ਸਕਾਟਲੈਂਡ: ''ਓਮੀਕਰੋਨ'' ਵੇਰੀਐਂਟ ਤੋਂ ਸੁਰੱਖਿਆ ਲਈ ਅਪਣਾਏ ਜਾਣਗੇ ਨਵੇਂ ''ਯਾਤਰਾ ਨਿਯਮ''

ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ): ਯੂਕੇ ਵਿੱਚ ਕੋਰੋਨਾ ਵਾਇਰਸ ਦੇ ਨਵੇਂ ਰੂਪ 'ਓਮੀਕਰੋਨ' ਦੇ ਕੇਸ ਸਾਹਮਣੇ ਆਉਣ ਕਾਰਨ ਚਿੰਤਾਵਾਂ ਪੈਦਾ ਹੋ ਗਈਆਂ ਹਨ। ਜਿਸ ਕਾਰਨ ਸਰਕਾਰ ਵੱਲੋਂ ਲੋਕਾਂ ਨੂੰ ਕੁਝ ਨਵੇਂ ਨਿਯਮਾਂ ਤਹਿਤ ਸਾਵਧਾਨੀਆਂ ਵਰਤਣ ਦੀ ਸਲਾਹ ਦਿੱਤੀ ਗਈ ਹੈ। ਸਕਾਟਲੈਂਡ ਵਿੱਚ ਵੀ ਸਿਹਤ ਸਕੱਤਰ ਹਮਜ਼ਾ ਯੂਸਫ਼ ਨੇ ਜਾਣਕਾਰੀ ਦਿੰਦਿਆ ਦੱਸਿਆ ਹੈ ਕਿ ਇੰਗਲੈਂਡ ਵਿੱਚ ਓਮੀਕਰੋਨ ਕੋਰੋਨਾ ਵਾਇਰਸ ਵੇਰੀਐਂਟ ਦੇ ਦੋ ਕੇਸਾਂ ਦਾ ਪਤਾ ਲੱਗਣ ਤੋਂ ਬਾਅਦ ਸਕਾਟਲੈਂਡ, ਯੂਕੇ ਸਰਕਾਰ ਦੁਆਰਾ ਲਾਗੂ ਕੀਤੀਆਂ ਗਈਆਂ ਨਵੀਆਂ ਸਰਹੱਦੀ ਪਾਬੰਦੀਆਂ ਨੂੰ ਅਪਣਾਏਗਾ। 

ਪੜ੍ਹੋ ਇਹ ਅਹਿਮ ਖਬਰ- ਸਕਾਟਲੈਂਡ 'ਚ ਓਮੀਕਰੋਨ ਦੇ ਛੇ ਨਵੇਂ ਮਾਮਲੇ ਆਏ ਸਾਹਮਣੇ

ਸਿਹਤ ਮਾਹਰਾਂ ਅਨੁਸਾਰ ਇਸ ਵੇਰੀਐਂਟ ਵਿੱਚ ਲਗਭਗ 30 ਵੱਖ-ਵੱਖ ਪਰਿਵਰਤਨ ਹਨ ਜੋ ਕਿ ਡੈਲਟਾ ਵੇਰੀਐਂਟ ਵਿੱਚ ਮੌਜੂਦ ਸੰਖਿਆ ਤੋਂ ਦੁੱਗਣੇ ਹਨ। ਯੂਕੇ ਸਰਕਾਰ ਦੁਆਰਾ ਲਾਗੂ ਕੀਤੀਆਂ ਜਾ ਰਹੀਆਂ ਨਵੀਆਂ ਸਰਹੱਦੀ ਪਾਬੰਦੀਆਂ ਵਿੱਚ ਯਾਤਰੀਆਂ ਨੂੰ ਯੂਕੇ 'ਚ ਪਹੁੰਚਣ ਦੇ ਦੋ ਦਿਨਾਂ ਦੇ ਅੰਦਰ ਇੱਕ ਪੀ ਸੀ ਆਰ ਟੈਸਟ ਕਰਵਾਉਣ ਦੀ ਲੋੜ ਹੋਵੇਗੀ ਅਤੇ ਦੁਕਾਨਾਂ ਦੇ ਨਾਲ ਨਾਲ ਜਨਤਕ ਆਵਾਜਾਈ ਦੌਰਾਨ ਫੇਸ ਮਾਸਕ ਵੀ ਜ਼ਰੂਰੀ ਹੋਵੇਗਾ। 

ਪੜ੍ਹੋ ਇਹ ਅਹਿਮ ਖਬਰ- ਕੈਨੇਡਾ ਪੜ੍ਹਨ ਦੇ ਚਾਹਵਾਨਾਂ ਲਈ ਚੰਗੀ ਖ਼ਬਰ, ਵਿਦੇਸ਼ੀ ਵਿਦਿਆਰਥੀਆਂ ਲਈ ਵਰਕ ਪਰਮਿਟ 'ਚ ਛੋਟ ਦਾ ਐਲਾਨ

ਇਸਦੇ ਨਾਲ ਹੀ ਸਕਾਟਿਸ਼ ਸਰਕਾਰ, ਯੂਕੇ ਸਰਕਾਰ ਦੁਆਰਾ ਪਛਾਣੇ ਗਏ ਦੇਸ਼ਾਂ ਦੀ ਲਾਲ ਸੂਚੀ ਨੂੰ ਵੀ ਅਪਣਾਏਗੀ। ਸਕਾਟਲੈਂਡ ਦੀ ਫਸਟ ਮਨਿਸਟਰ ਨਿਕੋਲਾ ਸਟਰਜਨ ਨੇ ਵੀ ਲੋਕਾਂ ਨੂੰ ਓਮੀਕਰੋਨ ਤੋਂ ਸੁਰੱਖਿਆ ਦੇ ਮੱਦੇਨਜਰ ਫੇਸ ਮਾਸਕ ਪਹਿਨਣ, ਹੱਥ ਧੋਣ, ਕੋਰੋਨਾ ਟੀਕੇ ਲਗਵਾਉਣ ਅਤੇ ਪੀੜਤ ਹੋਣ ਦੇ ਸ਼ੰਕੇ ਦੀ ਸੂਰਤ ਵਿੱਚ ਸਭ ਤੋਂ ਪਹਿਲਾਂ ਟੈਸਟ ਕਰਨ ਦੀ ਅਪੀਲ ਕੀਤੀ ਹੈ।