ਅਹਿਮਦਾਬਾਦ ਜਹਾਜ਼ ਹਾਦਸਾ : ਮਾਂ ਦੀ ਚਮੜੀ ਦੇ ਟਰਾਂਸਪਲਾਂਟ ਨਾਲ ਬਚਿਆ ਹਾਦਸੇ ’ਚ ਝੁਲਸਿਆ ਬੱਚਾ

ਅਹਿਮਦਾਬਾਦ, (ਭਾਸ਼ਾ)- ਇਥੇ 12 ਜੂਨ ਨੂੰ ਏਅਰ ਇੰਡੀਆ ਦੇ ਜਹਾਜ਼ ਹਾਦਸੇ ਦੇ ਸਭ ਤੋਂ ਘੱਟ ਉਮਰ ਦੇ ਪੀੜਤ 8 ਮਹੀਨਿਆਂ ਦੇ ਧਿਆਨਸ਼ ਲਈ ਉਸਦੀ ਮਾਂ ਉਸਨੂੰ ਅੱਗ ਤੋਂ ਬਚਾ ਕੇ ਨਾ ਸਿਰਫ ਇਕ ਰੱਖਿਅਕ ਬਣੀ ਸਗੋਂ ਉਸਦੇ ਡੂੰਘੇ ਜਖਮਾਂ ਦੇ ਇਲਾਜ ਲਈ ਆਪਣੀ ਚਮੜੀ ਵੀ ਮੁਹੱਈਆ ਕਰਵਾਈ ਹੈ।

ਡਾਕਟਰਾਂ ਦੇ ਅਨੁਸਾਰ 36 ਫੀਸਦੀ ਤੱਕ ਝੁਲਸ ਚੁੱਕਾ ਬੱਚਾ ਹੁਣ ਠੀਕ ਹੋ ਰਿਹਾ ਹੈ ਕਿਉਂਕਿ ਉਸਦੀ ਮਾਂ ਦੀ ਚਮੜੀ ਦੀ ਵਰਤੋਂ ਨਾਲ ਉਸਦੇ ਜ਼ਖ਼ਮਾਂ ਨੂੰ ਠੀਕ ਕਰਨ ਵਿਚ ਮਦਦ ਮਿਲੀ ਹੈ। ਇਹ ਔਰਤ ਵੀ 25 ਫੀਸਦੀ ਤੱਕ ਸੜ ਗਈ ਸੀ। ਡਾਕਟਰਾਂ ਨੇ ਸੋਮਵਾਰ ਨੂੰ ਦੱਸਿਆ ਕਿ ਨੁਕਸਾਨੀ ਚਮੜੀ ਦੀ ਪਲਾਸਟਿਕ ਸਰਜਰੀ ਤੋਂ ਬਾਅਦ ਬੱਚੇ ਅਤੇ ਉਸਦੀ ਮਾਂ ਨੂੰ ਇਥੇ ਇਕ ਨਿੱਜੀ ਹਸਪਤਾਲ ਤੋਂ ਛੁੱਟੀ ਦੇ ਦਿੱਤੀ ਗਈ ਹੈ।