ਕੰਮ ਵੀ ਨਹੀਂ ਦੇਖਿਆ, ਸਿੱਧਾ ਨੌਕਰੀ ਤੋਂ ਦੇ'ਤਾ ਜਵਾਬ ! Oracle ਦੀ ਛਾਂਟੀ ਤੋਂ ਬਾਅਦ ਸਦਮੇ 'ਚ ਮੁਲਾਜ਼ਮ

ਨੈਸ਼ਨਲ ਡੈਸਕ: ਟੈਕਨਾਲੋਜੀ ਦਿੱਗਜ ਓਰੇਕਲ ਕਾਰਪੋਰੇਸ਼ਨ (Oracle Corporation) ਨੇ ਬੀਤੇ ਦਿਨ ਵਿਸ਼ਵ ਪੱਧਰ 'ਤੇ ਆਪਣੇ ਲਗਭਗ 30,000 ਕਰਮਚਾਰੀਆਂ ਨੂੰ ਬਿਨਾਂ ਕਿਸੇ ਚਿਤਾਵਨੀ ਦੇ ਨੌਕਰੀ ਤੋਂ ਕੱਢ ਦਿੱਤਾ ਹੈ। ਇਹ ਕਟੌਤੀ ਕੰਪਨੀ ਦੇ ਕੁੱਲ ਗਲੋਬਲ ਵਰਕਫੋਰਸ ਦਾ ਲਗਭਗ 18 ਫੀਸਦੀ ਹੈ। ਜਾਣਕਾਰੀ ਅਨੁਸਾਰ ਮੰਗਲਵਾਰ ਸਵੇਰੇ ਕਰੀਬ 6 ਵਜੇ ਮੁਲਾਜ਼ਮਾਂ ਨੂੰ ਅਚਾਨਕ ਈਮੇਲ ਭੇਜ ਕੇ ਉਨ੍ਹਾਂ ਦੀ ਨੌਕਰੀ ਖਤਮ ਹੋਣ ਬਾਰੇ ਦੱਸਿਆ ਗਿਆ, ਜਿਸ ਨਾਲ ਹਜ਼ਾਰਾਂ ਕਰਮਚਾਰੀ ਸਦਮੇ ਵਿੱਚ ਹਨ।

ਭਾਰਤ 'ਚ ਗੰਭੀਰ ਅਸਰ
ਭਾਰਤ ਦੇ ਪੁਣੇ ਤੇ ਹੈਦਰਾਬਾਦ ਵਰਗੇ ਸ਼ਹਿਰਾਂ 'ਚ ਇਸ ਛਾਂਟੀ ਦਾ ਡੂੰਘਾ ਅਸਰ ਪਿਆ ਹੈ। ਮੁਲਾਜ਼ਮਾਂ ਨੇ ਦੱਸਿਆ ਕਿ ਜਦੋਂ ਉਹ ਰੋਜ਼ਾਨਾ ਵਾਂਗ ਕੰਮ ਲਈ ਦਫ਼ਤਰ ਪਹੁੰਚੇ ਜਾਂ ਲੌਗ-ਇਨ ਕੀਤਾ, ਤਾਂ ਉਨ੍ਹਾਂ ਦਾ ਸਿਸਟਮ ਐਕਸੈਸ ਬੰਦ ਹੋ ਚੁੱਕਾ ਸੀ। ਪੁਣੇ ਦੇ ਇੱਕ ਸੀਨੀਅਰ ਇੰਜੀਨੀਅਰ, ਜੋ 12 ਸਾਲਾਂ ਤੋਂ ਕੰਪਨੀ ਨਾਲ ਜੁੜੇ ਹੋਏ ਸਨ, ਨੇ ਦੱਸਿਆ ਕਿ ਸੀਨੀਅਰ ਅਹੁਦੇ 'ਤੇ ਹੋਣ ਦੇ ਬਾਵਜੂਦ ਉਨ੍ਹਾਂ ਨੂੰ ਕੋਈ ਸੂਚਨਾ ਨਹੀਂ ਦਿੱਤੀ ਗਈ ਅਤੇ ਸਿੱਧਾ ਈਮੇਲ ਭੇਜ ਦਿੱਤਾ ਗਿਆ। ਕੰਪਨੀ ਨੇ ਓਰੇਕਲ ਹੈਲਥ, ਸੇਲਜ਼, ਕਲਾਊਡ ਅਤੇ ਨੈੱਟਸੂਟ ਵਰਗੇ ਕਈ ਅਹਿਮ ਵਿਭਾਗਾਂ ਵਿੱਚ ਇਹ ਕਟੌਤੀ ਕੀਤੀ ਹੈ।

ਕਾਰਗੁਜ਼ਾਰੀ ਨੂੰ ਵੀ ਕੀਤਾ ਅਣਗੌਲਿਆ 
 ਮੁਲਾਜ਼ਮਾਂ ਨੇ ਸ਼ਿਕਾਇਤ ਕੀਤੀ ਹੈ ਕਿ ਕੰਪਨੀ ਨੇ ਕਿਸੇ ਦੀ ਪਰਫਾਰਮੈਂਸ ਵੀ ਨਹੀਂ ਦੇਖੀ ਅਤੇ ਬੱਸ ਸਿੱਧਾ ਬਾਹਰ ਦਾ ਰਸਤਾ ਦਿਖਾ ਦਿੱਤਾ। ਹੈਦਰਾਬਾਦ ਦੇ ਇੱਕ ਇੰਜੀਨੀਅਰ ਨੇ ਦੱਸਿਆ ਕਿ 10 ਸਾਲ ਦੀ ਸਰਵਿਸ ਅਤੇ ਚੰਗੇ ਪ੍ਰਦਰਸ਼ਨ ਦੇ ਬਾਵਜੂਦ ਉਨ੍ਹਾਂ ਨੂੰ ਕੱਢ ਦਿੱਤਾ ਗਿਆ। ਕਈ ਮੁਲਾਜ਼ਮਾਂ ਨੂੰ ਹੁਣ ਆਪਣੇ ਹੋਮ ਲੋਨ ਦੀਆਂ ਕਿਸ਼ਤਾਂ ਅਤੇ ਬੱਚਿਆਂ ਦੀ ਸਕੂਲ ਫੀਸ ਭਰਨ ਦੀ ਚਿੰਤਾ ਸਤਾ ਰਹੀ ਹੈ।

ਕੰਪਨੀ ਵੱਲੋਂ ਮੁਆਵਜ਼ੇ ਦੀ ਪੇਸ਼ਕਸ਼
 ਹਾਲਾਂਕਿ ਕੰਪਨੀ ਨੇ ਸੇਵਰੈਂਸ ਪੈਕੇਜ ਦੇ ਤੌਰ 'ਤੇ ਚਾਲੂ ਮਹੀਨੇ ਦੀ ਤਨਖਾਹ, ਦੋ ਮਹੀਨਿਆਂ ਦੀ ਵਾਧੂ ਸੈਲਰੀ ਅਤੇ ਬਚੀਆਂ ਹੋਈਆਂ ਛੁੱਟੀਆਂ ਦਾ ਭੁਗਤਾਨ ਕਰਨ ਦੀ ਪੇਸ਼ਕਸ਼ ਕੀਤੀ ਹੈ।

ਛਾਂਟੀ ਦੇ ਮੁੱਖ ਕਾਰਨ 
ਮਾਹਿਰਾਂ ਅਨੁਸਾਰ ਇਸ ਵੱਡੀ ਛਾਂਟੀ ਦੇ ਪਿੱਛੇ ਵਿਸ਼ਵਵਿਆਪੀ ਆਰਥਿਕ ਅਨਿਸ਼ਚਿਤਤਾ, ਭੂ-ਰਾਜਨੀਤਿਕ ਤਣਾਅ ਅਤੇ ਤੇਜ਼ੀ ਨਾਲ ਵਧ ਰਹੀ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੀ ਵਰਤੋਂ ਮੁੱਖ ਕਾਰਨ ਹਨ। ਕੰਪਨੀ ਦੇ ਅਧਿਕਾਰੀਆਂ ਨੇ ਸੰਕੇਤ ਦਿੱਤਾ ਹੈ ਕਿ ਇਹ ਪਿਛਲੇ ਇੱਕ ਦਹਾਕੇ ਦੀ ਸਭ ਤੋਂ ਵੱਡੀ ਛਾਂਟੀ ਹੋ ਸਕਦੀ ਹੈ, ਪਰ ਉਮੀਦ ਜਤਾਈ ਹੈ ਕਿ ਵਿੱਤੀ ਸਾਲ 2026-27 ਵਿੱਚ ਨਵੇਂ ਮੌਕੇ ਪੈਦਾ ਹੋ ਸਕਦੇ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e