19 ਜਵਾਨਾਂ ਨੂੰ ਸ਼ੌਰਿਆ ਤੇ 9 ਨੂੰ ''ਕੀਰਤੀ ਚੱਕਰ''... ਰਾਸ਼ਟਰਪਤੀ ਨੇ 78 ਬਹਾਦਰੀ ਪੁਰਸਕਾਰਾਂ ਨੂੰ ਦਿੱਤੀ ਮਨਜ਼ੂਰੀ
Friday, Aug 14, 2026 - 10:09 PM (IST)
ਨਵੀਂ ਦਿੱਲੀ - ਸੁਤੰਤਰਤਾ ਦਿਵਸ ਦੀ ਪੂਰਵ ਸੰਧਿਆ 'ਤੇ ਦੇਸ਼ ਦੇ ਵੀਰ ਜਵਾਨਾਂ ਦੇ ਸਨਮਾਨ ਲਈ ਵੀਰਤਾ ਪੁਰਸਕਾਰਾਂ (ਗੈਲੰਟਰੀ ਅਵਾਰਡ) ਦੀ ਸੂਚੀ ਜਾਰੀ ਕਰ ਦਿੱਤੀ ਗਈ ਹੈ। ਦੇਸ਼ ਦੀ ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ ਨੇ ਕੁੱਲ 78 ਵੀਰਤਾ ਪੁਰਸਕਾਰਾਂ ਅਤੇ 89 'ਮੈਨਸ਼ਨ ਇਨ ਡਿਸਪੈਚੇਜ਼' ਨੂੰ ਆਪਣੀ ਮਨਜ਼ੂਰੀ ਦੇ ਦਿੱਤੀ ਹੈ। ਇਨ੍ਹਾਂ ਪੁਰਸਕਾਰਾਂ ਵਿੱਚ ਥਲ ਸੈਨਾ, ਨੇਵੀ, ਹਵਾਈ ਸੈਨਾ ਅਤੇ ਗ੍ਰਹਿ ਮੰਤਰਾਲੇ ਦੇ ਅਧੀਨ ਕੰਮ ਕਰਨ ਵਾਲੇ ਸੁਰੱਖਿਆ ਬਲਾਂ ਦੇ ਉਹ ਜਵਾਨ ਸ਼ਾਮਲ ਹਨ, ਜਿਨ੍ਹਾਂ ਨੇ ਅਸਾਧਾਰਨ ਬਹਾਦਰੀ ਅਤੇ ਵੀਰਤਾ ਦਾ ਪ੍ਰਦਰਸ਼ਨ ਕੀਤਾ ਹੈ। ਇਸ ਵਾਰ ਐਲਾਨੇ ਗਏ ਵੀਰਤਾ ਪੁਰਸਕਾਰਾਂ ਵਿੱਚੋਂ 13 ਜਵਾਨਾਂ ਨੂੰ ਇਹ ਸਨਮਾਨ ਮਰਨ ਉਪਰੰਤ ਦਿੱਤਾ ਜਾ ਰਿਹਾ ਹੈ।
ਰਾਸ਼ਟਰਪਤੀ ਭਵਨ ਵੱਲੋਂ ਜਾਰੀ ਕੀਤੀ ਗਈ ਸੂਚੀ ਅਨੁਸਾਰ, ਮਨਜ਼ੂਰ ਕੀਤੇ ਗਏ ਪੁਰਸਕਾਰਾਂ ਵਿੱਚ 9 ਕੀਰਤੀ ਚੱਕਰ, 1 ਸ਼ੌਰਿਆ ਚੱਕਰ ਬਾਰ, 19 ਸ਼ੌਰਿਆ ਚੱਕਰ, ਵੀਰਤਾ ਲਈ ਸੈਨਾ ਮੈਡਲ ਦੇ 5 ਬਾਰ, 36 ਸੈਨਾ ਮੈਡਲ, ਵੀਰਤਾ ਲਈ 3 ਨੌਸੈਨਾ ਮੈਡਲ ਅਤੇ 5 ਹਵਾਈ ਸੈਨਾ ਮੈਡਲ ਸ਼ਾਮਲ ਹਨ।
ਕੀਰਤੀ ਚੱਕਰ ਸ਼ਾਂਤੀ ਦੇ ਸਮੇਂ ਦਿੱਤਾ ਜਾਣ ਵਾਲਾ ਦੇਸ਼ ਦਾ ਦੂਜਾ ਸਭ ਤੋਂ ਵੱਡਾ ਵੀਰਤਾ ਪੁਰਸਕਾਰ ਹੈ। ਇਸ ਵਾਰ ਇਹ ਸਨਮਾਨ ਹੇਠ ਲਿਖੇ ਜਵਾਨਾਂ ਨੂੰ ਦਿੱਤਾ ਜਾ ਰਿਹਾ ਹੈ:
ਭਾਰਤੀ ਸੈਨਾ ਵਿੱਚੋਂ: ਲੈਫਟੀਨੈਂਟ ਕਰਨਲ ਮਾਨੇਓ ਫਰਾਂਸਿਸ, ਮੇਜਰ ਜਤਿੰਦਰ ਰਾਠੀ ਅਤੇ ਹਵਾਲਦਾਰ ਗਜੇਂਦਰ ਸਿੰਘ (ਮਰਨ ਉਪਰੰਤ)।
ਗ੍ਰਹਿ ਮੰਤਰਾਲੇ ਦੇ ਅਧੀਨ ਸੁਰੱਖਿਆ ਬਲਾਂ ਵਿੱਚੋਂ: ਹੈੱਡ ਕਾਂਸਟੇਬਲ ਜਗਬੀਰ ਸਿੰਘ, ਕਾਂਸਟੇਬਲ ਜਸਵੰਤ ਸਿੰਘ, ਕਾਂਸਟੇਬਲ ਬਲਵਿੰਦਰ ਸਿੰਘ, ਕਾਂਸਟੇਬਲ ਤਾਰਿਕ ਹੁਸੈਨ, ਹੈੱਡ ਕਾਂਸਟੇਬਲ ਬਸ਼ੀਰ ਅਹਿਮਦ ਅਤੇ ਐਸ.ਟੀ.ਐਫ. (STF) ਦੇ ਇੰਸਪੈਕਟਰ ਸੁਨੀਲ ਕੁਮਾਰ।
ਅਸਾਮ ਰਾਈਫਲਜ਼ ਦੇ ਮੇਜਰ ਆਦਿੱਤਿਆ ਪ੍ਰਤਾਪ ਸਿੰਘ ਨੂੰ 'ਸ਼ੌਰਿਆ ਚੱਕਰ ਬਾਰ' ਨਾਲ ਸਨਮਾਨਿਤ ਕੀਤਾ ਜਾਵੇਗਾ। ਉਨ੍ਹਾਂ ਨੂੰ ਪਹਿਲਾਂ ਵੀ ਸ਼ੌਰਿਆ ਚੱਕਰ ਮਿਲ ਚੁੱਕਾ ਹੈ। ਨਿਯਮਾਂ ਅਨੁਸਾਰ, ਜਦੋਂ ਕਿਸੇ ਵੀਰ ਨੂੰ ਉਹੀ ਪੁਰਸਕਾਰ ਦੂਜੀ ਵਾਰ ਮਿਲਦਾ ਹੈ, ਤਾਂ ਨਵੇਂ ਮੈਡਲ ਦੀ ਬਜਾਏ ਰਿਬਨ 'ਤੇ ਇਕ 'ਬਾਰ' ਜੋੜ ਦਿੱਤਾ ਜਾਂਦਾ ਹੈ।
ਇਸ ਵਾਰ ਕੁੱਲ 19 ਜਵਾਨਾਂ ਨੂੰ ਸ਼ੌਰਿਆ ਚੱਕਰ ਦੇਣ ਦਾ ਐਲਾਨ ਹੋਇਆ ਹੈ। ਇਨ੍ਹਾਂ ਵਿੱਚ ਸੈਨਾ ਦੇ ਮੇਜਰ ਪਰਮਵੀਰ, ਮੇਜਰ ਤਰੁਣ ਵਾਸੂਦੇਵਨ, ਨਾਇਬ ਸੂਬੇਦਾਰ ਸ਼ੰਕਰ ਰਾਮ, ਹਵਾਲਦਾਰ ਜਗਤਾਰ ਸਿੰਘ ਅਤੇ ਲਾਂਸ ਨਾਇਕ ਨਰਿੰਦਰ ਸਿੰਧੂ (ਮਰਨ ਉਪਰੰਤ) ਦੇ ਨਾਮ ਸ਼ਾਮਲ ਹਨ। ਨੌਸੈਨਾ ਵੱਲੋਂ ਲੈਫਟੀਨੈਂਟ ਕਮਾਂਡਰ ਸ਼ਿਵਮ ਕੁਮਾਰ ਅਤੇ ਵਾਯੂ ਸੈਨਾ ਵੱਲੋਂ ਸਕੁਐਡਰਨ ਲੀਡਰ ਸੁਧੀਰ ਕੁਮਾਰ ਨੂੰ ਵੀ ਸ਼ੌਰਿਆ ਚੱਕਰ ਨਾਲ ਨਿਵਾਜਿਆ ਜਾਵੇਗਾ। ਇਸ ਤੋਂ ਇਲਾਵਾ ਗ੍ਰਹਿ ਮੰਤਰਾਲੇ ਦੇ ਛੇ ਮੁਲਾਜ਼ਮਾਂ, ਜਿਨ੍ਹਾਂ ਵਿੱਚ ਡੀ.ਐਸ.ਪੀ. ਧੀਰਜ ਸਿੰਘ ਕਟੋਚ ਅਤੇ ਇੰਸਪੈਕਟਰ ਅਜੇ ਸਿੰਘ ਚਿੱਬ ਸ਼ਾਮਲ ਹਨ, ਨੂੰ ਵੀ ਇਹ ਸਨਮਾਨ ਦਿੱਤਾ ਜਾਵੇਗਾ।
ਮੇਜਰ ਡੀ.ਐਸ. ਪਾਓਸ਼ੋ ਅਤੇ ਮੇਜਰ ਕ੍ਰਿਸ਼ਨਕਾਂਤ ਸਮੇਤ ਪੰਜ ਸੈਨਿਕ ਅਧਿਕਾਰੀਆਂ ਨੂੰ ਸੈਨਾ ਮੈਡਲ ਦੇ 'ਬਾਰ' ਨਾਲ ਸਨਮਾਨਿਤ ਕੀਤਾ ਜਾਵੇਗਾ। ਰਾਸ਼ਟਰਪਤੀ ਨੇ 36 ਹੋਰ ਸੈਨਾ ਮੈਡਲਾਂ ਨੂੰ ਮਨਜ਼ੂਰੀ ਦਿੱਤੀ ਹੈ, ਜਿਨ੍ਹਾਂ ਵਿੱਚ ਕਰਨਲ ਪੁਸ਼ਕਰ ਵਿਜੇ ਚੌਧਰੀ, ਮੇਜਰ ਮੋਹਿਤ ਪੋਡੀਆ, ਕੈਪਟਨ ਕਰਨ ਸਿੰਘ ਚੀਮਾ, ਕੈਪਟਨ ਅੰਸ਼ੁਮਨ ਸਿੰਘ ਅਤੇ ਸੂਬੇਦਾਰ ਪਵਨ ਕੁਮਾਰ ਸ਼ਾਮਲ ਹਨ। ਸੂਬੇਦਾਰ ਪ੍ਰਭਾਤ ਗੌਰ, ਲਾਂਸ ਹਵਾਲਦਾਰ ਪਲਾਸ਼ ਘੋਸ਼ ਅਤੇ ਸਿਪਾਹੀ ਹਰਮਿੰਦਰ ਸਿੰਘ ਸਮੇਤ ਪੰਜ ਜਵਾਨਾਂ ਨੂੰ ਇਹ ਸਨਮਾਨ ਮਰਨ ਉਪਰੰਤ ਦਿੱਤਾ ਗਿਆ ਹੈ।
ਨੌਸੈਨਾ ਤੋਂ ਕਮਾਂਡਰ ਵਿਨੀਤ ਸ਼ਰਮਾ, ਕਮਾਂਡਰ ਯੁਵਰਾਜ ਕੁਮਾਰ, ਅਵਿਨਾਸ਼ ਅੰਨਾਸੋ ਅਤੇ ਵਾਯੂ ਸੈਨਾ ਤੋਂ ਗਰੁੱਪ ਕੈਪਟਨ ਰਾਹੁਲ ਜਗੋਟਾ, ਗਰੁੱਪ ਕੈਪਟਨ ਰਾਹੁਲ ਰਾਵਤ, ਵਿੰਗ ਕਮਾਂਡਰ ਆਸ਼ੀਸ਼ ਰਾਜਪੂਤ, ਫਲਾਈਟ ਲੈਫਟੀਨੈਂਟ ਯਸ਼ ਅਤੇ ਪੈਰਾਸ਼ੂਟ ਜੰਪ ਇੰਸਟ੍ਰਕਟਰ ਐਮ.ਡਬਲਯੂ.ਓ. ਰਵਿੰਦਰਜੀਤ ਸਿੰਘ ਨੂੰ ਵੀ ਸੈਨਾ ਮੈਡਲ ਪ੍ਰਦਾਨ ਕੀਤੇ ਜਾਣਗੇ। ਇਸ ਤੋਂ ਇਲਾਵਾ, ਰਾਸ਼ਟਰਪਤੀ ਨੇ ਵਿਸ਼ੇਸ਼ ਸੇਵਾ ਲਈ 89 'ਮੈਨਸ਼ਨ ਇਨ ਡਿਸਪੈਚੇਜ਼' ਨੂੰ ਵੀ ਮਨਜ਼ੂਰੀ ਦਿੱਤੀ ਹੈ, ਜਿਸ ਵਿੱਚ ਸੈਨਾ ਦੇ 75, ਨੌਸੈਨਾ ਦੇ 4 ਅਤੇ ਵਾਯੂ ਸੈਨਾ ਦੇ 10 ਕਰਮਚਾਰੀ ਸ਼ਾਮਲ ਹਨ।
