ਇਟਲੀ ਦੀ PM ਦਾ ਮਜ਼ਾਕ ਉਡਾਉਣਾ ਪਿਆ ਮਹਿੰਗਾ, ਅਦਾਲਤ ਨੇ ਠੋਕਿਆ ਮੋਟਾ ਜੁਰਮਾਨਾ

ਨਵੀਂ ਦਿੱਲੀ : ਇਟਲੀ ਦੀ ਪੀਐੱਮ ਜਾਰਜੀਆ ਮੇਲੋਨੀ ਨੂੰ ਲੈ ਕੇ ਭਾਰਤ 'ਚ ਕਈ ਤਰ੍ਹਾਂ ਦੇ ਮੀਮ ਅਕਸਰ ਸਾਹਮਣੇ ਆਉਂਦੇ ਹਨ। ਭਾਰਤੀ ਪ੍ਰਧਾਨ ਮੰਤਰੀ ਨਾਲ ਉਨ੍ਹਾਂ ਦੇ ਹਾਸੇ-ਮਜ਼ਾਕ ਭਰੇ ਅੰਦਾਜ਼ 'ਚ ਬਣੀਆਂ ਰੀਲਾਂ ਵੀ ਸੋਸ਼ਲ ਮੀਡੀਆ 'ਤੇ ਕਾਫੀ ਟ੍ਰੈਂਡ ਕਰ ਰਹੀਆਂ ਹਨ। ਜੇਕਰ ਤੁਸੀਂ ਵੀ ਅਜਿਹੀਆਂ ਰੀਲਾਂ ਬਣਾਉਂਦੇ ਹੋ ਤਾਂ ਥੋੜਾ ਸਾਵਧਾਨ ਹੋ ਜਾਓ। ਅਦਾਲਤ ਨੇ ਇਟਲੀ ਦੇ ਪ੍ਰਧਾਨ ਮੰਤਰੀ ਦਾ ਮਜ਼ਾਕ ਉਡਾਉਣ ਵਾਲੀ ਔਰਤ 'ਤੇ ਪੰਜ ਹਜ਼ਾਰ ਯੂਰੋ ਦਾ ਜੁਰਮਾਨਾ ਲਗਾਇਆ ਹੈ। ਭਾਰਤੀ ਮੁਦਰਾ ਵਿੱਚ ਇਹ ਰਕਮ ਲਗਭਗ 4.5 ਲੱਖ ਰੁਪਏ ਬਣਦੀ ਹੈ।

ਜਿਸ ਔਰਤ 'ਤੇ ਇਹ ਜੁਰਮਾਨਾ ਲਗਾਇਆ ਗਿਆ ਹੈ, ਉਹ ਮੂਲ ਰੂਪ ਤੋਂ ਇਟਲੀ ਦੀ ਰਹਿਣ ਵਾਲੀ ਹੈ ਅਤੇ ਪੇਸ਼ੇ ਤੋਂ ਪੱਤਰਕਾਰ ਹੈ। ਰਾਇਟਰਜ਼ ਦੀ ਰਿਪੋਰਟ ਦੇ ਅਨੁਸਾਰ, ਮਿਲਾਨ ਦੀ ਇੱਕ ਅਦਾਲਤ ਨੇ ਸੋਸ਼ਲ ਮੀਡੀਆ 'ਤੇ ਇਟਲੀ ਦੇ ਪ੍ਰਧਾਨ ਮੰਤਰੀ ਦਾ ਮਜ਼ਾਕ ਉਡਾਉਣ ਲਈ ਜਿਉਲੀਆ ਕੋਰਟੇਸ ਨਾਮ ਦੀ ਪੱਤਰਕਾਰ 'ਤੇ 5,000 ਯੂਰੋ ਦਾ ਜੁਰਮਾਨਾ ਲਗਾਇਆ ਹੈ। ਤਿੰਨ ਸਾਲ ਪਹਿਲਾਂ ਜਦੋਂ ਜਾਰਜੀਆ ਮੇਲੋਨੀ ਵਿਰੋਧੀ ਧਿਰ ਦੀ ਨੇਤਾ ਸੀ ਤਾਂ ਉਸ ਨੇ ਇਹ ਕੇਸ ਦਾਇਰ ਕੀਤਾ ਸੀ। ਪੱਤਰਕਾਰ ਕੋਰਟੇਸ ਨੇ ਫਿਰ ਸੋਸ਼ਲ ਮੀਡੀਆ 'ਤੇ ਇਕ ਫੋਟੋ ਸਾਂਝੀ ਕੀਤੀ, ਜਿਸ ਵਿਚ ਮੇਲੋਨੀ ਨੂੰ ਸਾਬਕਾ ਫਾਸ਼ੀਵਾਦੀ ਨੇਤਾ ਬੇਨੀਟੋ ਮੁਸੋਲਿਨੀ ਦੀ ਫੋਟੋ ਨਾਲ ਦਿਖਾਇਆ ਗਿਆ ਸੀ। ਮੇਲੋਨੀ ਨੇ ਇਸ ਤਸਵੀਰ ਨੂੰ ਫਰਜ਼ੀ ਕਰਾਰ ਦਿੱਤਾ ਸੀ। ਫੇਸਬੁੱਕ 'ਤੇ ਇਸ ਮੁੱਦੇ ਨੂੰ ਉਠਾਉਂਦੇ ਹੋਏ ਮੇਲੋਨੀ ਨੇ ਕਿਹਾ ਸੀ ਕਿ ਮੈਂ ਆਪਣੇ ਕਾਨੂੰਨੀ ਸਲਾਹਕਾਰ ਨੂੰ ਕੋਰਟੇਸ ਖਿਲਾਫ ਮਾਮਲਾ ਦਰਜ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ।

ਪੱਤਰਕਾਰ ਦੀ ਵਿਵਾਦਿਤ ਪੋਸਟ
ਇਸ ਫੇਸਬੁੱਕ ਪੋਸਟ ਦੇ ਜਵਾਬ ਵਿੱਚ, ਇਸ ਇਤਾਲਵੀ ਪੱਤਰਕਾਰ ਨੇ ਕਿਹਾ ਸੀ ਕਿ ਤੁਹਾਡੇ ਫੇਸਬੁੱਕ ਪੇਜ 'ਤੇ ਤੁਹਾਡੇ ਵੱਲੋਂ ਕੀਤੀ ਗਈ ਮੀਡੀਆ ਦੀ ਨਿੰਦਾ ਤੁਹਾਨੂੰ ਉਹੀ ਦੱਸਦੀ ਹੈ ਜੋ ਤੁਸੀਂ ਹੋ, ਇਕ ਛੋਟੀ ਮਹਿਲਾ। ਤੁਸੀਂ ਮੈਨੂੰ ਡਰਾਉਂਦੇ ਨਹੀਂ ਹੋ, ਜਾਰਜੀਆ ਮੇਲੋਨੀ। ਆਖ਼ਰਕਾਰ, ਤੁਸੀਂ ਸਿਰਫ਼ 1.2 ਮੀਟਰ (4 ਫੁੱਟ) ਲੰਬੇ ਹੋ। ਮੈਂ ਤੁਹਾਨੂੰ ਦੇਖ ਵੀ ਨਹੀਂ ਸਕਦੀ।