ਭਲਕੇ ਹਵਾਈ ਫ਼ੌਜ ਦੀ ਸ਼ਾਨ ਬਣਨਗੇ ''ਰਾਫ਼ੇਲ'', ਭਾਰਤ ਆਵੇਗੀ ਫਰਾਂਸ ਦੀ ਰੱਖਿਆ ਮੰਤਰੀ

ਨੈਸ਼ਨਲ ਡੈਸਕ— 10 ਸਤੰਬਰ ਯਾਨੀ ਕਿ ਕੱਲ੍ਹ ਲੜਾਕੂ ਜਹਾਜ਼ 'ਰਾਫ਼ੇਲ' ਹਵਾਈ ਫ਼ੌਜ ਦੀ ਸ਼ਾਨ ਬਣਨਗੇ। 5 ਰਾਫ਼ੇਲ ਲੜਾਕੂ ਜਹਾਜ਼ਾਂ ਨੂੰ ਵੀਰਵਾਰ ਨੂੰ ਅੰਬਾਲਾ ਏਅਰਬੇਸ 'ਤੇ ਰਸਮੀ ਰੂਪ ਨਾਲ ਸ਼ਾਮਲ ਕੀਤਾ ਜਾਵੇਗਾ। ਲੜਾਕੂ ਜਹਾਜ਼ ਦੇ ਹਵਾਈ ਫ਼ੌਜ ਵਿਚ ਸ਼ਾਮਲ ਹੋਣ ਦੇ ਰਸਮੀ ਪ੍ਰੋਗਰਾਮ ਵਿਚ ਰੱਖਿਆ ਮੰਤਰੀ ਰਾਜਨਾਥ ਸਿੰਘ, ਉਨ੍ਹਾਂ ਦੀ ਫਰਾਂਸੀਸੀ ਹਮ ਰੁਤਬਾ ਫਲੋਰੈਂਸ ਪਾਰਲੀ ਅਤੇ ਭਾਰਤ ਦੇ ਸੀਨੀਅਰ ਫ਼ੌਜੀ ਅਧਿਕਾਰੀ ਮੌਜੂਦ ਰਹਿਣਗੇ।

ਅਧਿਕਾਰੀਆਂ ਨੇ ਕਿਹਾ ਕਿ ਫਰਾਂਸ ਦੀ ਰੱਖਿਆ ਮੰਤਰੀ ਫਲੋਰੈਂਸ ਪਾਰਲੀ ਵੀਰਵਾਰ ਸਵੇਰੇ ਹੀ ਅੰਬਾਲਾ ਪਹੁੰਚ ਜਾਵੇਗੀ ਅਤੇ ਦੁਪਹਿਰ ਬਾਅਦ ਉਹ ਇੱਥੋਂ ਰਵਾਨਾ ਹੋ ਜਾਵੇਗੀ। ਰੱਖਿਆ ਸੂਤਰਾਂ ਮੁਤਾਬਕ ਰਸਮੀ ਸਮਾਰੋਹ ਮਗਰੋਂ ਫਲੋਰੈਂਸ ਪਾਰਲੀ ਅਤੇ ਰਾਜਨਾਥ ਸਿੰਘ ਦੋਹਾਂ ਦੇਸ਼ਾਂ ਵਿਚਾਲੇ ਦੁਵੱਲੇ ਰੱਖਿਆ ਸੰਬੰਧਾਂ ਅਤੇ ਰੱਖਿਆ ਸਹਿਯੋਗ ਨੂੰ ਹੋਰ ਮਜ਼ਬੂਤੀ ਦੇਣ ਲਈ ਅੰਬਾਲਾ 'ਚ ਹੀ ਚਰਚਾ ਕਰਨਗੇ।

ਜ਼ਿਕਰਯੋਗ ਹੈ ਹਵਾਈ ਫ਼ੌਜ ਨੇ 59 ਹਜ਼ਾਰ ਕਰੋੜ ਰੁਪਏ ਦੀ ਲਾਗਤ ਨਾਲ ਫਰਾਂਸ ਤੋਂ 36 ਰਾਫ਼ੇਲ ਜਹਾਜ਼ ਖਰੀਦਣ ਦਾ ਸੌਦਾ ਕੀਤਾ ਹੈ। ਇਨ੍ਹਾਂ 'ਚੋਂ 5 ਜਹਾਜ਼ਾਂ ਦੀ ਖੇਪ ਬੀਤੀ 29 ਜੁਲਾਈ 2020 ਨੂੰ ਭਾਰਤ ਆਈ ਅਤੇ 4 ਜਹਾਜ਼ਾਂ ਦੀ ਖੇਪ ਅਕਤੂਬਰ-ਨਵੰਬਰ 'ਚ ਆਉਣ ਦੀ ਸੰਭਾਵਨਾ ਹੈ। ਬਾਕੀ ਦੇ ਜਹਾਜ਼ਾਂ ਦੀ ਸਪਲਾਈ 2021 ਦੇ ਅਖ਼ੀਰ ਵਿਚ ਪੂਰੀ ਹੋ ਜਾਣ ਦੀ ਉਮੀਦ ਹੈ। 

ਸੂਤਰਾਂ ਮੁਤਾਬਕ ਫਰਾਂਸ ਤੋਂ 36 ਹੋਰ ਲੜਾਕੂ ਜਹਾਜ਼ਾਂ ਦੀ ਸੰਭਾਵਿਤ ਖਰੀਦ 'ਤੇ ਰਾਜਨਾਥ ਸਿੰਘ ਫਲੋਰੈਂਸ ਪਾਰਲੀ ਦੀ ਗੱਲਬਾਤ ਦੌਰਾਨ ਚਰਚਾ ਹੋ ਸਕਦੀ ਹੈ। ਦੱਸ ਦੇਈਏ ਕਿ ਰਾਫ਼ੇਲ ਜਹਾਜ਼ ਅਤਿ-ਆਧੁਨਿਕ ਹਥਿਆਰਾਂ ਅਤੇ ਉੱਨਤ ਪ੍ਰਣਾਲੀ ਨਾਲ ਲੈੱਸ ਹੈ। ਪਾਕਿਸਤਾਨ ਅਤੇ ਚੀਨ 'ਤੇ ਇਕੱਠੇ ਦੋ ਮੋਰਚਿਆਂ 'ਤੇ ਮੁਹਿੰਮ ਲਈ ਹਵਾਈ ਫ਼ੌਜ ਨੂੰ ਰਾਫ਼ੇਲ ਵਰਗੇ ਲੜਾਕੂ ਜਹਾਜ਼ ਦੀ ਬੇਹੱਦ ਲੋੜ ਹੈ।