ਪਾਇਲਟ ਬਚਾਉਣ ਦੇ ਬਹਾਨੇ ਈਰਾਨ ਦਾ ਯੂਰੇਨੀਅਮ ਚੋਰੀ ਕਰਨਾ ਚਾਹੁੰਦਾ ਸੀ US, ਈਰਾਨ ਦੇ ਦਾਅਵੇ ਨਾਲ ਮਚੀ ਸਨਸਨੀ!

ਤਹਿਰਾਨ : ਈਰਾਨ ਅਤੇ ਅਮਰੀਕਾ ਵਿਚਾਲੇ ਚੱਲ ਰਹੀ ਜੰਗ ਦੌਰਾਨ ਇਕ ਨਵਾਂ ਅਤੇ ਸਨਸਨੀਖੇਜ਼ ਮੋੜ ਸਾਹਮਣੇ ਆਇਆ ਹੈ। ਈਰਾਨ ਦੇ ਵਿਦੇਸ਼ ਮੰਤਰਾਲੇ ਨੇ ਦਾਅਵਾ ਕੀਤਾ ਹੈ ਕਿ ਅਮਰੀਕੀ ਫੌਜ ਨੇ ਆਪਣੇ ਪਾਇਲਟ ਅਤੇ ਚਾਲਕ ਦਲ ਦੇ ਮੈਂਬਰਾਂ ਨੂੰ ਬਚਾਉਣ ਦੀ ਆੜ ਵਿੱਚ ਈਰਾਨ ਦੇ 'ਐਨਰਿਚਡ ਯੂਰੇਨੀਅਮ' (Enriched Uranium) ਨੂੰ ਚੋਰੀ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ। 

ਕੀ ਹੈ ਪੂਰਾ ਮਾਮਲਾ? 

ਜ਼ਿਕਰਯੋਗ ਹੈ ਕਿ ਬੀਤੇ ਸ਼ੁੱਕਰਵਾਰ 3 ਅਪ੍ਰੈਲ 2026 ਨੂੰ ਈਰਾਨੀ ਫੌਜ ਨੇ ਅਮਰੀਕਾ ਦੇ ਇੱਕ F-15E ਸਟ੍ਰਾਈਕ ਈਗਲ ਜਹਾਜ਼ ਨੂੰ ਡੇਗ ਦਿੱਤਾ ਸੀ। ਇਸ ਜਹਾਜ਼ ਦੇ ਦੋ ਮੈਂਬਰਾਂ ਵਿੱਚੋਂ ਪਾਇਲਟ ਨੂੰ ਤਾਂ ਜਲਦੀ ਬਚਾ ਲਿਆ ਗਿਆ ਸੀ, ਪਰ ਦੂਜਾ ਅਧਿਕਾਰੀ (WSO), ਜੋ ਕਿ ਕਰਨਲ ਰੈਂਕ ਦਾ ਸੀ, ਕਰੀਬ 48 ਘੰਟਿਆਂ ਤੱਕ ਪਹਾੜੀ ਇਲਾਕਿਆਂ ਵਿੱਚ ਲੁਕਿਆ ਰਿਹਾ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਸ ਰੈਸਕਿਊ ਆਪ੍ਰੇਸ਼ਨ ਨੂੰ ਅਮਰੀਕੀ ਇਤਿਹਾਸ ਦਾ ਸਭ ਤੋਂ ਦਲੇਰਾਨਾ ਮਿਸ਼ਨ ਦੱਸਿਆ ਹੈ। 

ਇਹ ਵੀ ਪੜ੍ਹੋ : ਈਰਾਨ 'ਚ ਅਮਰੀਕੀ ਪਾਇਲਟ ਦਾ ਇਤਿਹਾਸਕ ਰੈਸਕਿਊ, ਟਰੰਪ ਨੇ ਸੁਣਾਈ 155 ਜਹਾਜ਼ਾਂ ਵਾਲੇ ਮਿਸ਼ਨ ਦੀ ਕਹਾਣੀ

ਈਰਾਨ ਨੇ ਪ੍ਰਗਟਾਇਆ ਸ਼ੱਕ 

ਈਰਾਨੀ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਇਸਮਾਈਲ ਬਗਈ ਨੇ ਸੋਮਵਾਰ ਨੂੰ ਇੱਕ ਪ੍ਰੈੱਸ ਕਾਨਫਰੰਸ ਦੌਰਾਨ ਕਿਹਾ ਕਿ ਇਸ ਆਪ੍ਰੇਸ਼ਨ ਦੇ ਪਿੱਛੇ ਅਮਰੀਕਾ ਦੀ ਕੋਈ ਵੱਡੀ ਧੋਖੇਬਾਜ਼ੀ ਹੋ ਸਕਦੀ ਹੈ। ਉਨ੍ਹਾਂ ਮੁਤਾਬਕ, ਜਿੱਥੇ ਅਮਰੀਕੀ ਜਹਾਜ਼ ਕ੍ਰੈਸ਼ ਹੋਇਆ ਸੀ, ਉਹ ਥਾਂ ਅਤੇ ਜਿੱਥੇ ਅਮਰੀਕੀ ਫੌਜ ਨੇ ਰੈਸਕਿਊ ਆਪ੍ਰੇਸ਼ਨ ਚਲਾਇਆ, ਉਨ੍ਹਾਂ ਵਿਚਕਾਰ ਕਾਫੀ ਦੂਰੀ ਸੀ। ਈਰਾਨ ਦਾ ਕਹਿਣਾ ਹੈ ਕਿ ਅਮਰੀਕੀ ਫੌਜ ਨੇ ਮੁੱਖ ਤੌਰ 'ਤੇ ਇਸਫਹਾਨ ਸੂਬੇ ਵਿੱਚ ਆਪ੍ਰੇਸ਼ਨ ਚਲਾਇਆ, ਜਿੱਥੇ ਈਰਾਨ ਦਾ ਮੁੱਖ ਪ੍ਰਮਾਣੂ ਕੇਂਦਰ ਸਥਿਤ ਹੈ। ਬਗਈ ਨੇ ਸ਼ੱਕ ਜ਼ਾਹਿਰ ਕੀਤਾ ਕਿ ਪਾਇਲਟ ਨੂੰ ਬਚਾਉਣ ਦਾ ਬਹਾਨਾ ਬਣਾ ਕੇ ਅਮਰੀਕਾ ਦਾ ਅਸਲ ਨਿਸ਼ਾਨਾ ਈਰਾਨ ਦੇ ਯੂਰੇਨੀਅਮ ਭੰਡਾਰ 'ਤੇ ਕਬਜ਼ਾ ਕਰਨਾ ਸੀ। 

ਅਮਰੀਕਾ ਨੂੰ ਹੋਇਆ ਵੱਡਾ ਨੁਕਸਾਨ 

ਰਿਪੋਰਟਾਂ ਅਨੁਸਾਰ, ਇਸ ਜੰਗ ਵਿੱਚ ਅਮਰੀਕਾ ਨੂੰ ਹੁਣ ਤੱਕ ਭਾਰੀ ਮਾਲੀ ਨੁਕਸਾਨ ਝੱਲਣਾ ਪਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਅਮਰੀਕਾ ਦੇ ਹੁਣ ਤੱਕ 29 ਜਹਾਜ਼ ਡਿੱਗ ਚੁੱਕੇ ਹਨ, ਜਿਸ ਨਾਲ ਕਰੀਬ 15,000 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ। ਹਾਲਾਂਕਿ ਅਮਰੀਕਾ ਨੇ ਯੂਰੇਨੀਅਮ ਚੋਰੀ ਕਰਨ ਦੀ ਅਜਿਹੀ ਕਿਸੇ ਵੀ ਯੋਜਨਾ ਤੋਂ ਇਨਕਾਰ ਕੀਤਾ ਹੈ, ਪਰ ਈਰਾਨ ਦੇ ਇਸ ਦਾਅਵੇ ਨੇ ਵਿਸ਼ਵ ਪੱਧਰ 'ਤੇ ਹਲਚਲ ਮਚਾ ਦਿੱਤੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8