ਨੇਪਾਲ ਹੜ੍ਹ : ਪ੍ਰਿੰਸੀਪਲ ਦੀ ਸੂਝ-ਬੂਝ ਨਾਲ ਬਚੇ 1,643 ਸਕੂਲੀ ਵਿਦਿਆਰਥੀ, ਹਰ ਪਾਸ ਹੋ ਰਹੀ ਸ਼ਲਾਘਾ

ਇੰਟਰਨੈਸ਼ਨਲ ਡੈਸਕ:  ਨੇਪਾਲ ਵਿੱਚ ਆਏ ਭਿਆਨਕ ਹੜ੍ਹ ਅਤੇ ਕੁਦਰਤੀ ਕਹਿਰ ਦਰਮਿਆਨ ਤ੍ਰਿਸ਼ੂਲੀ ਘਾਟੀ ਤੋਂ ਰਾਹਤ ਦੀ ਖ਼ਬਰ ਸਾਹਮਣੇ ਆਈ ਹੈ। ਇੱਥੇ ਇੱਕ ਸਰਕਾਰੀ ਸਕੂਲ ਦੇ ਪ੍ਰਿੰਸੀਪਲ ਦੀ ਤੁਰੰਤ ਸੂਝ-ਬੂਝ ਅਤੇ ਮੁਸਤੈਦੀ ਸਦਕਾ 1,643 ਸਕੂਲੀ ਬੱਚਿਆਂ ਦੀ ਜਾਨ ਵਾਲ-ਵਾਲ ਬਚ ਗਈ।

ਬੁੱਧਵਾਰ ਸਵੇਰੇ 9:20 ਵਜੇ ਉੱਤਰ-ਮੱਧ ਨੇਪਾਲ ਦੀ ਤ੍ਰਿਸ਼ੂਲੀ ਘਾਟੀ ਵਿੱਚ ਸਥਿਤ ਤਿੰਨ ਮੰਜ਼ਿਲਾ 'ਟ੍ਰਿਭੂਵਨ ਤ੍ਰਿਸ਼ੂਲੀ ਸੈਕੰਡਰੀ ਸਕੂਲ' ਵਿਖੇ ਸਵੇਰ ਦੀ ਸ਼ਿਫਟ ਵਿੱਚ ਲਗਭਗ 900 ਬੱਚੇ ਪੜ੍ਹ ਰਹੇ ਸਨ। ਇਸ ਦੇ ਨਾਲ ਹੀ ਲਗਭਗ 700 ਹੋਰ ਬੱਚੇ ਪੈਦਲ ਅਤੇ ਬੱਸਾਂ ਰਾਹੀਂ ਸਕੂਲ ਆ ਰਹੇ ਸਨ।ਕੁਝ ਬੱਚੇ ਨੇੜਲੇ ਖੇਤਰ ਦੇ ਸਨ। ਇਸੇ ਦੌਰਾਨ ਸਕੂਲ ਦੇ ਪ੍ਰਿੰਸੀਪਲ ਰਾਜੇਂਦਰ ਦਾਦਾਬੀ, ਜੋ ਕਿ 47 ਸਾਲਾ ਅੰਗਰੇਜ਼ੀ ਦੇ ਅਧਿਆਪਕ ਹਨ, ਨੂੰ ਨਦੀ ਦੇ ਵਹਾਅ ਦੀ ਦਿਸ਼ਾ ਵਿੱਚ 5 ਮੀਲ ਉੱਪਰ ਵੱਲ ਸਥਿਤ ਪਿੰਡ 'ਬੇਤਰਾਵਤੀ'  ਤੋਂ ਇੱਕ ਦੋਸਤ ਦਾ ਬੇਹੱਦ ਘਬਰਾਹਟ ਭਰਿਆ ਫੋਨ ਆਇਆ। ਉਨ੍ਹਾਂ ਦੇ ਦੋਸਤ ਨੇ ਚੇਤਾਵਨੀ ਦਿੰਦੇ ਹੋਏ ਕਿਹਾ, "ਪੂਰਾ ਪਿੰਡ ਤਬਾਹ ਹੋ ਗਿਆ ਹੈ ਅਤੇ ਨਦੀ ਦੇ ਤੇਜ਼ ਵਹਾਅ ਵਿੱਚ ਰੁੜ੍ਹ ਗਿਆ ਹੈ, ਤੁਰੰਤ ਇੱਥੋਂ ਭੱਜੋ"।

In Trishuli, Nepal, as flash floods tore through the region, headmaster Rajendra Dadabi's calm leadership and split-second decisions saved the lives of 1,643 schoolchildren. Real heroism, no cameras needed. 🙏 pic.twitter.com/3c3Bgm3YAg

— Debashis Roy 🙏 🇮🇳 (@droy_dr) August 30, 2026

ਪੜ੍ਹੋ ਇਹ ਅਹਿਮ ਖ਼ਬਰ-   ਨੇਪਾਲ ਹੜ੍ਹ : ਮ੍ਰਿਤਕਾਂ ਦੀ ਗਿਣਤੀ 730 ਦੇ ਪਾਰ, 2,500 ਲੋਕ ਅਜੇ ਵੀ ਲਾਪਤਾ 

ਇਸ ਖ਼ਤਰੇ ਦੀ ਘੰਟੀ ਨੂੰ ਸੁਣ ਕੇ ਪ੍ਰਿੰਸੀਪਲ ਦਾਦਾਬੀ ਨੇ ਤੁਰੰਤ ਸਥਿਤੀ ਦੀ ਗੰਭੀਰਤਾ ਨੂੰ ਸਮਝਿਆ। ਉਨ੍ਹਾਂ ਨੂੰ ਯਾਦ ਆਇਆ ਕਿ ਸਕੂਲ ਦੀਆਂ ਬੱਸਾਂ ਰਸਤੇ ਵਿੱਚ ਹਨ, ਜਿਨ੍ਹਾਂ ਵਿੱਚੋਂ ਹਰੇਕ ਬੱਸ ਵਿੱਚ ਲਗਭਗ 80 ਬੱਚੇ ਸਵਾਰ ਸਨ। ਉਨ੍ਹਾਂ ਨੇ ਬਿਨਾਂ ਸਮਾਂ ਗੁਆਏ ਤੁਰੰਤ ਸਾਰੇ ਬੱਸ ਡਰਾਈਵਰਾਂ ਨਾਲ ਸੰਪਰਕ ਕਰਕੇ ਉਨ੍ਹਾਂ ਨੂੰ ਬੱਸਾਂ ਤੁਰੰਤ ਵਾਪਸ ਮੋੜਨ ਦੇ ਨਿਰਦੇਸ਼ ਦਿੱਤੇ।ਪ੍ਰਿੰਸੀਪਲ ਦਾਦਾਬੀ ਨੇ ਦੱਸਿਆ ਕਿ ਉਨ੍ਹਾਂ ਨੇ ਇੱਕ ਡਰਾਈਵਰ ਨੂੰ ਛੱਡ ਕੇ ਬਾਕੀ ਸਾਰੇ ਡਰਾਈਵਰਾਂ ਨਾਲ ਸੰਪਰਕ ਕਰ ਲਿਆ ਸੀ। ਇਸੇ ਦੌਰਾਨ ਉਨ੍ਹਾਂ ਨੇ ਦੇਖਿਆ ਕਿ ਉਹੀ ਬੱਸ, ਜਿਸ ਨਾਲ ਸੰਪਰਕ ਨਹੀਂ ਹੋ ਸਕਿਆ ਸੀ, ਸਕੂਲ ਦੇ ਸਾਹਮਣੇ ਬਣੇ ਪੁਲ ਨੂੰ ਪਾਰ ਕਰ ਰਹੀ ਸੀ। ਉਦੋਂ ਤੱਕ ਹੜ੍ਹ ਦਾ ਪਾਣੀ ਬਹੁਤ ਤੇਜ਼ ਰਫ਼ਤਾਰ ਨਾਲ ਸਕੂਲ ਦੇ ਮੈਦਾਨ ਵਿੱਚ ਵੜ ਚੁੱਕਾ ਸੀ।ਦਾਦਾਬੀ ਨੇ ਤੁਰੰਤ ਹੱਥਾਂ ਦੇ ਇਸ਼ਾਰਿਆਂ ਨਾਲ ਡਰਾਈਵਰ ਨੂੰ ਬੱਸ ਪਿੱਛੇ ਮੋੜਨ ਲਈ ਕਿਹਾ। ਜਿਵੇਂ ਹੀ ਡਰਾਈਵਰ ਨੇ ਬੱਸ ਨੂੰ ਮੋੜ ਕੇ ਪੁਲ ਦੇ ਦੂਜੇ ਪਾਸੇ ਪਹੁੰਚਾਇਆ, ਉਸੇ ਪਲ ਉਹ ਪੁਲ ਹੜ੍ਹ ਦੇ ਭਿਆਨਕ ਵਹਾਅ ਕਾਰਨ ਪੂਰੀ ਤਰ੍ਹਾਂ ਟੁੱਟ ਕੇ ਨਦੀ ਵਿੱਚ ਬਹਿ ਗਿਆ।ਪ੍ਰਿੰਸੀਪਲ ਰਾਜੇਂਦਰ ਦਾਦਾਬੀ ਵੱਲੋਂ ਲਏ ਗਏ ਇਸ ਤੁਰੰਤ ਫੈਸਲੇ ਅਤੇ ਬਹਾਦਰੀ ਦੀ ਅੱਜ ਪੂਰੇ ਦੇਸ਼ ਵਿੱਚ ਸ਼ਲਾਘਾ ਕੀਤੀ ਜਾ ਰਹੀ ਹੈ, ਜਿਸ ਨੇ 1,643 ਮਾਸੂਮ ਬੱਚਿਆਂ ਨੂੰ ਮੌਤ ਦੇ ਮੂੰਹ ਵਿੱਚ ਜਾਣ ਤੋਂ ਬਚਾ ਲਿਆ। ਇੱਥੇ ਦੱਸ ਦਈਏ ਕਿ ਅਚਾਨਕ ਆਏ ਇਸ ਹੜ੍ਹ ਵਿਚ ਹੁਣ ਤੱਕ 734 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਅਤੇ ਲਗਭਗ 2500 ਹੋਰ ਲਾਪਤਾ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।