ਅਮਰੀਕਾ 'ਚ ਸਿੱਖਾਂ ਦੀ ਸੁਰੱਖਿਆ ਨੂੰ ਲੈ ਕੇ ਖੜ੍ਹੇ ਹੋਏ ਸਵਾਲ! ਨਫਰਤੀ ਅਪਰਾਧਾਂ 'ਚ 3700% ਦਾ ਵੱਡਾ ਵਾਧਾ

ਇੰਟਰਨੈਸਨਲ ਡੈਸਕ : ਅਮਰੀਕਾ ਵਿੱਚ ਸਿੱਖ ਕੌਮ ਖ਼ਿਲਾਫ਼ ਨਫ਼ਰਤ ਨਾਲ ਜੁੜੇ ਅਪਰਾਧਾਂ (ਹੇਟ ਕ੍ਰਾਈਮ) ਵਿੱਚ ਪਿਛਲੇ ਇੱਕ ਦਹਾਕੇ ਦੌਰਾਨ ਚਿੰਤਾਜਨਕ ਵਾਧਾ ਦਰਜ ਕੀਤਾ ਗਿਆ ਹੈ। ਫੈਡਰਲ ਬਿਊਰੋ ਆਫ ਇਨਵੈਸਟਿਗੇਸ਼ਨ (FBI) ਦੇ ਪ੍ਰਾਰੰਭਿਕ ਅੰਕੜਿਆਂ ਮੁਤਾਬਕ 2015 ਵਿੱਚ ਅਜਿਹੇ ਸਿਰਫ਼ 6 ਮਾਮਲੇ ਸਾਹਮਣੇ ਆਏ ਸਨ, ਜੋ 2025 ਤੱਕ ਵੱਧ ਕੇ 228 ਹੋ ਗਏ। ਇਹ ਲਗਭਗ 3700 ਫੀਸਦੀ ਵਾਧੇ ਨੂੰ ਦਰਸਾਉਂਦਾ ਹੈ। ਰਿਪੋਰਟ ਅਨੁਸਾਰ 2025 ਵਿੱਚ ਕੁੱਲ ਹੇਟ ਕਰਾਈਮ ਮਾਮਲਿਆਂ ਵਿੱਚ ਪਿਛਲੇ ਸਾਲ ਦੇ ਮੁਕਾਬਲੇ 11 ਫੀਸਦੀ ਦੀ ਘਟੌਤੀ ਆਈ ਹੈ, ਪਰ 2015 ਤੋਂ 2025 ਦਰਮਿਆਨ ਕੁੱਲ ਮਾਮਲਿਆਂ ਵਿੱਚ ਕਰੀਬ 88 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਹੈ। ਇਸ ਨਾਲ ਸਪਸ਼ਟ ਹੁੰਦਾ ਹੈ ਕਿ ਲੰਬੇ ਸਮੇਂ ਵਿੱਚ ਇਹ ਸਮੱਸਿਆ ਲਗਾਤਾਰ ਵੱਧ ਰਹੀ ਹੈ। ਇਸ ਰਿਪੋਰਟ ਨੇ ਸਿੱਖ ਭਾਈਚਾਰੇ ਦੀ ਚਿੰਤਾ ਵਧਾ ਦਿੱਤੀ ਹੈ।

ਪੜ੍ਹੋ ਇਹ ਅਹਿਮ ਖ਼ਬਰ- ਤਾਮਿਲ ਸ਼ਰਨਾਰਥੀ ਦੀ ਡਿਪੋਰਟੇਸ਼ਨ ’ਤੇ ਆਰਜੀ ਤੌਰ 'ਤੇ ਲੱਗੀ ਰੋਕ 

ਸਿੱਖ ਕੌਮ ਸਭ ਤੋਂ ਵੱਧ ਪ੍ਰਭਾਵਿਤ 

ਖੋਜਕਾਰ ਬ੍ਰਾਇਨ ਲੈਵਿਨ ਦੇ ਅਨੁਸਾਰ ਹੇਟ ਕਰਾਈਮ ਸਾਰੇ ਸਮੂਹਾਂ ਵਿੱਚ ਇਕਸਾਰ ਨਹੀਂ ਵੱਧਦੇ, ਸਗੋਂ ਕੁਝ ਖ਼ਾਸ ਸਮੂਹ ਅਚਾਨਕ ਵੱਧ ਨਿਸ਼ਾਨਾ ਬਣਦੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਜਦੋਂ ਕਿਸੇ ਕੌਮ ਪ੍ਰਤੀ ਡਰ ਜਾਂ ਗਲਤ ਧਾਰਣਾਵਾਂ ਵਧਦੀਆਂ ਹਨ, ਤਾਂ ਉਨ੍ਹਾਂ ਦੇ ਖ਼ਿਲਾਫ਼ ਹਮਲੇ ਵੀ ਤੇਜ਼ ਹੋ ਜਾਂਦੇ ਹਨ। ਸਿੱਖ ਕੋਅਲੀਸ਼ਨ ਦੀ 2025 ਦੀ ਰਿਪੋਰਟ ਮੁਤਾਬਕ, 2024 ਵਿੱਚ ਸਿੱਖ ਕੌਮ ਅਮਰੀਕਾ ਵਿੱਚ ਤੀਜੀ ਸਭ ਤੋਂ ਵੱਧ ਨਿਸ਼ਾਨਾ ਬਣਨ ਵਾਲੀ ਧਾਰਮਿਕ ਕੌਮ ਵਜੋਂ ਸਾਹਮਣੇ ਆਈ। ਇਸ ਸੂਚੀ ਵਿੱਚ ਯਹੂਦੀ ਅਤੇ ਮੁਸਲਿਮ ਕੌਮ ਪਹਿਲੇ ਅਤੇ ਦੂਜੇ ਸਥਾਨ ‘ਤੇ ਰਹੇ। ਰਿਪੋਰਟ ਵਿੱਚ ਇਹ ਵੀ ਦੱਸਿਆ ਗਿਆ ਕਿ ਹਾਲ ਹੀ ਵਿੱਚ ਸੰਘੀ ਹੇਟ ਕਰਾਈਮ ਡਾਟਾ ਵਿੱਚ ਸਿੱਖ ਪਛਾਣ ਨੂੰ ਵੱਖਰੇ ਤੌਰ ‘ਤੇ ਦਰਜ ਕੀਤਾ ਜਾਣ ਲੱਗਾ ਹੈ, ਜਿਸ ਨਾਲ ਇਸ ਕੌਮ ਖ਼ਿਲਾਫ਼ ਅਪਰਾਧਾਂ ਦੀ ਅਸਲ ਸਥਿਤੀ ਹੁਣ ਹੋਰ ਵੱਧ ਸਪਸ਼ਟ ਹੋ ਰਹੀ ਹੈ। ਰਿਪੋਰਟ ਮੁਤਾਬਕ ਅਮਰੀਕਾ ਵਿਚ ਲਾਤੀਨੀਆ ਅਤੇ ਸਿੱਖਾਂ ਨੂੰ ਬਹੁਤ ਜ਼ਿਆਦਾ ਨਿਸ਼ਾਨਾ ਬਣਾਇਆ ਗਿਆ, ਜਿਸ ਨਾਲ ਵੱਧਦੀ ਅਸਹਿਣਸ਼ੀਲਤਾ ਅਤੇ ਕਮਜ਼ੋਰ ਸਮੂਹਾਂ ਲਈ ਸੁਰੱਖਿਆ ਵਿਚ ਕਮੀਆਂ ਬਾਰੇ ਨਵੀਆਂ ਚਿੰਤਾਵਾਂ ਪੈਦਾ ਹੋ ਗਈਆਂ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

 ਨੋਟ-  ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।