ਜੰਮੂ ''ਚ ਸਰਹੱਦੀ ਖੇਤਰ ''ਤੇ ਪਾਕਿ ਵਲੋਂ ਗੋਲਾਬਾਰੀ, 13 ਲੋਕ ਜ਼ਖਮੀ

ਜੰਮੂ— ਜੰਮੂ ਤੇ ਸਾਂਬਾ ਸੈਕਟਰ 'ਚ ਸਰਹੱਦ 'ਤੇ ਗ੍ਰਾਮੀਣ ਇਲਾਕਿਆਂ ਅਤੇ ਫੌਜ ਦੀਆਂ ਚੌਕੀਆਂ ਨੂੰ ਪਾਕਿਸਤਾਨੀ ਫੌਜ ਵਲੋਂ ਨਿਸ਼ਾਨਾ ਬਣਾਇਆ ਗਿਆ। ਪਾਕਿ ਵਲੋਂ ਕੀਤੀ ਗਈ ਗੋਲਾਬਾਰੀ ਦੌਰਾਨ ਘੱਟ ਤੋਂ ਘੱਟ 13 ਲੋਕ ਜ਼ਖਮੀ ਹੋ ਗਏ ਅਤੇ 20 ਤੋਂ ਜ਼ਿਆਦਾ ਸਰਹੱਦੀ ਚੌਕੀਆਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਅਧਿਕਾਰਕ ਸੂਤਰਾਂ ਨੇ ਦੱਸਿਆ ਕਿ ਪਾਕਿਸਤਾਨੀ ਫੌਜ ਨੇ ਇਕ ਵਾਰ ਫਿਰ ਆਰ. ਐੱਸ. ਪੁਰਾ, ਅਰਨੀਆ ਅਤੇ ਅੰਤਰਰਾਸ਼ਟਰੀ ਸਰਹੱਦ 'ਤੇ ਰਾਮਗੜ੍ਹ ਸੈਕਟਰ 'ਚ ਫੌਜ ਦੀਆਂ ਚੌਕੀਆਂ ਸਮੇਤ ਗ੍ਰਾਮੀਣ ਇਲਾਕਿਆਂ ਨੂੰ ਨਿਸ਼ਾਨਾ ਬਣਾ ਕੇ ਗੋਲਾਬਾਰੀ ਕੀਤੀ। 
ਸੂਤਰਾਂ ਮੁਤਾਬਕ ਸੋਮਵਾਰ ਨੂੰ ਸ਼ਾਮ 7 ਵਜੇ ਤੋਂ ਬਾਅਦ ਪਾਕਿਸਤਾਨੀ ਰੇਂਜਰਾਂ ਨੇ ਅਰਨੀਆ ਸੈਕਟਰ 'ਚ ਭਾਰੀ ਮੋਰਟਾਰ ਗੋਲਾਬਾਰੀ ਕਰਨੀ ਸ਼ੁਰੂ ਕਰ ਦਿੱਤੀ, ਜੋ ਮੰਗਲਵਾਰ ਦਿਨ ਭਰ ਅਤੇ ਰਾਤ ਤਕ ਜਾਰੀ ਰਹੀ। ਆਰ. ਐੱਸ. ਪੁਰਾ, ਰਾਮਗੜ੍ਹ ਅਤੇ ਅਰਨੀਆ ਸੈਕਟਰਾਂ 'ਚ ਪਾਕਿਸਤਾਨੀ ਗੋਲਾਬਾਰੀ 'ਚ ਘੱਟ ਤੋਂ ਘੱਟ 13 ਨਾਗਰਿਕ ਜ਼ਖਮੀ ਹੋਏ ਹਨ। ਜਿਨ੍ਹਾਂ 'ਚੋਂ 3 ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ। ਪਾਕਿਸਤਾਨੀ ਫੌਜ ਨੇ ਮੰਗਲਵਾਰ ਸ਼ਾਮ ਕਾਨਾਚਕ ਖੇਤਰ 'ਚ ਵੀ ਗੋਲਾਬਾਰੀ ਕੀਤੀ। ਪਾਕਿਸਤਾਨੀ ਗੋਲਾਬਾਰੀ ਨੂੰ ਦੇਖਦੇ ਹੋਏ ਜ਼ਿਲਾ ਪ੍ਰਸ਼ਾਸਨ ਨੇ ਆਰ. ਐੱਸ. ਪੂਰਾ ਅਤੇ ਅਰਨੀਆ 'ਚ ਸਰਕਾਰੀ ਇਮਾਰਤਾਂ 'ਚ ਅਸਥਾਈ ਰਾਹਤ ਅਤੇ ਆਰਾਮ ਲਈ ਕੈਂਪ ਬਣਾਏ ਹਨ ਜਿਥੇ ਨਾਗਰਿਕਾਂ ਨੂੰ ਠਹਿਰਾਇਆ ਜਾ ਰਿਹਾ ਹੈ। ਇਨ੍ਹਾਂ ਕੈਂਪਾਂ 'ਚ ਸਰਹੱਦ 'ਤੇ ਪ੍ਰਭਾਵਿਤ ਪਿੰਡਾਂ ਦੇ 500 ਤੋਂ ਜ਼ਿਆਦਾ ਲੋਕ ਰੁਕੇ ਹਨ। ਗੋਲਾਬਾਰੀ 'ਚ ਜ਼ਖਮੀ ਨਾਗਰਿਕਾਂ ਨੂੰ ਤੁਰੰਤ ਸਰਹੱਦ ਸੁਰੱਖਿਆ ਬਲ (ਬੀ. ਐੱਸ. ਐੱਫ) ਅਤੇ ਜ਼ਿਲਾ ਪ੍ਰਸ਼ਾਸਨ ਦੇ ਕਰਮਚਾਰੀਆਂ ਵਲੋਂ ਹਸਪਤਾਲ ਪਹੁੰਚਾਇਆ ਗਿਆ।  ਸੂਤਰਾਂ ਨੇ ਕਿਹਾ ਕਿ ਬੀ. ਐੱਸ. ਐੱਫ. ਪਾਕਿਸਤਾਨ ਵਲੋਂ ਕੀਤੀ ਗਈ ਗੋਲਾਬਾਰੀ ਦਾ ਮੂੰਹ ਤੋੜ ਜਵਾਬ ਦਿੱਤਾ ਗਿਆ।