ਪੰਜਾਬ ’ਚ ਆਪਣੇ ਜ਼ੋਰ ’ਤੇ ਅੱਗੇ ਵਧਣਾ ਚਾਹੁੰਦੀ ਹੈ ਭਾਜਪਾ

ਨੈਸ਼ਨਲ ਡੈਸਕ- ਭਾਜਪਾ ਦੀ ਪੰਜਾਬ ਇਕਾਈ ਦੇ ਸੀਨੀਅਰ ਆਗੂ ਅਕਾਲੀ ਦਲ ਨਾਲ ਸੰਭਾਵੀ ਗੱਠਜੋੜ ’ਤੇ ਸਪੱਸ਼ਟਤਾ ਦੀ ਉਮੀਦ ਨਾਲ ਕੁਝ ਦਿਨ ਪਹਿਲਾਂ ਦਿੱਲੀ ਪਹੁੰਚੇ ਸਨ ਪਰ ਉਨ੍ਹਾਂ ਨੂੰ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦਾ ਸਪੱਸ਼ਟ ਸੰਦੇਸ਼ ਮਿਲਿਆ : ਭਾਜਪਾ ਦਾ ਕੰਮ ਕਿਸੇ ਨੂੰ ‘ਸੰਜੀਵਨੀ’ ਦੇਣਾ ਨਹੀਂ ਹੈ। ਕੂਟਨੀਤਕ ਲਾਗ-ਲਪੇਟ ਤੋਂ ਬਿਨਾਂ ਆਪਣੀ ਗੱਲ ਖੁੱਲ੍ਹ ਕੇ ਕਹਿਣ ਵਾਲੇ ਸ਼ਾਹ ਨੇ ਕਥਿਤ ਤੌਰ ’ਤੇ 2027 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਪੁਰਾਣੀ ਭਾਜਪਾ-ਅਕਾਲੀ ਭਾਈਵਾਲੀ ਨੂੰ ਸੁਰਜੀਤ ਕਰਨ ਦੀਆਂ ਅਟਕਲਾਂ ਨੂੰ ਖਾਰਿਜ ਕਰ ਦਿੱਤਾ। ਜਦੋਂ ਪਾਰਟੀ ਆਗੂਆਂ ਨੇ ਗੱਠਜੋੜ ਦਾ ਸਵਾਲ ਉਠਾਇਆ ਤਾਂ ਅਮਿਤ ਸ਼ਾਹ ਦਾ ਜਵਾਬ ਸੰਖੇਪ ਅਤੇ ਸਪੱਸ਼ਟ ਸੀ : ਸਾਰੀਆਂ 117 ਸੀਟਾਂ ’ਤੇ ਚੋਣ ਲੜਨ ਲਈ ਤਿਆਰ ਰਹੋ।

ਉਨ੍ਹਾਂ ਦੀਆਂ ਟਿੱਪਣੀਆਂ ਤੋਂ ਇਸ ਗੱਲ ਦੀ ਪੁਸ਼ਟੀ ਵੀ ਹੁੰਦੀ ਹੈ ਕਿ ਪੰਜਾਬ ਅਮਿਤ ਸ਼ਾਹ ਦੇ ਸਿਆਸੀ ਏਜੰਡੇ ਵਿਚ ਸਭ ਤੋਂ ਉੱਪਰ ਆ ਗਿਆ ਹੈ। ਪੱਛਮੀ ਬੰਗਾਲ ਵਿਚ ਜਿੱਤ ਤੋਂ ਬਾਅਦ, ਭਾਜਪਾ ਦੇ ਇਸ ਕੁਸ਼ਲ ਰਣਨੀਤੀਕਾਰ ਦਾ ਧਿਆਨ ਹੁਣ ਉਸ ਸੂਬੇ ਵੱਲ ਹੈ ਜਿੱਥੇ ਪਾਰਟੀ ਦੀ ਸੁਤੰਤਰ ਮੌਜੂਦਗੀ ਇਤਿਹਾਸਕ ਤੌਰ ’ਤੇ ਗਾਇਬ ਰਹੀ ਹੈ।

ਦਹਾਕਿਆਂ ਤੱਕ ਭਾਜਪਾ ਅਕਾਲੀ ਦਲ ਦੀ ਸਹਿਯੋਗੀ ਰਹੀ। ਉਹ ਦੌਰ ਹੁਣ ਖ਼ਤਮ ਹੋ ਗਿਆ ਹੈ। ਰਾਜਧਾਨੀ ਵਿਚ ਭਾਜਪਾ ਪ੍ਰਧਾਨ ਨਿਤਿਨ ਨਬੀਨ ਸਮੇਤ ਸੀਨੀਅਰ ਕੇਂਦਰੀ ਆਗੂਆਂ ਦੀ ਮੌਜੂਦਗੀ ਵਿਚ ਹੋਈ ਇਕ ਲੰਮੀ ਰਣਨੀਤਕ ਬੈਠਕ ਵਿਚ ਸ਼ਾਹ ਨੇ ਇਕ ਅਭਿਲਾਸ਼ੀ ਕਾਰਜਯੋਜਨਾ ਪੇਸ਼ ਕੀਤੀ। ਤਤਕਾਲੀ ਟੀਚਾ 2024 ਦੇ ਪਾਰਟੀ ਦੇ ਵੋਟ ਸ਼ੇਅਰ 19 ਫ਼ੀਸਦੀ ਨੂੰ ਵਧਾ ਕੇ 28-30 ਫ਼ੀਸਦੀ ਕਰਨਾ ਹੈ। ਇਹ ਮਾਮੂਲੀ ਵਾਧਾ ਨਹੀਂ, ਸਗੋਂ ਸਿਆਸੀ ਖੇਤਰ ਵਿਚ ਇਕ ਬੇਮਿਸਾਲ ਤਰੱਕੀ ਹੋਵੇਗੀ। ਸਹਿਯੋਗੀ ਪਾਰਟੀਆਂ ਲਈ ਅਨੁਕੂਲ ਸਮੇਂ ਦਾ ਦੌਰ ਹੁਣ ਖ਼ਤਮ ਹੋ ਰਿਹਾ ਹੈ। ਪੰਜਾਬ ਵਿਚ ਭਾਜਪਾ ਆਪਣੇ ਜ਼ੋਰ ’ਤੇ ਅੱਗੇ ਵਧਣਾ ਚਾਹੁੰਦੀ ਹੈ।