ਪਾਕਿ ਨੇ ਬਦਲਿਆ ਚੀਨੀ ਸੈਟੇਲਾਈਟ ਦਾ ਰਸਤਾ, ਨਿਸ਼ਾਨੇ ’ਤੇ ਗੁਜਰਾਤ ਅਤੇ ਕਸ਼ਮੀਰ

ਇਸਲਾਮਾਬਾਦ - ਪਾਕਿਸਤਾਨ ਚੀਨ ਦੀ ਮਦਦ ਨਾਲ ਬਣੇ ਅਤੇ ਲਾਂਚ ਕੀਤੇ ਗਏ ਸੈਟੇਲਾਈਟ ਨਾਲ ਭਾਰਤ ਦੀ ਜਾਸੂਸੀ ਕਰ ਰਿਹਾ ਹੈ। ਇਸ ਦਾ ਖੁਲਾਸਾ ਹਾਲ ਹੀ ’ਚ ਅਮਰੀਕੀ ਸਪੇਸ ਸਿਚੂਏਸ਼ਨਲ ਅਵੇਅਰਨੈੱਸ ਫਰਮ ਕਾਮਸਪੋਕ (ਕਮਰਸ਼ੀਅਲ ਸਪੇਸ ਆਪ੍ਰੇਸ਼ਨਜ਼ ਸੈਂਟਰ) ਨੇ ਕੀਤਾ ਹੈ।

ਕਾਮਸਪੋਕ ਦੇ ਡਾਟਾ ਅਨੁਸਾਰ ਪਾਕਿਸਤਾਨ ਨੇ 25 ਅਪ੍ਰੈਲ 2026 ਨੂੰ ਚੀਨ ਦੇ ਤਾਈਯੁਆਨ ਲਾਂਚ ਸੈਂਟਰ ਤੋਂ ਲਾਂਗ ਮਾਰਚ 6 ਰਾਕੇਟ ਜ਼ਰੀਏ ਪੀ. ਆਰ. ਐੱਸ. ਸੀ. ਅਰਥ ਆਬਜ਼ਰਵੇਸ਼ਨ ਸੈਟੇਲਾਈਟ ਲਾਂਚ ਕੀਤਾ ਸੀ। ਹੁਣ ਇਹ ਸੈਟੇਲਾਈਟ ਇਕ ਵੱਖਰੇ ਹੀ ਪੰਧ ’ਚ ਚੱਕਰ ਕੱਟ ਰਿਹਾ ਹੈ, ਜੋ ਬਾਕੀਆਂ ਦੇ ਮੁਕਾਬਲੇ ਕਾਫ਼ੀ ਅਸਾਧਾਰਨ ਹੈ। ਇਸੇ ਨੇ ਮਾਹਰਾਂ ਦਾ ਧਿਆਨ ਪਾਕਿਸਤਾਨੀ ਪੀ. ਆਰ. ਐੱਸ. ਸੀ. ਅਰਥ ਆਬਜ਼ਰਵੇਸ਼ਨ ਸੈਟੇਲਾਈਟ ਵੱਲ ਖਿੱਚਿਆ ਹੈ।

ਅਮਰੀਕੀ ਏਜੰਸੀ ਨੇ ਖੋਲ੍ਹੀ ਪਾਕਿਸਤਾਨ ਦੀ ਪੋਲ
ਅਮਰੀਕਾ ਦੀ ਸਪੇਸ ਸਿਚੂਏਸ਼ਨਲ ਅਵੇਅਰਨੈੱਸ ਫਰਮ ਕਾਮਸਪੋਕ ਦੇ ਟ੍ਰੈਕਿੰਗ ਡਾਟਾ ਦੇ ਹਵਾਲੇ ਤੋਂ ਦੱਸਿਆ ਗਿਆ ਹੈ ਕਿ ਪੀ. ਆਰ. ਐੱਸ. ਸੀ. ਸੈਟੇਲਾਈਟ 38 ਡਿਗਰੀ ਦੇ ਝੁਕਾਅ (ਇਨਕਲੀਨੇਸ਼ਨ) ’ਤੇ ਹੈ, ਜੋ ਲੱਗਭਗ 554 ਕਿ. ਮੀ. ਦੀ ਉਚਾਈ ’ਤੇ ਹੈ ਅਤੇ ਇਸ ਦਾ ‘ਰਾਈਟ ਅਸੈਂਸ਼ਨ ਆਫ਼ ਅਸੈਂਡਿੰਗ ਨੋਡ’ 334 ਡਿਗਰੀ ਹੈ। ਕਾਮਸਪੋਕ ਦਾ ਮੰਨਣਾ ਹੈ ਕਿ ਇਹ ਗਲੋਬਲ ਕਵਰੇਜ ਅਤੇ ਇੱਕੋ ਿਜਹੀ ਰੋਸ਼ਨੀ (ਲਾਈਟਿੰਗ) ਦੀ ਸਹੂਲਤ ਨੂੰ ਛੱਡ ਕੇ ਨਿਗਰਾਨੀ ਕਰਨ ਦੀ ਸਮਰੱਥਾ ਨੂੰ ਪਹਿਲ ਦਿੰਦਾ ਹੈ। ਇਸ ਬੈਂਡ ’ਚ ਪਾਕਿਸਤਾਨ, ਉੱਤਰ ਭਾਰਤ ਅਤੇ ਕਸ਼ਮੀਰ ਆਉਂਦੇ ਹਨ। ਅਜਿਹੇ ’ਚ ਪਾਕਿਸਤਾਨੀ ਸੈਟੇਲਾਈਟ ਦੇ ਇਸ ਕੌਨਫਿਗ੍ਰੇਸ਼ਨ ਨੂੰ ਸਬੂਤ ਮੰਨਿਆ ਜਾ ਰਿਹਾ ਹੈ ਕਿ ਇਸਲਾਮਾਬਾਦ ਭਾਰਤ ਦੇ ਉੱਤਰੀ ਖੇਤਰਾਂ (ਕਸ਼ਮੀਰ, ਪੰਜਾਬ) ਅਤੇ ਪੱਛਮੀ ਖੇਤਰਾਂ (ਰਾਜਸਥਾਨ, ਗੁਜਰਾਤ) ’ਤੇ ਨਜ਼ਰ ਰੱਖਣ ਲਈ ਇਸ ਦੀ ਵਰਤੋਂ ਕਰ ਰਿਹਾ ਹੈ।