਤਾ ਸੀਤਾਰਾਮ ਯੇਚੁਰੀ ਨੇ ਆਖਰੀ ਸਾਹ ਲਿਆ ਅਤੇ ਦੁਨੀਆ ਨੂੰ ਅਲਵਿਦਾ ਕਹਿ ਦਿੱਤਾ। ਸੀਤਾਰਾਮ ਯੇਚੁਰੀ ਦੋ ਵਾਰ ਰਾਜ ਸਭਾ ਮੈਂਬਰ ਵੀ ਰਹੇ। ਕਈ ਦਹਾਕਿਆਂ ਤੱਕ ਫੈਲੇ ਸਿਆਸੀ ਕੈਰੀਅਰ ਵਿੱਚ, ਉਨ੍ਹਾਂ ਨੇ ਰਾਜ ਸਭਾ ਮੈਂਬਰ ਅਤੇ ਸੀ.ਪੀ.ਆਈ. (ਐਮ) ਦੇ ਜਨਰਲ ਸਕੱਤਰ ਦੇ ਅਹੁਦੇ ਸੰਭਾਲੇ। 

ਆਓ ਤੁਹਾਨੂੰ ਦੱਸਦੇ ਹਾਂ ਕਿ ਸੀਤਾਰਾਮ ਯੇਚੁਰੀ ਨੇ ਆਪਣੇ ਪਿੱਛੇ ਕਿੰਨੀ ਜਾਇਦਾਦ ਛੱਡੀ ਹੈ?
mynetainfo ਮੁਤਾਬਕ ਸੀਤਾਰਾਮ ਯੇਚੁਰੀ 2011 ਤੋਂ 2017 ਦਰਮਿਆਨ ਪੱਛਮੀ ਬੰਗਾਲ ਤੋਂ ਸੀ.ਪੀ.ਆਈ. ਦੇ ਰਾਜ ਸਭਾ ਮੈਂਬਰ ਸਨ। ਉਨ੍ਹਾਂ ਨੇ ਆਪਣੇ ਚੋਣ ਹਲਫਨਾਮੇ 'ਚ ਆਪਣੀ ਦੌਲਤ ਨਾਲ ਜੁੜੀ ਜਾਣਕਾਰੀ ਸਾਂਝੀ ਕੀਤੀ ਸੀ। ਸੀ.ਪੀ.ਆਈ. ਦੇ ਸੀਨੀਅਰ ਆਗੂ ਨੇ ਪੋਸਟ ਗ੍ਰੈਜੂਏਸ਼ਨ ਦੀ ਡਿਗਰੀ ਹਾਸਲ ਕੀਤੀ ਸੀ।

ਚੋਣ ਹਲਫ਼ਨਾਮੇ ਦੇ ਅਨੁਸਾਰ, ਉਨ੍ਹਾਂ ਦੀ ਕੁੱਲ ਜਾਇਦਾਦ 82,71,066 ਰੁਪਏ ਸੀ। ਉਸ ਸਮੇਂ ਉਨ੍ਹਾਂ ਨੇ ਦੱਸਿਆ ਸੀ ਕਿ ਉਨ੍ਹਾਂ ਦੇ ਆਂਧਰਾ ਬੈਂਕ ਖਾਤੇ ਵਿਚ ਕੁੱਲ 44 ਹਜ਼ਾਰ ਰੁਪਏ ਅਤੇ ਐੱਸ.ਬੀ.ਆਈ. ਖਾਤੇ ਵਿਚ 55 ਹਜ਼ਾਰ ਰੁਪਏ ਹਨ। ਜਦੋਂਕਿ ਉਨ੍ਹਾਂ ਦੀ ਪਤਨੀ ਸੀਮਾ ਚਿਸ਼ਤੀ ਕੋਲ 23 ਲੱਖ ਰੁਪਏ ਤੋਂ ਵੱਧ ਦੀ ਐਫ.ਡੀ. ਅਤੇ ਮਿਊਚਲ ਫੰਡ ਹੋਣ ਦੀ ਸੂਚਨਾ ਹੈ। ਉਨ੍ਹਾਂ ਦੀ ਪਤਨੀ ਦੇ ਖਾਤੇ 'ਚ 3 ਲੱਖ ਰੁਪਏ ਤੋਂ ਜ਼ਿਆਦਾ ਦੀ ਰਕਮ ਜਮ੍ਹਾਂ ਸੀ।

ਸੀਤਾਰਾਮ ਯੇਚੁਰੀ ਦੇ ਨਾਂ 'ਤੇ ਕੋਈ ਐਲ.ਆਈ.ਸੀ. ਜਾਂ ਬੀਮਾ ਪਾਲਿਸੀ ਨਹੀਂ ਸੀ ਜਦੋਂ ਕਿ ਉਨ੍ਹਾਂ ਦੀ ਪਤਨੀ ਦੇ ਨਾਂ 'ਤੇ 10-10 ਲੱਖ ਰੁਪਏ ਦੀਆਂ ਦੋ ਐਲ.ਆਈ.ਸੀ. ਸਨ। ਉਸ ਸਮੇਂ ਉਨ੍ਹਾਂ ਕੋਲ ਆਪਣੀ ਪਤਨੀ ਦੇ ਨਾਂ 'ਤੇ ਦੋ ਮਾਰੂਤੀ ਜ਼ੈਨ ਕਾਰਾਂ ਹੋਣ ਦੀ ਵੀ ਸੂਚਨਾ ਸੀ। ਇਸ ਤੋਂ ਇਲਾਵਾ ਚੋਣ ਹਲਫ਼ਨਾਮੇ ਵਿੱਚ ਇਹ ਵੀ ਖੁਲਾਸਾ ਹੋਇਆ ਸੀ ਕਿ ਉਨ੍ਹਾਂ ਦੀ ਪਤਨੀ ਕੋਲ ਉਸ ਸਮੇਂ 5 ਲੱਖ ਰੁਪਏ ਤੋਂ ਵੱਧ ਦੇ ਸੋਨੇ-ਚਾਂਦੀ ਦੇ ਗਹਿਣੇ ਸਨ।

ਸੀਤਾਰਾਮ ਯੇਚੁਰੀ ਦੇ ਨਾਂ 'ਤੇ ਖੁਦ ਕੋਈ ਜਾਇਦਾਦ ਨਹੀਂ ਹੈ। ਪਰ ਉਨ੍ਹਾਂ ਦੇ ਹਲਫਨਾਮੇ ਵਿਚ ਉਨ੍ਹਾਂ ਦੀ ਪਤਨੀ ਦੇ ਨਾਂ 'ਤੇ ਕਰੀਬ 20 ਲੱਖ ਰੁਪਏ ਦੀ ਜਾਇਦਾਦ ਦਿਖਾਈ ਗਈ। ਯੇਚੁਰੀ ਜੋੜੇ ਦੇ ਨਾਂ 'ਤੇ ਕਿਸੇ ਤਰ੍ਹਾਂ ਦਾ ਕੋਈ ਕਰਜ਼ਾ ਨਹੀਂ ਸੀ।