ਕੀ ਤੁਹਾਡੇ ਸੋਫੇ ਵਿੱਚੋਂ ਆਉਂਦੀ ਹੈ ਬਦਬੂ? ਅਪਣਾਓ ਇਹ ਘਰੇਲੂ ਨੁਸਖੇ ਅਤੇ ਪਾਓ ਨਵੀਂ ਚਮਕ

ਵੈੱਬ ਡੈਸਕ - ਅੱਜ-ਕੱਲ੍ਹ ਦੇ ਘਰਾਂ 'ਚ ਸੋਫਾ ਸਿਰਫ਼ ਬੈਠਣ ਦੀ ਥਾਂ ਨਹੀਂ ਰਹਿ ਗਿਆ, ਸਗੋਂ ਇਹ ਟੀਵੀ ਦੇਖਣ, ਮਹਿਮਾਨਾਂ ਨਾਲ ਗੱਲਾਂ ਕਰਨ ਅਤੇ ਬੱਚਿਆਂ ਜਾਂ ਪਾਲਤੂ ਜਾਨਵਰਾਂ ਦੇ ਖੇਡਣ ਦਾ ਵੀ ਕੋਨਾ ਬਣ ਜਾਂਦਾ ਹੈ। ਇਸ ਕਾਰਨ ਸੋਫੇ 'ਤੇ ਖਾਣ-ਪੀਣ ਦੇ ਦਾਗ, ਪਸੀਨੇ ਦੀ ਨਮੀ ਅਤੇ ਪਾਲਤੂ ਜਾਨਵਰਾਂ ਦੀ ਬਦਬੂ ਆਉਣਾ ਆਮ ਗੱਲ ਹੈ। ਅਕਸਰ ਲੋਕ ਇਸ ਨੂੰ ਸਾਫ਼ ਕਰਨ ਲਈ ਤੇਜ਼ ਕੈਮੀਕਲ ਵਾਲੇ ਕਲੀਨਰ ਵਰਤਦੇ ਹਨ, ਪਰ ਇਹ ਸੋਫੇ ਦੇ ਕੱਪੜੇ ਨੂੰ ਨੁਕਸਾਨ ਪਹੁੰਚਾ ਸਕਦੇ ਹਨ ਅਤੇ ਸਿਹਤ ਲਈ ਵੀ ਠੀਕ ਨਹੀਂ ਹਨ।

ਬੇਕਿੰਗ ਸੋਡਾ 
ਸਰੋਤਾਂ ਅਨੁਸਾਰ, ਬੇਕਿੰਗ ਸੋਡਾ ਸੋਫੇ ਦੀ ਸਫਾਈ ਲਈ ਇਕ ਬਿਹਤਰੀਨ ਕੁਦਰਤੀ ਡਿਓਡਰਾਈਜ਼ਰ ਹੈ। ਇਹ ਬਦਬੂ ਨੂੰ ਸਿਰਫ਼ ਢਕਦਾ ਨਹੀਂ, ਸਗੋਂ ਜੜ੍ਹ ਤੋਂ ਖਤਮ ਕਰਦਾ ਹੈ ਅਤੇ ਸੋਫੇ 'ਚ ਫਸੀ ਨਮੀ ਨੂੰ ਸੋਖ ਲੈਂਦਾ ਹੈ। ਇਸ ਨਾਲ ਫੰਗਸ ਅਤੇ ਬੈਕਟੀਰੀਆ ਦੇ ਪੈਦਾ ਹੋਣ ਦਾ ਖ਼ਤਰਾ ਵੀ ਘੱਟ ਜਾਂਦਾ ਹੈ।

ਸਫਾਈ ਕਰਨ ਦਾ ਸਹੀ ਤਰੀਕਾ
- ਸੋਫੇ ਨੂੰ ਨਵੇਂ ਵਰਗਾ ਬਣਾਉਣ ਲਈ ਇਨ੍ਹਾਂ ਕਦਮਾਂ ਦੀ ਪਾਲਣਾ ਕੀਤੀ ਜਾ ਸਕਦੀ ਹੈ:

ਤਿਆਰੀ 
- ਸਭ ਤੋਂ ਪਹਿਲਾਂ ਸੋਫੇ ਦੇ ਸਾਰੇ ਕੁਸ਼ਨ ਅਤੇ ਕਵਰ ਹਟਾ ਦਿਓ। ਵੈਕਿਊਮ ਕਲੀਨਰ ਦੀ ਮਦਦ ਨਾਲ ਧੂੜ, ਵਾਲ ਅਤੇ ਮਿੱਟੀ ਦੇ ਕਣਾਂ ਨੂੰ ਸਾਫ਼ ਕਰੋ।

ਟੈਸਟਿੰਗ
- ਪੂਰੇ ਸੋਫੇ 'ਤੇ ਬੇਕਿੰਗ ਸੋਡਾ ਲਗਾਉਣ ਤੋਂ ਪਹਿਲਾਂ ਇਸ ਨੂੰ ਕਿਸੇ ਲੁਕਵੇਂ ਹਿੱਸੇ 'ਤੇ ਲਗਾ ਕੇ 10-15 ਮਿੰਟ ਲਈ ਟੈਸਟ ਕਰੋ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਕੱਪੜੇ ਦਾ ਰੰਗ ਜਾਂ ਟੈਕਸਚਰ ਖ਼ਰਾਬ ਨਾ ਹੋਵੇ।

ਵਰਤੋਂ
- ਹੁਣ ਪੂਰੇ ਸੋਫੇ 'ਤੇ ਇਕਸਾਰ ਬੇਕਿੰਗ ਸੋਡਾ ਛਿੜਕੋ। ਹਲਕੀ ਬਦਬੂ ਲਈ 20-30 ਮਿੰਟ ਅਤੇ ਪਾਲਤੂ ਜਾਨਵਰਾਂ ਦੀ ਜ਼ਿਆਦਾ ਬਦਬੂ ਲਈ ਇਸ ਨੂੰ ਕੁਝ ਘੰਟੇ ਜਾਂ ਪੂਰੀ ਰਾਤ ਲਈ ਛੱਡਿਆ ਜਾ ਸਕਦਾ ਹੈ।

ਵੈਕਿਊਮ
- ਅੰਤ 'ਚ, ਵੈਕਿਊਮ ਕਲੀਨਰ ਦੀ ਮਦਦ ਨਾਲ ਸਾਰਾ ਪਾਊਡਰ ਸਾਫ਼ ਕਰ ਦਿਓ।

 ਖ਼ਾਸ ਸੁਝਾਅ 
ਜੇਕਰ ਪਾਲਤੂ ਜਾਨਵਰ ਨੇ ਸੋਫੇ 'ਤੇ ਪਿਸ਼ਾਬ ਕਰ ਦਿੱਤਾ ਹੈ, ਤਾਂ ਪਹਿਲਾਂ ਉਸ ਹਿੱਸੇ ਨੂੰ ਸੁਕਾ ਲਓ ਅਤੇ ਫਿਰ ਬੇਕਿੰਗ ਸੋਡਾ ਪਾ ਕੇ ਕੁਝ ਘੰਟਿਆਂ ਬਾਅਦ ਵੈਕਿਊਮ ਕਰੋ। ਸੋਫੇ ਨੂੰ ਲੰਬੇ ਸਮੇਂ ਤੱਕ ਫਰੈਸ਼ ਰੱਖਣ ਲਈ ਹਫ਼ਤੇ 'ਚ ਇਕ ਵਾਰ ਵੈਕਿਊਮ ਕਰਨ ਦੀ ਆਦਤ ਪਾਓ ਅਤੇ ਕੁਝ ਵੀ ਡਿੱਗਣ 'ਤੇ ਉਸ ਨੂੰ ਤੁਰੰਤ ਸਾਫ਼ ਕਰੋ। ਹਮੇਸ਼ਾ ਸੋਫੇ ਦੇ ਕੇਅਰ ਇੰਸਟ੍ਰਕਸ਼ਨ ਜ਼ਰੂਰ ਪੜ੍ਹੋ ਕਿਉਂਕਿ ਹਰ ਫੈਬਰਿਕ ਵੱਖਰੇ ਤਰੀਕੇ ਨਾਲ ਪ੍ਰਤੀਕਿਰਿਆ ਕਰਦਾ ਹੈ।