ਮੰਗਲ ਗ੍ਰਹਿ ’ਤੇ ਮਿਲੇ ਪ੍ਰਾਚੀਨ ਜੀਵਨ ਦੇ ਮਜ਼ਬੂਤ ​​ਸੰਕੇਤ!

ਕੇਪ ਕੇਨਾਵੇਰਲ (ਭਾਸ਼ਾ) – ਅਮਰੀਕੀ ਪੁਲਾੜ ਏਜੰਸੀ ਨਾਸਾ ਦੇ ਮੰਗਲ ਗ੍ਰਹਿ ’ਤੇ ਭੇਜੇ ਗਏ ਰੋਵਰ ‘ਪਰਸੀਵਰੈਂਸ’ ਨੇ ਇਕ ਸੁੱਕੀ ਨਦੀ ਦੇ ਤਲ ਵਿਚ ਚੱਟਾਨਾਂ ਦੀ ਖੋਜ ਕੀਤੀ ਹੈ, ਜਿਨ੍ਹਾਂ ਵਿਚ ਪ੍ਰਾਚੀਨ ਸੂਖਮ ਜੀਵਨ ਦੇ ਸੰਭਾਵਿਤ ਸੰਕੇਤ ਹੋ ਸਕਦੇ ਹਨ।

ਵਿਗਿਆਨੀਆਂ ਨੇ ਕਿਹਾ ਕਿ ਕਿਸੇ ਵੀ ਸਿੱਟੇ ’ਤੇ ਪਹੁੰਚਣ ਤੋਂ ਪਹਿਲਾਂ ‘ਪਰਸੀਵਰੈਂਸ’ ਦੁਆਰਾ ਇਕੱਠੇ ਕੀਤੇ ਗਏ ਨਮੂਨਿਆਂ ਦਾ ਧਰਤੀ ’ਤੇ ਪ੍ਰਯੋਗਸ਼ਾਲਾ ਵਿਚ ਪੂਰੀ ਤਰ੍ਹਾਂ ਵਿਸ਼ਲੇਸ਼ਣ ਕਰਨ ਦੀ ਲੋੜ ਹੈ। ਇਹ ਰੋਵਰ, ਜੋ 2021 ਤੋਂ ਮੰਗਲ ਗ੍ਰਹਿ ’ਤੇ ਘੁੰਮ ਰਿਹਾ ਹੈ, ਸਿੱਧੇ ਤੌਰ ’ਤੇ ਜੀਵਨ ਦਾ ਪਤਾ ਨਹੀਂ ਲਾ ਸਕਦਾ। ਇਸ ਦੀ ਬਜਾਏ ਇਹ ਅਰਬਾਂ ਸਾਲ ਪਹਿਲਾਂ ਜੀਵਨ ਲਈ ਸਭ ਤੋਂ ਢੁਕਵੇਂ ਮੰਨੇ ਜਾਂਦੇ ਸਥਾਨਾਂ ਤੋਂ ਇਕੱਠੇ ਕੀਤੇ ਨਮੂਨਿਆਂ ਨੂੰ ਰੱਖਣ ਲਈ ਚੱਟਾਨਾਂ ਅਤੇ ਟਿਊਬਾਂ ’ਚ ਛੇਕ ਕਰਨ ਲਈ ਇਕ ਡ੍ਰਿਲ ਲੈ ਕੇ ਚੱਲਦਾ ਹੈ।