ਕਿਸਾਨ ਮੇਲੇ ਦੌਰਾਨ ਪੀ.ਏ.ਯੂ. ਵੱਲੋਂ ਫਸਲ ਉਤਪਾਦਨ ਮੁਕਾਬਲੇ

ਪੰਜਾਬ ਐਗਰੀਕਲਚਰਲ ਯੂਨੀਵਰਸਿਟੀ ਵਲੋਂ ਲੁਧਿਆਣਾ ਕੈਂਪਸ ਵਿਖੇ 20-22 ਸਤੰਬਰ ਨੂੰ ਲਗਾਏ ਜਾਣ ਵਾਲੇ ਤਿੰਨ ਰੋਜ਼ਾ ਕਿਸਾਨ ਮੇਲੇ ਦੇ ਪਹਿਲੇ ਦਿਨ ਫਸਲ ਉਤਪਾਦਨ ਮੁਕਾਬਲੇ ਕਰਵਾਏ ਜਾਣਗੇ। ਇਸ ਬਾਰੇ ਜਾਣਕਾਰੀ ਦਿੰਦਿਆਂ ਡਾ. ਕੇ.ਐੱਸ. ਬਰਾੜ, ਕਨਵੀਨਰ, ਫ਼ਸਲ ਮੁਕਾਬਲੇ ਕਮੇਟੀ ਨੇ ਦੱਸਿਆ ਕਿ ਕਿਸਾਨ ਆਪਣੀਆਂ ਫਸਲਾਂ ਦੇ ਨਮੂਨੇ ਲਿਆ ਕੇ ਇਸ ਮੁਕਾਬਲੇ ਵਿਚ ਹਿੱਸਾ ਲੈ ਸਕਦੇ ਹਨ। ਇਸ ਮੁਕਾਬਲੇ ਵਿਚ ਜ਼ਿਲਾ ਪਸਾਰ ਮਾਹਿਰਾਂ ਜਾਂ ਕ੍ਰਿਸ਼ੀ ਵਿਗਿਆਨ ਕੇਂਦਰਾਂ ਦੀ ਫੈਕਲਟੀ ਵਲੋਂ ਲਿਆਉਂਦੇ ਗਏ ਨਮੂਨਿਆਂ ਨੂੰ ਸ਼ਾਮਲ ਨਹੀਂ ਕੀਤਾ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਕਿਸਾਨਾਂ ਵਲੋਂ ਲਿਆਉਂਦੇ ਗਏ ਨਮੂਨਿਆਂ ਨੂੰ 11.30 ਵਜੇ ਤਕ ਫਸਲ ਮੁਕਾਬਲਿਆਂ ਦੇ ਸਟਾਲ ਜੋ ਕਿ ਕੈਰੋਂ ਕਿਸਾਨ ਘਰ ਦੇ ਨਜ਼ਦੀਕ ਹੋਵੇਗਾ ਵਿਖੇ ਲਿਆ ਜਾਵੇਗਾ । ਇਸ ਤੋਂ ਬਾਅਦ ਲਿਆਉਂਦੇ ਨਮੂਨਿਆਂ ਨੂੰ ਮੁਕਾਬਲੇ ਲਈ ਨਹੀਂ ਵਿਚਾਰਿਆ ਜਾਵੇਗਾ। ਮਾਹਿਰਾਂ ਦੀ ਇਕ ਟੀਮ ਇਹਨਾਂ ਨਮੂਨਿਆਂ ਦੀ ਜਾਂਚ ਉਪਰੰਤ ਆਪਣਾ ਫੈਸਲਾ ਸੁਣਾਏਗੀ ।

ਸਬਜ਼ੀਆਂ ਦੀਆਂ ਫਸਲਾਂ ਬਾਰੇ ਜਾਣਕਾਰੀ ਦਿੰਦਿਆਂ ਉਨ੍ਹਾਂ ਦੱਸਿਆ ਕਿ ਇਸ ਮੁਕਾਬਲੇ ਵਿਚ ਭਿੰਡੀ, ਕਰੇਲਾ, ਮਿਰਚਾਂ, ਸ਼ਿਮਲਾ ਮਿਰਚ, ਰਾਮ ਤੋਰੀ, ਲੋਬੀਆ, ਪਿਆਜ਼ ਅਤੇ ਅਰਬੀ ਦੀਆਂ ਸਿਫ਼ਾਰਸ਼ ਕੀਤੀਆਂ ਕਿਸਮਾਂ ਨੂੰ ਸ਼ਾਮਲ ਕੀਤਾ ਜਾਵੇਗਾ ਜਿਨ੍ਹਾਂ ਦੇ ਨਮੂਨੇ ਅੱਧਾ-ਅੱਧਾ ਕਿਲੋ ਹੋਣੇ ਚਾਹੀਦੇ ਹਨ। ਇਨ੍ਹਾਂ ਤੋਂ ਇਲਾਵਾ ਮੇਲੇ ਵਿਚ ਬੈਂਗਣ, ਮੂਲੀ, ਖੀਰਾ ਜਾਂ ਸਬਜ਼ੀਆਂ ਦੀਆਂ ਹੋਰ ਫ਼ਸਲਾਂ ਦੇ ਵੀ ਮੁਕਾਬਲੇ ਕਰਵਾਏ ਜਾਣਗੇ ਜਿਨ੍ਹਾਂ ਦੇ ਨਮੂਨਿਆਂ ਦਾ ਭਾਰ ਅੱਧਾ ਕਿਲੋ ਜਾਂ ਦੋ ਨਮੂਨੇ ਹੋਣੇ ਚਾਹੀਦੇ ਹਨ। ਇਸੇ ਤਰ੍ਹਾਂ ਲੰਬੇ ਜਾਂ ਗੋਲ ਘੀਆ ਕੱਦੂ ਦੇ ਵੀ ਦੋ ਦੋ ਨਮੂਨੇ ਹੋਣੇ ਚਾਹੀਦੇ ਹਨ।

ਖੇਤ ਫ਼ਸਲਾਂ ਬਾਰੇ ਜਾਣਕਾਰੀ ਦਿੰਦਿਆਂ ਉਨ੍ਹਾਂ ਦੱਸਿਆ ਕਿ ਇਸ ਮੁਕਾਬਲੇ ਵਿਚ ਮੱਕੀ ਦੀਆਂ ਛੱਲੀਆਂ/ਬੇਬੀ ਕਾਰਨ, ਗੰਨਾ, ਨਰਮਾ, ਮੂੰਗਫਲੀ ਅਤੇ ਹੋਰ ਫ਼ਸਲਾਂ ਨੂੰ ਸ਼ਾਮਲ ਕੀਤਾ ਜਾਵੇਗਾ ਅਤੇ ਇਨ੍ਹਾਂ ਦੇ ਨਮੂਨਿਆਂ ਵਜੋਂ ਤਿੰਨ ਜਾਂ ਚਾਰ ਪੱਕੇ ਹੋਏ ਗੰਨੇ, ਇਕ ਜਾਂ ਤਿੰਨ ਬਾਲਜ਼ ਸਮੇਤ ਪੱਕੇ ਹੋਏ ਪੌਦੇ ਅਤੇ ਦੋ ਜਾਂ ਤਿੰਨ ਪੱਕੇ ਹੋਏ ਪੌਦੇ ਹੋਣੇ ਚਾਹੀਦੇ ਹਨ ।

ਫ਼ਲਾਂ ਬਾਰੇ ਜਾਣਕਾਰੀ ਦਿੰਦਿਆਂ ਉਨ੍ਹਾਂ ਦੱਸਿਆ ਕਿ ਇਸ ਮੁਕਾਬਲੇ ਵਿਚ ਅਮਰੂਦ, ਨਿੰਬੂ, ਮਾਲਟਾ, ਚਕੋਤਰਾ, ਪਪੀਤਾ ਅਤੇ ਹੋਰ ਮੌਸਮੀ ਫ਼ਲ ਨੂੰ ਸ਼ਾਮਲ ਕੀਤਾ ਜਾਵੇਗਾ। ਅਮਰੂਦ, ਨਿੰਬੂ ਅਤੇ ਦੇ ਨਮੂਨੇ ਅੱਧਾ ਕਿਲੋ ਭਾਰ ਦੇ ਹੋਣੇ ਚਾਹੀਦੇ ਹਨ ਜਦਕਿ ਬਾਕੀ ਫ਼ਲਾਂ ਦੇ ਤਿੰਨ ਨਮੂਨੇ ਹੋਣੇ ਚਾਹੀਦੇ ਹਨ ।

ਫੁੱਲਾਂ ਦੇ ਮੁਕਾਬਲਿਆਂ ਬਾਰੇ ਜਾਣਕਾਰੀ ਦਿੰਦਿਆਂ ਉਨ੍ਹਾਂ ਦੱਸਿਆ ਕਿ ਕੱਟ ਰੋਜ਼/ਲੂਜ਼ ਰੋਜ਼ (ਪੰਜ ਟਹਿਣੀਆਂ/250 ਗ੍ਰਾਮ), ਗੇਂਦਾ (ਪੰਜ ਟਹਿਣੀਆਂ), ਟਿਊਬਰੋਜ਼ (ਰਜਨੀਗੰਧਾ-ਪੰਜ ਟਹਿਣੀਆਂ/250 ਗ੍ਰਾਮ) ਜਾਂ ਕਿਸੇ ਹੋਰ ਫੁੱਲ ਨੂੰ ਸ਼ਾਮਲ ਕੀਤਾ ਜਾਵੇਗਾ।

ਇਸ ਮੌਕੇ ਡਾ. ਬਰਾੜ ਨੇ ਜ਼ਿਲਾ ਪੱਧਰ ਦੇ ਸਾਰੇ ਪਸਾਰ ਮਾਹਿਰਾਂ ਅਤੇ ਖੇਤੀ ਵਿਗਿਆਨੀਆਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੇ ਖੇਤਰ ਦੇ ਵੱਧ ਤੋਂ ਵੱਧ ਕਿਸਾਨਾਂ ਨੂੰ ਇਨ੍ਹਾਂ ਮੁਕਾਬਲਿਆਂ ਵਿੱਚ ਹਿੱਸਾ ਲੈਣ ਲਈ ਪ੍ਰੇਰਿਤ ਕਰਨ । 
ਜਗਦੀਸ਼ ਕੌਰ