ਬਿਨ੍ਹਾਂ ਮਨਜ਼ੂਰੀ ਕਾਲੋਨੀ ਕੱਟ ਕੇ ਲੋਕਾਂ ਨੂੰ ਰਗੜਾ ਲਾਉਣ ਵਾਲੇ ਭੂ-ਮਾਫ਼ੀਆ ਨੇ ਸਰਕਾਰ ਨੂੰ ਵੀ ਲਾਇਆ ਰਗੜਾ

ਸ੍ਰੀ ਮੁਕਤਸਰ ਸਾਹਿਬ (ਕੁਲਦੀਪ ਸਿੰਘ ਰਿਣੀ)- ਭੂ-ਮਾਫ਼ੀਆ ਕਿਸ ਕਦਰ ਆਮ ਲੋਕਾਂ ਦੇ ਨਾਲ ਨਾਲ ਸਰਕਾਰ ਨੂੰ ਚੂਨਾ ਲਾ ਰਿਹਾ ਹੈ, ਇਸ ਸਬੰਧੀ ਹੁਣ ਸ੍ਰੀ ਮੁਕਤਸਰ ਸਾਹਿਬ ਦੀ ਮੰਡੀ ਬਰੀਵਾਲਾ ਤੋਂ ਤੱਥ ਸਾਹਮਣੇ ਆਏ ਹਨ। ਮੰਡੀ ਬਰੀਵਾਲਾ ਵਿਖੇ ਬਿਲਕੁਲ ਥਾਣੇ ਦੇ ਸਾਹਮਣੇ ਸ੍ਰੀ ਮੁਕਤਸਰ ਸਾਹਿਬ ਦੇ ਇੱਕ ਰੀਅਲ ਅਸਟੇਟ ਕਾਰੋਬਾਰੀ ਵੱਲੋਂ ਪਹਿਲਾ ਤਾਂ ਨਗਰ ਪੰਚਾਇਤ ਬਰੀਵਾਲਾ ਅਤੇ ਹੋਰ ਵਿਭਾਗਾਂ ਦੀਆਂ ਅੱਖਾਂ ਵਿਚ ਘੱਟਾ ਪਾਉਂਦਿਆ ਇੱਕ ਨਜਾਇਜ ਕਾਲੋਨੀ ਕੱਟੀ ਗਈ ਅਤੇ ਕਾਲੋਨੀ ਦੇ ਅਗਲੇ ਹਿੱਸੇ ਵਿਚ ਕਮਰਸ਼ੀਅਲ ਸ਼ੋਅਰੂਮਾਂ ਦੀ ਜਗ੍ਹਾਂ ਕੱਟੀ ਗਈ। ਉਹ ਜਗ੍ਹਾ ਜਿੱਥੇ ਪੁਰਾਣਾ ਕਾਰਖਾਨਾ ਸੀ ਦਾ ਐਗਰੀਮੈਂਟ ਰਾਹੀ ਸੌਦਾ ਕਰਕੇ ਇਸਨੂੰ ਅੱਗੇ ਵੇਚਣਾ ਸ਼ੁਰੂ ਕਰ ਦਿੱਤਾ ਗਿਆ। ਕਰੀਬ 5 ਏਕੜ ਦੀ ਇਸ ਜਗ੍ਹਾ ਦਾ ਕਾਗਜੀ ਨਕਸ਼ਾ ਬਣਾ ਕੇ ਜੋ ਕਿ ਕਿਸੇ ਵੀ ਵਿਭਾਗ ਤੋਂ ਪਾਸ ਨਹੀਂ ਸੀ ਅਤੇ ਨਾ ਹੀ ਇਸ ਕਾਲੋਨੀ ਨੂੰ ਪਾਸ ਕਰਵਾਉਣ ਲਈ ਕੋਈ ਅਰਜੀ ਤੱਕ ਦਿੱਤੀ ਗਈ ਬਸ ਭੂ ਮਾਫੀਆ ਨੇ ਮਨਮਰਜੀ ਨਾਲ ਇਸਨੂੰ ਵੇਚਣਾ ਸ਼ੁਰੂ ਕਰ ਦਿੱਤਾ ਅਤੇ ਭੋਲੇ ਭਾਲੇ ਲੋਕਾਂ ਨੂੰ ਠੱਗਿਆ ਜਾਣ ਲੱਗਾ।
ਇੰਝ ਹੋਈ ਸਰਕਾਰ ਨਾਲ ਠੱਗੀ
ਜਿੱਥੇ ਇੱਕ ਐਗਰੀਮੈਂਟ ਦੇ ਸਹਾਰੇ ਹੀ ਅੱਗੇ ਲੋਕਾਂ ਨ਼ੂੰ ਇਸ ਕਾਲੋਨੀ ਵਿਚ ਪਲਾਟਾਂ ਅਤੇ ਸ਼ੋਅਰੂਮਾਂ ਦੇ ਸੌਦੇ ਵੇਚਣ ਦਾ ਕੰਮ ਚੱਲਦਾ ਰਿਹਾ ਉੱਥੇ ਹੀ ਦਸੰਬਰ ਵਿਚ ਇਸ ਕਰੀਬ 5 ਏਕੜ ਜਗ੍ਹਾ ਚੋਂ ਡੇਢ ਏਕੜ ਜਗ੍ਹਾ ਦੀ ਰਜਿਸਟਰੀ ਕਰਵਾਈ ਗਈ। ਲੋਕਾਂ ਨਾਲ ਵੱਡੇ ਪੱਧਰ ਤੇ ਕਥਿਤ ਠੱਗੀ ਮਾਰ ਰਹੇ ਭੂ ਮਾਫੀਆ ਨੇ ਇੱਥੇ ਸਰਕਾਰ ਨੂੰ ਵੀ ਠੱਗਿਆ।ਸਰਕਾਰੀ ਰਿਕਾਰਡ ਮੁਤਾਬਿਕ ਸਰਕਾਰੀ ਈ ਸਟੈਂਪ ਸਰਟੀਫਿਕੇਟ ਨੰਬਰ ਆਈ ਐਨ ਪੀ ਬੀ 91369275715803ਡਬਲਿਯੂ ਤਹਿਤ 23 ਦਸੰਬਰ 2024 ਨੂੰ ਬਰੀਵਾਲਾ ਤਹਿਸੀਲ ਵਿਖੇ ਇੱਕ ਰਜਿਸਟਰੀ ਐਮ ਐਸ ਸੂਗਨ ਚੰਦ ਭੂਰਾ ਮੱਲ ਐਂਡ ਸੰਨਜ ਬਜਰੀਆ ਪਾਰਟਨਰ ਸ਼ਸ਼ੀ ਕਾਂਤ ਰਾਠੀ ਹਾਲ ਵਾਸੀ ਗੁੜਗਾਓ ਵੱਲੋਂ ਵਿਨੋਦ ਕੁਮਾਰ ਪੁੱਤਰ ਮਨਮੋਹਨ ਲਾਲ ਵਾਸੀ ਸ੍ਰੀ ਮੁਕਤਸਰ ਸਾਹਿਬ ਦੇ ਨਾਮ ਕਰਵਾਈ ਗਈ। ਇਸ ਤਰ੍ਹਾਂ ਦੀਆਂ ਕਰੀਬ 3 ਰਜਿਸਟਰੀਆਂ ਕਰਵਾਈਆ ਗਈ। ਜੋ ਕਿ ਖੇਵਟ ਨੰਬਰ 556 ਖਤੌਨੀ ਨੰਬਰ 673 ਤੋਂ 676 ਤੱਕ ਦੇ ਖਾਤੇ ਚੋਂ ਕਰਵਾਈਆ ਗਈਆ। ਸਰਕਾਰੀ ਰਿਕਾਰਡ ਦੇਖੀਏ ਤਾਂ ਸਰਕਾਰੀ ਰਿਕਾਰਡ ਵਿਚ ਵਿਚ ਇਹ ਜਗ੍ਹਾ ਗੈਰਮੁਮਕਿਨ ਕਾਰਖਾਨਾ ਹੈ ਜਣਕਿ ਇਸ ਜਗ੍ਹਾ ਦਾ ਘੱਟੋ ਘੱਟ ਕੁਲੈਕਟਰ ਰੇਟ 1 ਕਰੋੜ 92 ਲੱਖ ਰੁਪਏ ਪ੍ਰਤੀ ਏਕੜ ਹੈ, ਪਰ ਖਰੀਦਦਾਰ ਵੱਲੋਂ ਸਰਕਾਰ ਨੂੰ ਕੁੰਡੀ ਲਾਉਂਦਿਆ ਇਹ ਜਗ੍ਹਾ ਨਹਿਰੀ ਵਿਚ ਦਿਖਾ ਕੇ 37 ਲੱਖ 95 ਹਜ਼ਾਰ ਰੁਪਏ ਪ੍ਰਤੀ ਏਕੜ ਦੇ ਹਿਸਾਬ ਨਾਲ ਇਹ ਰਜਿਸਟਰੀਆਂ ਕਰਵਾ ਲਈਆ ਗਈਆ।
ਵੱਡੇ ਪੱਧਰ ਤੇ ਅਸ਼ਟਾਮ ਚੋਰੀ
ਬਰੀਵਾਲਾ ਤਹਿਸੀਲ ਵਿਖੇ ਹੋਈ ਇਸ ਰਜਿਸਟਰੀ ਜਿਸ ਤੇ ਸਰਕਾਰੀ ਕੁਲੈਕਟਰ ਰੇਟ ਮੁਤਾਬਿਕ 2 ਕਰੋੜ 88 ਲੱਖ ਰੁਪਏ ਤੇ ਅਸ਼ਟਾਮ ਫੀਸ ਲੱਗਣੀ ਸੀ ਉਸ ਤੇ ਸਿਰਫ਼ 56 ਲੱਖ 92 ਹਜ਼ਾਰ ਰੁਪਏ ਦੀ ਅਸ਼ਟਾਮ ਫੀਸ ਲਗਾ ਕੇ ਬਾਕੀ ਰਗੜਾ ਸਰਕਾਰ ਨੂੰ ਲਾਇਆ ਗਿਆ ਅਤੇ ਅਸ਼ਟਾਮ ਫੀਸ ਦੀ ਚੋਰੀ ਕਰ ਲਈ ਗਈ। ਜੇਕਰ ਅੰਕੜਿਆ ਮੁਤਾਬਿਕ ਦੇਖੀਏ ਤਾਂ 2 ਕਰੋੜ 88 ਲੱਖ ਰੁਪਏ ਤੇ ਕਰੀਬ 23 ਲੱਖ 80 ਹਜ਼ਾਰ ਰੁਪਏ ਅਸ਼ਟਾਮ ਫੀਸ ਲੱਗਣੀ ਸੀ।ਜਦਕਿ 56 ਲੱਖ 92 ਹਜ਼ਾਰ ਰੁਪਏ ਦੇ ਹਿਸਾਬ ਨਾਲ ਕਰੀਬ 5 ਲੱਖ ਰੁਪਏ ਦੀ ਅਸ਼ਟਾਮ ਫੀਸ ਲਗਾ ਕੇ ਸਰਕਾਰ ਨੂੰ ਕਰੀਬ 18 ਲੱਖ ਰੁਪਏ ਦਾ ਚੂਨਾ ਲਾ ਦਿੱਤਾ ਗਿਆ। ਇਹ ਸਭ ਕਿਸ ਤਰ੍ਹਾਂ ਹੋਇਆ ਇਸ ਸਬੰਧੀ ਜਾਂਚ ਤੋਂ ਬਾਅਦ ਹੀ ਸਾਹਮਣੇ ਆ ਸਕਦਾ ਹੈ।
ਕੀ ਕਹਿੰਦੇ ਹਨ ਮੌਕੇ ਦੇ ਤਹਿਸੀਲਦਾਰ
ਇਹ ਰਜਿਸਟਰੀ ਉਸ ਸਮੇਂ ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਨੇੈਬ ਤਹਿਸੀਲਦਾਰ ਵਜੋਂ ਤਾਇਨਾਤ ਰਣਜੀਤ ਸਿੰਘ ਖਹਿਰਾ ਵੱਲੋਂ ਕੀਤੀ ਗਈ। ਦਸ ਦੇਈਏ ਕਿ ਜਦ ਇਹ ਰਜਿਸਟਰੀ ਹੋਈ ਉਹ ਦੋ ਦਿਨ ਬਰੀਵਾਲਾ ਦੇ ਨੈਬ ਤਹਿਸੀਲਦਾਰ ਛੁੱਟੀ ਤੇ ਸਨ ਅਤੇ ਰਣਜੀਤ ੰਿਸੰਘ ਖਹਿਰਾ ਦੀ ਡਿਊਟੀ ਬਰੀਵਾਲਾ ਤਹਿਸੀਲ ਵਿਖੇ ਲਗਾਈ ਗਈ ਸੀ। ਖਹਿਰਾ ਨਾਲ ਜਦ ਇਸ ਮਾਮਲੇ ਸਬੰਧੀ ਫੋਨ ਤੇ ਗੱਲਬਾਤ ਕੀਤੀ ਗਈ ਤਾਂ ਉਹਨਾਂ ਕਿਹਾ ਕਿ ਇਸੇ ਜਗ੍ਹਾ ਨੇੜੇ ਨਹਿਰੀ ਜਮੀਨ ਵੀ ਪੈਂਦੀ ਹੈ ਅਤੇ ਖਰੀਦਦਾਰ ਵੱਲੋਂ ਇਸ ਤਰ੍ਹਾਂ ਧੋਖਾਧੜੀ ਕਰਕੇ ਇਹ ਰਜਿਸਟਰੀ ਕਰਵਾ ਲਈ ਗਈ। ਖਹਿਰਾ ਨੇ ਮੰਨਿਆ ਕਿ ਇਸ ਰਜਿਸਟਰੀ ਰਾਹੀ ਸਰਕਾਰੀ ਅਸ਼ਟਾਮ ਫੀਸ ਦੀ ਚੋਰੀ ਹੋਈ ਹੈ।
ਕੀ ਕਹਿੰਦਾ ਹੈ ਖਰੀਦਦਾਰ
ਜਦ ਇਸ ਮਾਮਲੇ ਵਿਚ ਖਰੀਦਦਾਰ ਵਿਨੋਦ ਕੁਮਾਰ ਉਰਫ਼ ਲਵਲੀ ਚੁਚਰਾ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਹਨਾਂ ਕਿਹਾ ਕਿ ਉਹਨਾਂ ਦੀ ਰਜਿਸਟਰੀ ਉਸ ਸਮੇਂ ਤਹਿਸੀਲਦਾਰ ਵੱਲੋਂ ਕੀਤੀ ਗਈ ਅਤੇ ਇਹ ਸਭ ਕੁਝ ਵਿਭਾਗੀ ਅਧਿਕਾਰੀਆਂ ਨੇ ਹੀ ਚੈਕ ਕਰਨਾ ਸੀ।
ਚਰਚਾਵਾਂ ਵਿਚ ਰਜਿਸਟਰੀ ਦੀ ਕਹਾਣੀ
ਇਹ ਰਜਿਸਟਰੀ ਸਬੰਧੀ ਚਰਚਾਵਾਂ ਦਾ ਬਜ਼ਾਰ ਵੀ ਗਰਮ ਹੈ। ਹੁਣ ਜਦ ਇਸ ਕਾਲੋਨੀ ਦੇ ਪੰਜ ਏਕੜ ਵਿਚੋਂ ਕਰੀਬ ਡੇਢ ਏਕੜ ਦੀ ਰਜਿਸਟਰੀ ਕਰਵਾਈ ਗਈ ਹੈ ਤਾਂ ਇਸਦੇ ਤੱਥ ਸਾਹਮਣੇ ਆਉਣ ਤੇ ਇਹ ਚਰਚਾਵਾਂ ਜ਼ੋਰਾਂ ਤੇ ਹਨ ਕਿ ਇਸ ਸਾਰੇ ਕਾਰੇ ਵਿਚ ਉਸ ਸਮੇਂ ਦੇ ਜਿਲ੍ਹਾ ਪੱਧਰ ਦੇ ਉੱਚ ਅਧਿਕਾਰੀ ਦੀ ਸ਼ਮੂਲੀਅਤ ਸੀ ਅਤੇ ਉਸ ਉੱਚ ਅਧਿਕਾਰੀ ਦੇ ਕਹਿਣ ਤੇ ਹੀ ਉਸ ਸਮੇਂ ਬਰੀਵਾਲਾ ਦੇ ਨੈਬ ਤਹਿਸੀਲਦਾਰ ਛੁੱਟੀ ਤੇ ਗਏ ਅਤੇ ਸ੍ਰੀ ਮੁਕਤਸਰ ਸਾਹਿਬ ਦੇ ਨੈਬ ਤਹਿਸੀਲਦਾਰ ਦੀ ਡਿਊਟੀ ਅਜਿਹੀ ਰਜਿਸਟਰੀ ਕਰਨ ਤੇ ਲਾਈ ਗਈ। ਇਹ ਤਾਂ ਹੁਣ ਜਾਂਚ ਦੌਰਾਨ ਹੀ ਸਾਹਮਣੇ ਆ ਸਕਦਾ ਹੈ ਕਿ ਇਹਨਾਂ ਚਰਚਾਵਾਂ ਵਿਚ ਕਿੰਨੀ ਕੁ ਸੱਚਾਈ ਹੈ।