ਘਰ ''ਚ ਆਸਾਨ ਤਰੀਕੇ ਨਾਲ ਬਣਾਓ ਟਮਾਟਰ ਦੀ ਚਟਨੀ

ਵੈੱਬ ਡੈਸਕ- ਕੀ ਤੁਸੀਂ ਵੀ ਰੋਜ਼ਾਨਾ ਉਹੀ ਸਧਾਰਨ ਦਾਲ-ਸਬਜ਼ੀ ਖਾ ਕੇ ਅੱਕ ਚੁੱਕੇ ਹੋ ਅਤੇ ਖਾਣੇ ਵਿਚ ਕੁਝ ਨਵਾਂ ਤੇ ਚਟਪਟਾ ਲੱਭ ਰਹੇ ਹੋ? ਅਕਸਰ ਖਾਣੇ ਦੀ ਥਾਲੀ 'ਚ ਜੇਕਰ ਇਕ ਸਵਾਦਿਸ਼ਟ ਚਟਨੀ ਹੋਵੇ, ਤਾਂ ਸਾਧਾਰਨ ਰੋਟੀ ਦਾ ਸਵਾਦ ਵੀ ਦੁੱਗਣਾ ਹੋ ਜਾਂਦਾ ਹੈ। ਅੱਜ ਅਸੀਂ ਤੁਹਾਡੇ ਲਈ ਲੈ ਕੇ ਆਏ ਹਾਂ ਟਮਾਟਰ ਦੀ ਅਜਿਹੀ ਖਾਸ ਦੇਸੀ ਚਟਨੀ ਦੀ ਰੈਸਿਪੀ, ਜੋ ਨਾ ਸਿਰਫ਼ ਬਣਾਉਣ 'ਚ ਬੇਹੱਦ ਆਸਾਨ ਹੈ, ਸਗੋਂ ਜਿਸ ਦਾ ਸਵਾਦ ਤੁਹਾਨੂੰ ਪੁਰਾਣੇ ਸਮਿਆਂ ਦੇ ਪਿੰਡਾਂ ਵਾਲੇ ਖਾਣੇ ਦੀ ਯਾਦ ਦਿਵਾ ਦੇਵੇਗਾ। 

ਸਮੱਗਰੀ :-
- ਟਮਾਟਰ : 3-4 ਮੱਧਮ ਸਾਈਜ਼ ਦੇ (ਬਾਰੀਕ ਕੱਟੇ ਹੋਏ)
- ਪਿਆਜ਼ : 1 ਬਾਰੀਕ ਕੱਟਿਆ ਹੋਇਆ 
- ਹਰੀਆਂ ਮਿਰਚਾਂ : 2-3 (ਬਾਰੀਕ ਕੱਟੀਆਂ ਹੋਈਆਂ)
- ਲਸਣ : 4-5 ਤੁਰੀਆਂ (ਬਾਰੀਕ ਕੱਟੀਆਂ ਹੋਈਆਂ)
-  ਅਦਰਕ : 1 ਛੋਟਾ ਟੁਕੜਾ (ਕੱਦੂਕਸ ਕੀਤਾ ਹੋਇਆ)
- ਮਸਾਲੇ : ਨਮਕ (ਸੁਆਦ ਅਨੁਸਾਰ), ਲਾਲ ਮਿਰਚ ਪਾਊਡਰ (ਅੱਧਾ ਚਮਚ), ਹਲਦੀ (ਥੋੜ੍ਹੀ ਜਿਹੀ)
- ਤੜਕੇ ਲਈ : 1 ਚਮਚ ਤੇਲ, ਜੀਰਾ (ਅੱਧਾ ਚਮਚ), ਰਾਈ (ਅੱਧਾ ਚਮਚ)
- ਹੋਰ : ਹਰਾ ਧਨੀਆ ਅਤੇ ਥੋੜ੍ਹੀ ਜਿਹੀ ਚੀਨੀ ਜਾਂ ਗੁੜ (ਸੁਆਦ ਵਧਾਉਣ ਲਈ)

ਬਣਾਉਣ ਦਾ ਤਰੀਕਾ :-
- ਇਕ ਕੜਾਹੀ 'ਚ ਤੇਲ ਗਰਮ ਕਰੋ। ਉਸ 'ਚ ਜੀਰਾ ਅਤੇ ਰਾਈ ਪਾਓ। ਜਦੋਂ ਜੀਰਾ ਚਟਕਣ ਲੱਗੇ ਤਾਂ ਲਸਣ, ਅਦਰਕ ਅਤੇ ਹਰੀਆਂ ਮਿਰਚਾਂ ਪਾ ਕੇ ਹਲਕਾ ਭੁੰਨੋ।
- ਹੁਣ ਬਾਰੀਕ ਕੱਟਿਆ ਹੋਇਆ ਪਿਆਜ਼ ਪਾਓ ਅਤੇ ਇਸ ਨੂੰ ਹਲਕਾ ਗੁਲਾਬੀ ਹੋਣ ਤੱਕ ਪਕਾਓ।
- ਹੁਣ ਕੱਟੇ ਹੋਏ ਟਮਾਟਰ ਕੜਾਹੀ 'ਚ ਪਾ ਦਿਓ। ਨਾਲ ਹੀ ਨਮਕ, ਹਲਦੀ ਅਤੇ ਲਾਲ ਮਿਰਚ ਪਾਊਡਰ ਪਾ ਕੇ ਮਿਕਸ ਕਰੋ।
-ਕੜਾਹੀ ਨੂੰ ਢੱਕ ਦਿਓ ਅਤੇ 5-7 ਮਿੰਟ ਲਈ ਮੱਧਮ ਅੱਗ 'ਤੇ ਪਕਾਓ ਜਦੋਂ ਤੱਕ ਟਮਾਟਰ ਨਰਮ ਨਾ ਹੋ ਜਾਣ, ਵਿਚ-ਵਿਚ ਚਮਚ ਨਾਲ ਟਮਾਟਰਾਂ ਨੂੰ ਮੈਸ਼ (ਕੁੱਟਦੇ) ਕਰਦੇ ਰਹੋ।
- ਜੇਕਰ ਤੁਸੀਂ ਖੱਟੀ-ਮਿੱਠੀ ਚਟਨੀ ਪਸੰਦ ਕਰਦੇ ਹੋ, ਤਾਂ ਇਸ ਵਿਚ ਇਕ ਚਮਚ ਚੀਨੀ ਜਾਂ ਥੋੜ੍ਹਾ ਜਿਹਾ ਗੁੜ ਪਾ ਦਿਓ। ਇਹ ਟਮਾਟਰ ਦੀ ਖਟਾਸ ਨੂੰ ਬਹੁਤ ਵਧੀਆ ਸੰਤੁਲਿਤ ਕਰਦਾ ਹੈ।
- ਜਦੋਂ ਚਟਨੀ ਤੇਲ ਛੱਡ ਦੇਵੇ ਅਤੇ ਗਾੜ੍ਹੀ ਹੋ ਜਾਵੇ, ਤਾਂ ਗੈਸ ਬੰਦ ਕਰ ਦਿਓ ਅਤੇ ਉੱਪਰੋਂ ਬਾਰੀਕ ਕੱਟਿਆ ਹਰਾ ਧਨੀਆ ਪਾ ਦਿਓ।

ਜੇਕਰ ਤੁਸੀਂ ਇਸ ਨੂੰ ਹੋਰ ਵੀ ਦੇਸੀ ਤਰੀਕੇ ਨਾਲ ਬਣਾਉਣਾ ਚਾਹੁੰਦੇ ਹੋ, ਤਾਂ ਟਮਾਟਰਾਂ ਨੂੰ ਗੈਸ 'ਤੇ ਭੁੰਨ ਲਓ, ਫਿਰ ਉਨ੍ਹਾਂ ਦਾ ਛਿਲਕਾ ਉਤਾਰ ਕੇ ਹੱਥਾਂ ਨਾਲ ਮੈਸ਼ ਕਰਕੇ ਕੱਚੇ ਪਿਆਜ਼ ਅਤੇ ਮਿਰਚਾਂ ਪਾ ਕੇ ਬਣਾਓ। ਇਸ ਨੂੰ 'ਟਮਾਟਰ ਦਾ ਭੜਥਾ' ਜਾਂ 'ਚੋਖਾ' ਵੀ ਕਿਹਾ ਜਾਂਦਾ ਹੈ।