ਪਰਿਵਾਰ ਦੀ ਵੱਡੀ ਲਾਪਰਵਾਹੀ: ਪੂਜਾ ਸਮੱਗਰੀ ਦੇ ਨਾਲ ਨਹਿਰ ''ਚ ਰੋੜ੍ਹ ਦਿੱਤੇ 2 ਲੱਖ ਰੁਪਏ

ਸੂਰਤ : ਗੁਜਰਾਤ ਦੇ ਸੂਰਤ ਤੋਂ ਇੱਕ ਬੇਹੱਦ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਪਰਿਵਾਰ ਨੇ ਅਣਜਾਣੇ ਵਿੱਚ ਪੂਜਾ ਦੀ ਸਮੱਗਰੀ ਦੇ ਨਾਲ ਆਪਣੀ ਮਿਹਨਤ ਦੀ ਕਮਾਈ ਦੇ 2 ਲੱਖ ਰੁਪਏ ਨਹਿਰ ਵਿੱਚ ਵਹਾ ਦਿੱਤੇ। ਇਹ ਸਾਰੀ ਘਟਨਾ ਕਿਸੇ ਫਿਲਮੀ ਡਰਾਮੇ ਤੋਂ ਘੱਟ ਨਹੀਂ ਸੀ, ਜਿਸ ਵਿੱਚ ਫਾਇਰ ਬ੍ਰਿਗੇਡ ਦੇ ਜਵਾਨਾਂ ਨੇ ਆਪਣੀ ਜਾਨ ਜ਼ੋਖਮ ਵਿੱਚ ਪਾ ਕੇ ਨੋਟਾਂ ਦੇ ਬੰਡਲ ਸਹੀ-ਸਲਾਮਤ ਲੱਭ ਲਏ।

ਕਿਵੇਂ ਵਾਪਰੀ ਘਟਨਾ? 
ਜਾਣਕਾਰੀ ਅਨੁਸਾਰ, ਸੂਰਤ ਦੇ ਪੁਨਾ ਰੋਡ ਸਥਿਤ ਨਿਜਾਨੰਦ ਸੁਸਾਇਟੀ ਵਿੱਚ ਰਹਿਣ ਵਾਲੇ ਲਿੰਬਾ ਪਰਿਵਾਰ ਦੇ ਘਰ ਕੁਝ ਦਿਨ ਪਹਿਲਾਂ ਧਾਰਮਿਕ ਪੂਜਾ ਦਾ ਆਯੋਜਨ ਕੀਤਾ ਗਿਆ ਸੀ। ਪੂਜਾ ਦੀ ਸਮੱਗਰੀ ਘਰ ਦੀ ਅਲਮਾਰੀ ਵਿੱਚ ਤਿਜੋਰੀ ਦੇ ਕੋਲ ਹੀ ਰੱਖੀ ਹੋਈ ਸੀ। ਜਦੋਂ ਪਰਿਵਾਰ ਦੇ ਮੈਂਬਰਾਂ ਨੇ ਇਸ ਸਮੱਗਰੀ ਨੂੰ ਨਹਿਰ ਵਿੱਚ ਪ੍ਰਵਾਹਿਤ ਕਰਨ ਲਈ ਇੱਕ ਪਲਾਸਟਿਕ ਬੈਗ ਵਿੱਚ ਇਕੱਠਾ ਕੀਤਾ, ਤਾਂ ਉਨ੍ਹਾਂ ਨੂੰ ਬਿਲਕੁਲ ਵੀ ਅੰਦਾਜ਼ਾ ਨਹੀਂ ਸੀ ਕਿ ਉਸੇ ਬੈਗ ਵਿੱਚ ਤਿਜੋਰੀ ਕੋਲ ਰੱਖੇ 2 ਲੱਖ ਰੁਪਏ ਵੀ ਚਲੇ ਗਏ ਹਨ।

ਤਿਜੋਰੀ ਦੇਖੀ ਤਾਂ ਉੱਡੇ ਹੋਸ਼
ਪਰਿਵਾਰ ਨੇ ਪੁਨਾ ਰੋਡ ਸਥਿਤ ਅਮੇਜ਼ੀਆ ਟਾਵਰ ਦੇ ਕੋਲ ਨਹਿਰ ਵਿੱਚ ਬੈਗ ਸੁੱਟ ਦਿੱਤਾ। ਘਰ ਪਰਤਣ 'ਤੇ ਜਦੋਂ ਉਨ੍ਹਾਂ ਨੇ ਤਿਜੋਰੀ ਚੈੱਕ ਕੀਤੀ ਤਾਂ ਨਕਦੀ ਗਾਇਬ ਸੀ। ਥੋੜ੍ਹੀ ਦੇਰ ਬਾਅਦ ਹੀ ਉਨ੍ਹਾਂ ਨੂੰ ਆਪਣੀ ਗਲਤੀ ਦਾ ਅਹਿਸਾਸ ਹੋਇਆ ਅਤੇ ਤੁਰੰਤ ਫਾਇਰ ਕੰਟਰੋਲ ਰੂਮ ਨੂੰ ਸੂਚਨਾ ਦਿੱਤੀ ਗਈ।

ਫਾਇਰ ਬ੍ਰਿਗੇਡ ਦਾ ਸਫ਼ਲ ਆਪ੍ਰੇਸ਼ਨ 
ਸੂਚਨਾ ਮਿਲਦੇ ਹੀ ਡੁੰਭਾਲ ਫਾਇਰ ਸਟੇਸ਼ਨ ਦੀ ਟੀਮ ਮੌਕੇ 'ਤੇ ਪਹੁੰਚੀ। ਪਾਣੀ ਦੇ ਤੇਜ਼ ਵਹਾਅ ਅਤੇ ਨਹਿਰ ਦੀ ਗਹਿਰਾਈ ਦੇ ਬਾਵਜੂਦ ਫਾਇਰ ਸਬ ਅਫਸਰ ਸੁਨੀਲ ਚੌਧਰੀ ਦੀ ਅਗਵਾਈ ਵਿੱਚ ਜਵਾਨਾਂ ਨੇ ਕਈ ਵਾਰ ਡੁਬਕੀਆਂ ਲਗਾਈਆਂ। ਕਾਫੀ ਮੁਸ਼ੱਕਤ ਤੋਂ ਬਾਅਦ ਜਵਾਨਾਂ ਨੂੰ 500-500 ਦੇ ਨੋਟਾਂ ਦੇ ਚਾਰ ਬੰਡਲ (2 ਲੱਖ ਰੁਪਏ) ਮਿਲ ਗਏ, ਜੋ ਉਨ੍ਹਾਂ ਨੇ ਸੁਰੱਖਿਅਤ ਰੂਪ ਵਿੱਚ ਪਰਿਵਾਰ ਨੂੰ ਸੌਂਪ ਦਿੱਤੇ। ਇਸ ਸਰਚ ਆਪ੍ਰੇਸ਼ਨ ਦੌਰਾਨ ਨਹਿਰ ਵਿੱਚ ਪਏ ਕੱਚ ਦੇ ਟੁਕੜਿਆਂ ਕਾਰਨ ਫਾਇਰ ਬ੍ਰਿਗੇਡ ਦੇ ਦੋ ਜਵਾਨ ਜ਼ਖਮੀ ਵੀ ਹੋ ਗਏ। ਪਰਿਵਾਰ ਨੇ ਫਾਇਰ ਬ੍ਰਿਗੇਡ ਦੀ ਇਸ ਬਹਾਦਰੀ ਅਤੇ ਇਮਾਨਦਾਰੀ ਲਈ ਉਨ੍ਹਾਂ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ ਹੈ।