ਸਾਬਕਾ ਮੰਤਰੀ ''ਤੇ ਹਮਲੇ ਦੇ ਮਾਮਲੇ ''ਚ ਸਾਬਕਾ ਭਾਜਪਾ ਵਿਧਾਇਕ ਸਣੇ 26 ਲੋਕਾਂ ''ਤੇ ਪ੍ਰਤਾਪਗੜ੍ਹ ''ਚ ਕੇਸ ਦਰਜ

ਪ੍ਰਤਾਪਗੜ੍ਹ- ਉੱਤਰ ਪ੍ਰਦੇਸ਼ ਦੇ ਪ੍ਰਤਾਪਗੜ੍ਹ ਜ਼ਿਲ੍ਹੇ ਦੇ ਰਾਣੀਗੰਜ ਖੇਤਰ 'ਚ ਸਿਆਸੀ ਰੰਜਿਸ਼ ਕਾਰਨ ਸਾਬਕਾ ਮੰਤਰੀ ਸ਼ਿਵਾਕਾਂਤ ਓਝਾ ਅਤੇ ਉਨ੍ਹਾਂ ਦੇ ਸਮਰਥਕਾਂ ਨਾਲ ਕੁੱਟਮਾਰ ਕਰਨ ਅਤੇ ਕਾਰ ਦੀ ਭੰਨਤੋੜ ਕਰਨ ਦਾ ਗੰਭੀਰ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਸ ਨੇ ਇਸ ਸਬੰਧੀ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੇ ਸਾਬਕਾ ਵਿਧਾਇਕ ਅਭੈ ਕੁਮਾਰ ਉਰਫ਼ ਧੀਰਜ ਓਝਾ ਅਤੇ ਬਲਾਕ ਪ੍ਰਮੁੱਖ ਸਮੇਤ 6 ਨਾਮਜ਼ਦ ਅਤੇ 20 ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਮੁਕੱਦਮਾ ਦਰਜ ਕੀਤਾ ਹੈ।

ਪਿਸਤੌਲ ਨਾਲ ਕਾਰ 'ਤੇ ਹਮਲਾ ਅਤੇ ਕੁੱਟਮਾਰ 

ਪੁਲਸ ਨੂੰ ਦਿੱਤੀ ਸ਼ਿਕਾਇਤ 'ਚ ਰਾਣੀਗੰਜ ਦੇ ਨਿਵਾਸੀ ਲਾਲਮਣੀ ਤਿਵਾੜੀ ਨੇ ਦੱਸਿਆ ਕਿ ਇਹ ਘਟਨਾ 27 ਦਸੰਬਰ ਦੀ ਰਾਤ ਨੂੰ ਵਾਪਰੀ। ਉਸ ਸਮੇਂ ਉਹ ਸਾਬਕਾ ਮੰਤਰੀ ਸ਼ਿਵਾਕਾਂਤ ਓਝਾ ਅਤੇ ਉਨ੍ਹਾਂ ਦੇ ਪੁੱਤਰ ਪੂਰਣਾਂਸ਼ੂ ਓਝਾ (ਸਾਬਕਾ ਬਲਾਕ ਪ੍ਰਮੁੱਖ) ਨਾਲ ਰਿਹਾਇਸ਼ ਵੱਲ ਪਰਤ ਰਹੇ ਸਨ। ਦੋਸ਼ ਹੈ ਕਿ ਰਾਣੀਗੰਜ ਰੇਲਵੇ ਕਰਾਸਿੰਗ ਨੇੜੇ ਸਾਬਕਾ ਵਿਧਾਇਕ ਅਭੈ ਕੁਮਾਰ, ਉਨ੍ਹਾਂ ਦੇ ਭਤੀਜੇ ਸਤਯਮ ਓਝਾ (ਬਲਾਕ ਪ੍ਰਮੁੱਖ), ਭਰਾ ਨੀਰਜ ਓਝਾ ਅਤੇ ਹੋਰ ਸਾਥੀਆਂ ਨੇ ਉਨ੍ਹਾਂ ਦਾ ਰਸਤਾ ਰੋਕ ਲਿਆ। ਸ਼ਿਕਾਇਤ ਅਨੁਸਾਰ, ਮੁਲਜ਼ਮਾਂ ਨੇ ਗਾਲੀ-ਗਲੋਚ ਕਰਦਿਆਂ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੱਤੀਆਂ ਅਤੇ ਸਾਬਕਾ ਵਿਧਾਇਕ ਨੇ ਪਿਸਤੌਲ ਦੇ ਬੱਟ ਨਾਲ ਕਾਰ ਦੇ ਸ਼ੀਸ਼ੇ ਤੋੜ ਦਿੱਤੇ। ਇਸ ਤੋਂ ਬਾਅਦ ਸਮਰਥਕਾਂ ਨੂੰ ਕਾਰ 'ਚੋਂ ਕੱਢ ਕੇ ਬੇਰਹਿਮੀ ਨਾਲ ਕੁੱਟਿਆ ਗਿਆ। ਜਦੋਂ ਸਰਕਾਰੀ ਗਨਰ ਰਵੀ ਸਿੰਘ ਨੇ ਬਚਾਅ ਕਰਨ ਦੀ ਕੋਸ਼ਿਸ਼ ਕੀਤੀ, ਤਾਂ ਉਸ ਨੂੰ ਵੀ ਜਾਨੋਂ ਮਾਰਨ ਦੀ ਧਮਕੀ ਦਿੱਤੀ ਗਈ।

ਪੁਲਸ ਕਾਰਵਾਈ 

ਪੁਲਸ ਸੂਤਰਾਂ ਮੁਤਾਬਕ, ਤਹਿਰੀਰ ਦੇ ਆਧਾਰ 'ਤੇ ਅਭੈ ਕੁਮਾਰ ਓਝਾ, ਸਤਯਮ ਓਝਾ, ਨੀਰਜ ਓਝਾ ਅਤੇ ਉਨ੍ਹਾਂ ਦੇ ਸਾਥੀਆਂ ਸਮੇਤ ਕੁੱਲ 26 ਮੁਲਜ਼ਮਾਂ ਵਿਰੁੱਧ ਸੋਮਵਾਰ ਰਾਤ ਨੂੰ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਪੁਲਸ ਵੱਲੋਂ ਇਸ ਪੂਰੀ ਘਟਨਾ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e