ਰੂਸ 'ਚ ਟਰੇਨ-ਬੱਸ ਦੀ ਟੱਕਰ 'ਚ 19 ਲੋਕਾਂ ਦੀ ਮੌਤ
10/06/2017 2:40:45 PM
ਮਾਸਕੋ(ਭਾਸ਼ਾ)— ਪੂਰਬੀ ਮਾਸਕੋ ਵਿਚ ਇਕ ਸਵਾਰੀ ਬੱਸ ਦੇ ਟ੍ਰੇਨ ਦੀ ਲਪੇਟ ਵਿਚ ਆਉਣ ਨਾਲ ਘੱਟ ਤੋਂ ਘੱਟ 19 ਲੋਕਾਂ ਦੀ ਮੌਤ ਹੋ ਗਈ। ਇਹ ਬੱਸ ਖ਼ਰਾਬ ਹੋਣ ਕਾਰਨ ਰੇਲਵੇ ਕਰਾਸਿੰਗ ਵਿਚਕਾਰ ਖੜ੍ਹੀ ਸੀ। ਖੇਤਰੀ ਅਧਿਕਾਰੀਆਂ ਨੇ ਸ਼ੁੱਕਰਵਾਰ ਨੂੰ ਦੱਸਿਆ ਕਿ ਵੀਰਵਾਰ ਦੇਰ ਰਾਤ ਇਹ ਹਾਦਸਾ ਰੂਸ ਦੀ ਰਾਜਧਾਨੀ ਮਾਸਕੋ ਤੋਂ ਕਰੀਬ 110 ਕਿਮੀ ਦੂਰ ਪੂਰਬ ਵਿਚ ਸਥਿਤ ਵਲਾਦਿਮੀਰ ਸ਼ਹਿਰ ਨਜਦੀਕ ਹੋਇਆ। ਖੇਤਰੀ ਸਿਹਤ ਸੇਵ ਦੇ ਮੁਖੀ ਅਲੈਕਜੈਂਡਰ ਕਿਰਿਆਖਿਨ ਨੇ ਇਕ ਸਮਾਚਾਰ ਏਜੰਸੀ ਨੂੰ ਦੱਸਿਆ, ''ਹਾਲੀਆ ਸੂਚਨਾ ਮੁਤਾਬਕ ਇਸ ਹਾਦਸੇ ਵਿਚ 19 ਲੋਕ ਮਾਰੇ ਗਏ ਹਨ।'' ਰੂਸੀ ਜਾਂਚ ਕਮੇਟੀ ਨੇ ਹਾਦਸੇ ਵਿਚ ਮਾਰੇ ਗਏ ਲੋਕਾਂ ਦੇ ਅੰਕੜਿਆਂ ਦੀ ਪੁਸ਼ਟੀ ਕੀਤੀ ਹੈ ਅਤੇ ਕਿਹਾ ਹੈ ਕਿ ਉਸ ਨੇ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਸੂਬੇ ਦੇ ਅੰਦਰੂਨੀ ਸੁਰੱਖਿਆ ਮੰਤਰਾਲਾ ਨੇ ਦੱਸਿਆ ਕਿ ਇਹ ਟ੍ਰੇਨ ਸੈਂਟ ਪੀਟਸਬਰਗ ਦੇ ਪੱਛਮੀ ਸ਼ਹਿਰ ਤੋਂ ਪੂਰਬੀ ਮਾਸਕੋ ਦੇ ਨਿਜਨੀ-ਨੋਵੋਗਰਾਦ ਜਾ ਰਹੀ ਸੀ ਅਤੇ ਸ਼ੁੱਕਰਵਾਰ ਸਵੇਰੇ ਕਰੀਬ 3:29 ਮਿੰਟ 'ਤੇ ਇਕ ਬੱਸ ਉਸ ਦੀ ਲਪੇਟ ਵਿਚ ਆ ਗਈ। ਉਨਾਂ ਦੱਸਿਆ ਕਿ ਮਰਨ ਵਾਲੇ ਸਾਰੇ ਲੋਕ ਬੱਸ ਵਿਚ ਸਵਾਰ ਸਨ। ਮੰਤਰਾਲਾ ਨੇ ਰੇਲਵੇ ਟ੍ਰੈਕ ਕੋਲ ਬੱਸ ਦੇ ਮਲਬੇ ਦੀਆਂ ਤਸਵੀਰਾਂ ਜਾਰੀ ਕੀਤੀਆਂ ਹੈ ਅਤੇ ਕਿਹਾ ਹੈ ਕਿ ''ਟ੍ਰੇਨ ਵਿਚ ਸਵਾਰ ਸਾਰੇ ਯਾਤਰੀ ਸੁਰੱਖਿਅਤ ਹਨ।'' ਗੁਆਂਢੀ ਦੇਸ਼ ਕਜਾਖਸਤਾਨ ਦੇ ਵਿਦੇਸ਼ ਮੰਤਰਾਲਾ ਨੇ ਕਿਹਾ ਕਿ ਬੱਸ ਦੇ ਦੋਵਾਂ ਚਾਲਕਾਂ ਵਿਚੋਂ ਇਕ ਚਾਲਕ ਕਜਾਖ ਨਾਗਰਿਕ ਸੀ। ਹਾਦਸੇ ਵਿਚ ਉਸ ਦੀ ਮੌਤ ਹੋ ਗਈ। ਮੰਤਰਾਲਾ ਨੇ ਸਮਾਚਾਰ ਏਜੰਸੀ ਨੂੰ ਇਹ ਵੀ ਦੱਸਿਆ ਕਿ ਬੱਸ ਵਿਚ ਉਜਬੇਕਿਸਤਾਨ ਦੇ 55 ਨਾਗਰਿਕ ਸਵਾਰ ਸਨ। ਜ਼ਿਕਰਯੋਗ ਹੈ ਕਿ ਰੂਸ ਵਿਚ ਅਕਸਰ ਅਜਿਹੇ ਬੱਸ ਹਾਸਦੇ ਹੁੰਦੇ ਰਹਿੰਦੇ ਹਨ। ਇਸ ਤੋਂ ਪਹਿਲਾਂ ਅਗਸਤ ਵਿਚ ਮਜ਼ਦੂਰਾਂ ਨੂੰ ਲਿਜਾਣ ਵਾਲੀ ਇਕ ਬੱਸ ਹਾਦਸਾਗ੍ਰਸਤ ਹੋ ਕੇ ਕਾਲ਼ਾ ਸਾਗਰ ਵਿਚ ਡਿੱਗ ਗਈ ਸੀ, ਜਿਸ ਵਿਚ 17 ਲੋਕ ਮਾਰੇ ਗਏ ਸਨ ।
