ਮੁਲਾਜ਼ਮਾਂ ਲਈ ਵੱਡੀ ਖ਼ਬਰ! 8ਵੇਂ ਤਨਖਾਹ ਕਮਿਸ਼ਨ ਦੇ ''ToR'' ਤੈਅ, ਮਿਲੇਗਾ ਬੰਪਰ ਏਰੀਅਰ

ਵੈੱਬ ਡੈਸਕ : ਕੇਂਦਰੀ ਕਰਮਚਾਰੀਆਂ ਲਈ 8ਵੇਂ ਤਨਖਾਹ ਕਮਿਸ਼ਨ (8th Pay Commission) ਨੂੰ ਲੈ ਕੇ ਇੱਕ ਵੱਡਾ ਅਪਡੇਟ ਆਇਆ ਹੈ। 7ਵੇਂ ਕੇਂਦਰੀ ਤਨਖਾਹ ਕਮਿਸ਼ਨ ਦਾ 10 ਸਾਲਾਂ ਦਾ ਕਾਰਜਕਾਲ 31 ਦਸੰਬਰ 2025 ਨੂੰ ਖਤਮ ਹੋ ਰਿਹਾ ਹੈ, ਜਿਸ ਤੋਂ ਬਾਅਦ ਸਾਰਿਆਂ ਦੀਆਂ ਨਜ਼ਰਾਂ 8ਵੇਂ ਕਮਿਸ਼ਨ 'ਤੇ ਟਿਕੀਆਂ ਹੋਈਆਂ ਹਨ।

ਕਮਿਸ਼ਨ ਦੀ ਮੌਜੂਦਾ ਸਥਿਤੀ: ਸਰਕਾਰ ਨੇ 8ਵੇਂ ਤਨਖਾਹ ਕਮਿਸ਼ਨ ਨੂੰ ਨੋਟੀਫਾਈ ਕਰ ਦਿੱਤਾ ਹੈ ਅਤੇ ਇਸਦੇ 'ਟਰਮ ਆਫ਼ ਰੈਫਰੈਂਸ' (ToR) ਨੂੰ ਮਨਜ਼ੂਰੀ ਮਿਲ ਚੁੱਕੀ ਹੈ। ਜਸਟਿਸ ਰੰਜਨਾ ਦੇਸਾਈ ਦੀ ਪ੍ਰਧਾਨਗੀ ਹੇਠ ਕਮਿਸ਼ਨ ਨੇ ਕੰਮ ਸ਼ੁਰੂ ਕਰ ਦਿੱਤਾ ਹੈ ਅਤੇ ਇਸਨੂੰ ਰਿਪੋਰਟ ਸੌਂਪਣ ਲਈ ਲਗਭਗ 18 ਮਹੀਨਿਆਂ ਦਾ ਸਮਾਂ ਦਿੱਤਾ ਗਿਆ ਹੈ।

ਲਾਗੂ ਹੋਣ ਦੀ ਸੰਭਾਵਿਤ ਤਾਰੀਖ ਅਤੇ ਏਰੀਅਰ
ਪਿਛਲੇ ਕਮਿਸ਼ਨਾਂ ਦੇ ਰੁਝਾਨਾਂ ਦੇ ਆਧਾਰ 'ਤੇ, ਇਹ ਮੰਨਿਆ ਜਾ ਰਿਹਾ ਹੈ ਕਿ 8ਵਾਂ ਤਨਖਾਹ ਕਮਿਸ਼ਨ ਜਨਵਰੀ 2026 ਦੀ ਬਜਾਏ 2027 ਦੇ ਅੰਤ ਜਾਂ 2028 ਦੀ ਸ਼ੁਰੂਆਤ ਵਿੱਚ ਲਾਗੂ ਹੋ ਸਕਦਾ ਹੈ। ਹਾਲਾਂਕਿ, ਇਸਦੀ ਅਧਿਕਾਰਤ ਤਾਰੀਖ ਅਜੇ ਤੈਅ ਨਹੀਂ ਹੋਈ ਹੈ। ਜੇਕਰ 8ਵਾਂ ਤਨਖਾਹ ਕਮਿਸ਼ਨ ਜਨਵਰੀ 2028 ਵਿੱਚ ਲਾਗੂ ਹੁੰਦਾ ਹੈ, ਪਰ ਇਸਦਾ ਪ੍ਰਭਾਵ ਜਨਵਰੀ 2026 ਤੋਂ ਦਿੱਤਾ ਜਾਂਦਾ ਹੈ ਤਾਂ ਕਰਮਚਾਰੀਆਂ ਨੂੰ 24 ਮਹੀਨਿਆਂ ਦਾ ਏਰੀਅਰ (Arrears) ਮਿਲੇਗਾ। ਇਹ ਏਰੀਅਰ ਕਰਮਚਾਰੀਆਂ ਲਈ ਇੱਕ ਵੱਡੀ ਰਾਹਤ ਹੋਵੇਗਾ।

ਤਨਖਾਹ ਵਿੱਚ ਕਿੰਨਾ ਵਾਧਾ?
ਮਾਹਿਰਾਂ ਦੇ ਅਨੁਮਾਨ ਮੁਤਾਬਕ, 8ਵੇਂ ਤਨਖਾਹ ਕਮਿਸ਼ਨ ਤਹਿਤ ਤਨਖਾਹ ਅਤੇ ਪੈਨਸ਼ਨ ਵਿੱਚ ਲਗਭਗ 30 ਤੋਂ 34 ਫੀਸਦੀ ਤੱਕ ਦਾ ਵਾਧਾ ਹੋਣ ਦੀ ਉਮੀਦ ਹੈ। ਇਹ ਵਾਧਾ ਫਿਟਮੈਂਟ ਫੈਕਟਰ ਦੇ ਆਧਾਰ 'ਤੇ ਹੋਵੇਗਾ, ਜਿਸਦਾ ਅਨੁਮਾਨ 2.28 ਦੇ ਆਸਪਾਸ ਲਗਾਇਆ ਜਾ ਰਿਹਾ ਹੈ। 

ਘੱਟ ਤਨਖਾਹ ਲੈਣ ਵਾਲੇ ਕਰਮਚਾਰੀ ਨੂੰ ਫਾਇਦਾ
ਜੇਕਰ ਲੈਵਲ-1 ਕਰਮਚਾਰੀ ਦੀ ਮੌਜੂਦਾ ਮੂਲ ਤਨਖਾਹ 18,000 ਰੁਪਏ ਹੈ, ਤਾਂ 34 ਫੀਸਦੀ ਵਾਧੇ ਤੋਂ ਬਾਅਦ ਨਵੀਂ ਗ੍ਰਾਸ ਸੈਲਰੀ ਲਗਭਗ 46,900 ਰੁਪਏ ਹੋ ਜਾਵੇਗੀ। ਇਸ ਤਰ੍ਹਾਂ, ਹਰ ਮਹੀਨੇ ਲਗਭਗ 11,900 ਰੁਪਏ ਦਾ ਵਾਧਾ ਹੋਵੇਗਾ। ਜੇ 2028 ਵਿੱਚ ਲਾਗੂ ਹੋਣ ਦੇ ਬਾਵਜੂਦ 24 ਮਹੀਨਿਆਂ ਦਾ ਏਰੀਅਰ ਮਿਲਦਾ ਹੈ ਤਾਂ ਇਸ ਕਰਮਚਾਰੀ ਲਈ ਕੁੱਲ ਅਨੁਮਾਨਿਤ ਏਰੀਅਰ ਲਗਭਗ 2.85 ਲੱਖ ਰੁਪਏ ਹੋਵੇਗਾ। ਉੱਚ ਪੱਧਰੀ ਕਰਮਚਾਰੀਆਂ ਅਤੇ ਅਧਿਕਾਰੀਆਂ ਲਈ ਇਹ ਰਾਸ਼ੀ ਇਸ ਤੋਂ ਕਿਤੇ ਜ਼ਿਆਦਾ ਹੋ ਸਕਦੀ ਹੈ।

ਕਮਿਸ਼ਨ ਇਨ੍ਹਾਂ ਮੁੱਦਿਆਂ 'ਤੇ ਵੀ ਕਰੇਗਾ ਸਮੀਖਿਆ
8ਵਾਂ ਤਨਖਾਹ ਕਮਿਸ਼ਨ ਸਿਰਫ਼ ਮੂਲ ਤਨਖਾਹ ਤੱਕ ਸੀਮਤ ਨਹੀਂ ਰਹੇਗਾ। ਇਸ ਵਿੱਚ HRA (ਮਕਾਨ ਕਿਰਾਇਆ ਭੱਤਾ) ਅਤੇ ਟਰਾਂਸਪੋਰਟ ਅਲਾਉਂਸ, ਪੈਨਸ਼ਨ ਅਤੇ ਮਹਿੰਗਾਈ ਰਾਹਤ, ਗ੍ਰੈਚੂਇਟੀ ਅਤੇ ਰਿਟਾਇਰਮੈਂਟ ਲਾਭ ਦੇ ਨਾਲ-ਨਾਲ ਤਨਖਾਹ ਸਮਾਨਤਾ ਅਤੇ ਪ੍ਰੋਤਸਾਹਨ ਢਾਂਚੇ (incentive structure) ਵਰਗੇ ਅਹਿਮ ਮੁੱਦਿਆਂ 'ਤੇ ਵੀ ਫੈਸਲਾ ਲਿਆ ਜਾਵੇਗਾ।