ਬੱਚਿਆਂ ਨੂੰ ਹੈਂਡ ਸੈਨੀਟਾਈਜ਼ਰ ਦੀ ਬਜਾਏ ਸਾਬਣ ਨਾਲ ਹੱਥ ਧੋਣ ਦੀ ਪਾਓ ਆਦਤ, ਜਾਣੋ ਕਿਉਂ?

ਨਵੀਂ ਦਿੱਲੀ : ਕੋਰੋਨਾ ਵਾਇਰਸ ਤੋਂ ਬਚਣ ਦੇ ਦੋ ਮੁੱਖ ਤਰੀਕੇ ਹਨ। ਪਹਿਲਾ ਮਾਸਕ ਪਾ ਕੇ ਰੱਖਣਾ ਅਤੇ ਦੂਜਾ ਹੱਥਾਂ ਦੀ ਸਾਫ਼-ਸਫਾਈ ਪਰ ਅਕਸਰ ਵੇਖਿਆ ਗਿਆ ਹੈ ਕਿ ਲੋਕ ਸਾਬਣ ਨਾਲ ਹੱਥ ਧੋਣ ਦੀ ਬਜਾਏ ਸੈਨੀਟਾਈਜ਼ਰ ਦਾ ਇਸਤੇਮਾਲ ਜ਼ਿਆਦਾ ਕਰਦੇ ਹਨ। ਕੁੱਝ ਮਾਪਿਆਂ ਨੇ ਤਾਂ ਬੱਚਿਆਂ ਦੀ ਜੇਬ ਵਿਚ ਰੱਖਣ ਲਈ ਹੈਂਡ ਸੈਨੀਟਾਈਜ਼ਰ ਦਾ ਸਟਾਕ ਆਪਣੇ ਕੋਲ ਇਕੱਠਾ ਕਰਕੇ ਰੱਖ ਲਿਆ ਹੈ ਪਰ ਕੀ ਤੁਸੀਂ ਜਾਣਦੇ ਹੋ ਬੱਚਿਆਂ ਲਈ ਹੈਂਡ ਸੈਨੀਟਾਈਜ਼ਰ ਦਾ ਇਸਤੇਮਾਲ ਥੋੜ੍ਹਾ ਖਤਰਨਾਕ ਹੋ ਸਕਦਾ ਹੈ।

ਕੀ ਹੈ ਵਜ੍ਹਾ?
ਹੈਂਡ ਸੈਨੀਟਾਈਜ਼ਰ ਵਿਚ ਕੀਟਾਣੂਆਂ ਨੂੰ ਮਾਰਨ ਲਈ ਅਲਕੋਹਲ ਮੌਜੂਦ ਹੁੰਦੀ ਹੈ। ਹੁਣ ਬੱਚੇ ਤਾਂ ਬੱਚੇ ਹਨ,  ਜੇਕਰ ਤੁਸੀਂ ਉਨ੍ਹਾਂ ਨੂੰ ਨਹੀਂ ਦੱਸੋਗੇ ਕਿ ਹੈਂਡ ਸੈਨੀਟਾਈਜ਼ਰ ਲਗਾਉਣ ਤੋਂ ਬਾਅਦ ਹੱਥ ਮੂੰਹ ਕੋਲ ਨਹੀਂ ਲੈ ਕੇ ਜਾਣੇ ਤਾਂ ਬੱਚੇ ਇਹ ਗਲਤੀ ਕਰ ਸਕਦੇ ਹਨ। ਕਈ ਵਾਰ ਬੱਚਿਆਂ ਨੂੰ ਸਮਝਾਉਣ ਦੇ ਬਾਵਜੂਦ ਅਣਜਾਣੇ ਵਿਚ ਉਹ ਅਜਿਹਾ ਕਰ ਦਿੰਦੇ ਹਨ। ਉਨ੍ਹਾਂ ਦੀ ਇਸ ਨਾ-ਸਮੱਝੀ ਕਾਰਨ ਉਨ੍ਹਾਂ ਦੇ ਮੂੰਹ ਵਿਚ ਸੈਨੀਟਾਈਜ਼ਰ ਵਿਚ ਮੌਜੂਦ ਅਲਕੋਹਲ ਚੱਲੀ ਜਾਂਦੀ ਹੈ, ਜੋ ਉਨ੍ਹਾਂ ਦੀ ਸਿਹਤ ਨੂੰ ਅੱਗੇ ਚੱਲ ਕੇ ਨੁਕਸਾਨ ਪਹੁੰਚਾ ਸਕਦੀ ਹੈ।

ਅਜਿਹੇ ਵਿਚ ਕੀ ਕੀਤਾ ਜਾਵੇ?
ਬੱਚਿਆਂ ਨੂੰ ਸਮਝਾਓ ਕਿ ਇਧਰ-ਉਧਰ ਬਿਨਾਂ-ਵਜ੍ਹਾ ਚੀਜ਼ਾਂ ਨੂੰ ਹੱਥ ਨਾ ਲਗਾਉਣ।
ਸੈਨੀਟਾਈਜ਼ਰ ਤੋਂ ਜ਼ਿਆਦਾ ਉਨ੍ਹਾਂ ਨੂੰ ਸਾਬਣ ਨਾਲ ਹੱਥਾਂ ਨੂੰ ਵਾਰ-ਵਾਰ ਧੋਣਾ ਸਿਖਾਓ।
ਹਰ 1 ਘੰਟੇ ਬਾਅਦ ਉਨ੍ਹਾਂ ਨੂੰ ਸਾਬਣ ਨਾਲ ਹੱਥ ਧੋਣ ਲਈ ਕਹੋ।
ਬੱਚਿਆਂ ਲਈ ਘਰ ਵਿਚ ਹੀ ਹੈਂਡ ਸੈਨੀਟਾਈਜ਼ਰ ਬਣਾਓ।

ਘਰ ਵਿਚ ਹੈਂਡ ਸੈਨੀਟਾਈਜ਼ਰ ਬਣਾਉਣ ਦਾ ਤਰੀਕਾ
ਐਲੋਵੇਰਾ ਜੈਲ
ਡਿਸਟਿਲਡ ਵਾਟਰ
ਲੌਂਗ ਅਸੈਂਸ਼ੀਅਲ ਤੇਲ
ਲੈਵੇਂਡਰ ਅਸੈਂਸ਼ੀਅਲ ਤੇਲ
ਵਿਟਾਮਿਨ-ਈ ਤੇਲ

ਇਨ੍ਹਾਂ ਸਾਰੀਆਂ ਚੀਜ਼ਾਂ ਨੂੰ ਮਿਕਸ ਕਰੋ
ਇਕ ਚੌਥਾਈ ਕੱਪ ਐਲੋਵੇਰਾ ਜੈਲ ਵਿਚ 1 ਚੌਥਾਈ ਚਮਚ ਵਿਟਾਮਿਨ-ਈ ਆਇਲ ਪਾਓ। ਇਸ ਮਿਸ਼ਰਣ ਵਿਚ ਲੌਂਗ ਅਸੈਂਸ਼ੀਅਲ ਤੇਲ ਦੀਆਂ 2 ਬੂੰਦਾਂ ਅਤੇ ਲੈਵੇਂਡਰ ਅਸੈਂਸ਼ੀਅਲ ਤੇਲ ਦੀਆਂ 2 ਬੂੰਦਾਂ ਪਾਓ। ਇਸ ਨੂੰ ਮਿਕਸ ਹੋਣ ਲਈ ਕੁੱਝ ਮਿੰਟ ਛੱਡ ਦਿਓ। ਇਸ ਤੋਂ ਬਾਅਦ, ਇਸ ਵਿਚ 1 ਤੋਂ 2 ਵੱਡੇ ਚਮਚ ਡਿਸਟਿਲਡ ਵਾਟਰ ਪਾਓ। ਤੁਹਾਡਾ ਘਰ ਵਿਚ ਬਣਿਆ ਹੈਂਡ ਸੈਨੀਟਾਈਜ਼ਰ ਤਿਆਰ ਹੈ।

ਖੁਦ ਵੀ ਕਰੋ ਘਰ ’ਚ ਬਣੇ ਸੈਨੀਟਾਈਜ਼ਰ ਦਾ ਇਸਤੇਮਾਲ
ਬੱਚੇ ਹੀ ਨਹੀਂ ਤੁਸੀਂ ਖੁਦ ਵੀ ਘਰ ਵਿਚ ਬਣੇ ਸੈਨੀਟਾਈਜ਼ਰ ਦਾ ਹੀ ਇਸਤੇਮਾਲ ਕਰੋ। ਅਲਕੋਹਲ ਯੁਕਤ ਸੈਨੀਟਾਈਜ਼ਰ ਦੇ ਇਸਤੇਮਾਲ ਨਾਲ ਹੱਥਾਂ ’ਤੇ ਐਲਰਜੀ ਦਾ ਡਰ ਬਣਿਆ ਰਹਿੰਦਾ ਹੈ। ਕਈ ਵਾਰ ਹੱਥਾਂ ’ਤੇ ਰੈਸ਼ੇਜ ਅਤੇ ਦਾਣੇ ਵੀ ਨਿਕਲ ਆਉਂਦੇ ਹਨ। ਖਾਸਤੌਰ ’ਤੇ ਜਿਨ੍ਹਾਂ ਲੋਕਾਂ ਨੂੰ ਚਮੜੀ ਐਲਰਜੀ ਦੀ ਸਮੱਸਿਆ ਹੈ, ਉਨ੍ਹਾਂ ਨੂੰ ਮਾਰਕਿਟ ਵਿਚ ਮਿਲਣ ਵਾਲੇ ਸੈਨੀਟਾਈਜ਼ਰ ਦਾ ਇਸਤੇਮਾਲ ਘੱਟ ਕਰਨਾ ਚਾਹੀਦਾ ਹੈ।