ਵਿਆਹੁਤਾ ਵਿਵਾਦਾਂ ’ਚ ਝੂਠੇ ਮਾਮਲਿਆਂ ਪ੍ਰਤੀ ਚੌਕਸ ਰਹਿਣ ਅਦਾਲਤਾਂ : ਸੁਪਰੀਮ ਕੋਰਟ

ਨਵੀਂ ਦਿੱਲੀ- ਸੁਪਰੀਮ ਕੋਰਟ ਨੇ ਵਿਆਹੁਤਾ ਵਿਵਾਦਾਂ ਤੇ ਵਪਾਰਕ ਝਗੜਿਆਂ ’ਚ ਸ਼ਾਮਲ ਧਿਰਾਂ ਵੱਲੋਂ ਨਿੱਜੀ ਰੰਜਿਸ਼ਾਂ ਦਾ ਨਿਪਟਾਰਾ ਕਰਨ ਲਈ ਫਜ਼ੂਲ ਤੇ ਪਰੇਸ਼ਾਨ ਕਰਨ ਵਾਲੇ ਝੂਠੇ ਅਪਰਾਧਿਕ ਮਾਮਲੇ ਦਰਜ ਕਰਵਾਉਣ ਦੇ ਵਧਦੇ ਰੁਝਾਨ ’ਤੇ ਸ਼ੁੱਕਰਵਾਰ ਚਿੰਤਾ ਪ੍ਰਗਟ ਕੀਤੀ।

ਸੁਪਰੀਮ ਕੋਰਟ ਨੇ ਕਿਹਾ ਕਿ ਅਦਾਲਤਾਂ ਨੂੰ ਅਜਿਹੇ ਮਾਮਲਿਆਂ ਪ੍ਰਤੀ ਚੌਕਸ ਰਹਿਣਾ ਚਾਹੀਦਾ ਹੈ ਅਤੇ ਉਨ੍ਹਾਂ ਦੀ ਧਿਆਨ ਨਾਲ ਜਾਂਚ ਕਰਨੀ ਚਾਹੀਦੀ ਹੈ। ਜਸਟਿਸ ਬੀ. ਵੀ. ਨਾਗਰਥਨਾ ਤੇ ਉੱਜਲ ਭੂਈਆਂ ਦੇ ਬੈਂਚ ਨੇ ਇਹ ਟਿੱਪਣੀ ਬਿਨਾਂ ਕਿਸੇ ਠੋਸ ਆਧਾਰ ਦੇ ਝੂਠੇ ਮਾਮਲੇ ਦਰਜ ਕਰਨ ਦੇ ਵਧ ਰਹੇ ਰੁਝਾਨ ’ਤੇ ਇਕ ਫੈਸਲੇ ’ਚ ਕੀਤੀ।

50 ਪੰਨਿਆਂ ਦੇ ਫੈਸਲੇ ਨੂੰ ਲਿਖਣ ਵਾਲੇ ਜਸਟਿਸ ਨਾਗਰਥਨਾ ਨੇ ਕਿਹਾ ਕਿ ਅਸੀਂ ਇਕ ਚਿੰਤਾਜਨਕ ਰੁਝਾਨ ਵੱਲ ਧਿਆਨ ਖਿੱਚਣਾ ਚਾਹੁੰਦੇ ਹਾਂ ਜੋ ਸਾਡੇ ਧਿਆਨ ’ਚ ਆਇਆ ਹੈ। ਇਸ ’ਚ ਕਿਹਾ ਗਿਆ ਹੈ ਕਿ ਪਤੀ-ਪਤਨੀ ਦਰਮਿਆਨ ਅਜਿਹੇ ਅਸਪਸ਼ਟ ਤੇ ਪਰੇਸ਼ਾਨ ਕਰਨ ਵਾਲੇ ਝਗੜਿਆਂ ਕਾਰਨ ਅਦਾਲਤਾਂ ਦੀ ਦੁਰਵਰਤੋਂ ਹੋ ਰਹੀ ਹੈ ਕਿਉਂਕਿ ਕਈ ਵਾਰ ਬਦਲਾ ਲੈਣ ਲਈ ਕਾਨੂੰਨ ਤੇ ਪੁਲਸ ਦਾ ਸਹਾਰਾ ਅਸਿੱਧੇ ਜਾਂ ਗਲਤ ਤਰੀਕੇ ਨਾਲ ਦੂਜੇ ਜੀਵਨ ਸਾਥੀ ਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੂੰ ਪਰੇਸ਼ਾਨ ਕਰਨ, ਦਬਾਅ ਪਾਉਣ ਤੇ ਤਸੀਹੇ ਦੇਣ ਲਈ ਲਿਆ ਜਾਂਦਾ ਹੈ।