ਬੰਗਲਾਦੇਸ਼ 'ਚ ਖਸਰੇ ਦੀ ਮਹਾਮਾਰੀ ਨਾਲ ਹਾਹਾਕਾਰ, WHO ਨੇ ਜਾਰੀ ਕੀਤੀ ਗੰਭੀਰ ਚੇਤਾਵਨੀ

ਢਾਕਾ- ਬੰਗਲਾਦੇਸ਼ ਇਸ ਸਮੇਂ ਵਿਸ਼ਵ ਦੇ ਸਭ ਤੋਂ ਗੰਭੀਰ ਖਸਰੇ ਦੇ ਪ੍ਰਕੋਪ ਦਾ ਸਾਹਮਣਾ ਕਰ ਰਿਹਾ ਹੈ, ਜਿੱਥੇ ਟੀਕਾਕਰਨ ਦੀ ਦਰ ਡਿੱਗਣ ਕਰਕੇ ਸਥਿਤੀ ਬੇਹੱਦ ਚਿੰਤਾਜਨਕ ਬਣ ਗਈ ਹੈ। ਵਿਸ਼ਵ ਸਿਹਤ ਸੰਗਠਨ (WHO) ਅਨੁਸਾਰ, ਮਾਰਚ ਤੋਂ 9 ਅਕਤੂਬਰ ਤੱਕ ਬੰਗਲਾਦੇਸ਼ ਵਿੱਚ ਖਸਰੇ ਦੇ 2,02,000 ਤੋਂ ਵੱਧ ਸ਼ੱਕੀ ਮਾਮਲੇ ਦਰਜ ਕੀਤੇ ਗਏ ਹਨ, ਜੋ ਕਿ ਇਸ ਸਾਲ ਕਿਸੇ ਵੀ ਦੇਸ਼ ਵਿੱਚ ਸਭ ਤੋਂ ਵੱਧ ਹਨ। ਇਸ ਬਿਮਾਰੀ ਕਾਰਨ ਹੁਣ ਤੱਕ 1,147 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਿਨ੍ਹਾਂ ਵਿੱਚੋਂ 94 ਫੀਸਦੀ ਮੌਤਾਂ ਪੰਜ ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਦੀਆਂ ਹੋਈਆਂ ਹਨ। ਵਿਗਿਆਨੀਆਂ ਅਤੇ ਸਿਹਤ ਮਾਹਰਾਂ ਤੇ WHO ਦਾ ਮੰਨਣਾ ਹੈ ਕਿ ਇਹ ਸੰਕਟ ਹੋਰਨਾਂ ਦੇਸ਼ਾਂ ਲਈ ਵੀ ਇੱਕ ਗੰਭੀਰ ਚੇਤਾਵਨੀ ਹੈ।

ਮਾਹਰਾਂ ਅਨੁਸਾਰ, ਬੰਗਲਾਦੇਸ਼ ਵਿੱਚ ਸਾਲ 2024 ਤੱਕ ਪਹਿਲੀ ਖੁਰਾਕ ਦਾ ਟੀਕਾਕਰਨ 96 ਫੀਸਦੀ ਸੀ, ਪਰ 2025 ਵਿੱਚ ਰਾਜਨੀਤਿਕ ਅਸਥਿਰਤਾ ਅਤੇ ਸਿਹਤ ਕਰਮਚਾਰੀਆਂ ਦੀ ਹੜਤਾਲ ਕਰਕੇ ਟੀਕਾਕਰਨ ਦੀ ਦਰ ਘੱਟ ਕੇ 90 ਫੀਸਦੀ ਰਹਿ ਗਈ, ਜੋ ਕਿ ਝੁੰਡ ਪ੍ਰਤੀਰੋਧਕਤਾ ਲਈ ਲੋੜੀਂਦੇ 95 ਫੀਸਦੀ ਤੋਂ ਕਾਫ਼ੀ ਘੱਟ ਹੈ। ਇਸ ਤੋਂ ਇਲਾਵਾ, ਸਰਕਾਰੀ ਅੰਕੜਿਆਂ ਵਿੱਚ ਗੜਬੜੀ ਅਤੇ ਤਿਆਰੀਆਂ ਵਿੱਚ ਘਾਟ ਕਾਰਨ ਲੱਖਾਂ ਬੱਚੇ ਇਮਰਜੈਂਸੀ ਟੀਕਾਕਰਨ ਮੁਹਿੰਮ ਤੋਂ ਵਾਂਝੇ ਰਹਿ ਗਏ। ਉੱਤਰ-ਪੂਰਬੀ ਖੇਤਰ ਸਿਲਹਟ ਵਰਗੇ ਸਭ ਤੋਂ ਵੱਧ ਪ੍ਰਭਾਵਿਤ ਇਲਾਕਿਆਂ ਵਿੱਚ ਕਈ ਪਰਿਵਾਰਾਂ ਤੱਕ ਸਿਹਤ ਕਰਮਚਾਰੀ ਬੱਚਿਆਂ ਦੀ ਮੌਤ ਤੋਂ ਬਾਅਦ ਹੀ ਪਹੁੰਚੇ।

ਬੰਗਲਾਦੇਸ਼ ਸਰਕਾਰ ਨੇ ਸਥਿਤੀ 'ਤੇ ਕਾਬੂ ਪਾਉਣ ਲਈ ਸਤੰਬਰ ਦੇ ਅੰਤ ਵਿੱਚ 34 ਲੱਖ (3.4 ਮਿਲੀਅਨ) ਵਾਂਝੇ ਰਹਿ ਗਏ ਬੱਚਿਆਂ ਨੂੰ ਕਵਰ ਕਰਨ ਲਈ ਇੱਕ ਨਵੀਂ ਮੁਹਿੰਮ ਸ਼ੁਰੂ ਕੀਤੀ ਹੈ। ਹਾਲਾਂਕਿ, ਸਿਹਤ ਵਿਭਾਗ ਵਿੱਚ ਲਗਭਗ ਇੱਕ-ਤਿਹਾਈ ਖਾਲੀ ਪਏ ਪਦ, ਲਗਭਗ 40 ਫੀਸਦੀ ਬੱਚਿਆਂ ਦਾ ਅਨਰਜਿਸਟਰਡ ਹੋਣਾ ਅਤੇ ਡੇਂਗੂ ਦੀ ਮਹਾਮਾਰੀ ਕਾਰਨ ਹਸਪਤਾਲਾਂ 'ਤੇ ਵਧਿਆ ਬੋਝ ਵੱਡੀਆਂ ਚੁਣੌਤੀਆਂ ਬਣੇ ਹੋਏ ਹਨ। ਸਿਹਤ ਮਾਹਰਾਂ ਨੇ ਸਰਕਾਰ ਨੂੰ ਪੰਜ ਸਾਲ ਤੋਂ ਵੱਧ ਉਮਰ ਦੇ ਬੱਚਿਆਂ ਨੂੰ ਵੀ ਇਸ ਮੁਹਿੰਮ ਵਿੱਚ ਸ਼ਾਮਲ ਕਰਨ ਦੀ ਸਿਫ਼ਾਰਸ਼ ਕੀਤੀ ਹੈ, ਕਿਉਂਕਿ ਕੁੱਲ ਮਾਮਲਿਆਂ ਵਿੱਚੋਂ ਇੱਕ-ਤਿਹਾਈ ਮਰੀਜ਼ ਇਸੇ ਉਮਰ ਵਰਗ ਦੇ ਹਨ।