ਉੱਤਰੀ ਕੋਰੀਆ ''ਚ ਕਿਮ ਜੋਂਗ ਦੀ ''ਹੂੰਝਾ ਫੇਰ'' ਜਿੱਤ ! 99.93 ਫ਼ੀਸਦੀ ਵੋਟਾਂ ਨਾਲ ਸਾਰੀਆਂ ਸੀਟਾਂ ''ਤੇ ਕੀਤਾ ਕਬਜ਼ਾ

ਇੰਟਰਨੈਸ਼ਨਲ ਡੈਸਕ- ਉੱਤਰੀ ਕੋਰੀਆ 'ਚ 15ਵੀਂ ਸੁਪਰੀਮ ਪੀਪਲਜ਼ ਅਸੈਂਬਲੀ ਲਈ ਹੋਈਆਂ ਸੰਸਦੀ ਚੋਣਾਂ 'ਚ ਕਿਮ ਜੋਂਗ ਉਨ ਨੇ ਇੱਕ ਵੱਡੀ ਜਿੱਤ ਹਾਸਲ ਕੀਤੀ ਹੈ। ਸਰਕਾਰੀ ਮੀਡੀਆ ਅਤੇ ਯੋਨਹਾਪ ਨਿਊਜ਼ ਏਜੰਸੀ ਅਨੁਸਾਰ, ਵਰਕਰਜ਼ ਪਾਰਟੀ ਆਫ ਕੋਰੀਆ ਅਤੇ ਇਸ ਦੇ ਸਹਿਯੋਗੀ ਗਠਜੋੜ ਨੇ 99.93 ਫੀਸਦੀ ਵੋਟਾਂ ਪ੍ਰਾਪਤ ਕਰਕੇ ਹਰ ਉਪਲਬਧ ਸੀਟ 'ਤੇ ਜਿੱਤ ਦਰਜ ਕੀਤੀ ਹੈ।

ਰਿਕਾਰਡ ਤੋੜ ਵੋਟਿੰਗ ਅਤੇ ਸੰਵਿਧਾਨਕ ਬਦਲਾਅ 

ਇਨ੍ਹਾਂ ਚੋਣਾਂ 'ਚ ਵੋਟਿੰਗ ਦੀ ਦਰ 99.99 ਫੀਸਦੀ ਰਹੀ, ਜੋ ਕਿ 15 ਮਾਰਚ ਨੂੰ ਪ੍ਰਤੀਨਿਧੀਆਂ ਦੀ ਚੋਣ ਲਈ ਕਰਵਾਈਆਂ ਗਈਆਂ ਸਨ। ਹੁਣ ਪਿਓਂਗਯਾਂਗ 'ਚ ਨਵੀਂ ਅਸੈਂਬਲੀ ਦਾ ਉਦਘਾਟਨੀ ਸੈਸ਼ਨ ਬੁਲਾਇਆ ਜਾਵੇਗਾ, ਜਿਸ 'ਚ ਰਾਜ ਦੀ ਲੀਡਰਸ਼ਿਪ ਦੀ ਚੋਣ ਕੀਤੀ ਜਾਵੇਗੀ ਅਤੇ ਦੇਸ਼ ਦੇ ਸੰਵਿਧਾਨ 'ਚ ਇਕ ਵੱਡੀ ਸੋਧ 'ਤੇ ਵਿਚਾਰ ਕੀਤਾ ਜਾਵੇਗਾ। ਇਸ ਸੈਸ਼ਨ ਦੌਰਾਨ ਕਿਮ ਜੋਂਗ ਉਨ ਨੂੰ ਮੁੜ ਦੇਸ਼ ਦਾ ਸਰਵਉੱਚ ਨੇਤਾ ਚੁਣੇ ਜਾਣ ਦੀ ਪੂਰੀ ਉਮੀਦ ਹੈ।

ਦੱਖਣੀ ਕੋਰੀਆ ਪ੍ਰਤੀ ਸਖ਼ਤ ਰੁਖ਼ ਦੀ ਤਿਆਰੀ 

ਇਸ ਵਾਰ ਸਭ ਤੋਂ ਵੱਧ ਧਿਆਨ ਇਸ ਗੱਲ 'ਤੇ ਹੈ ਕਿ ਕੀ ਉੱਤਰੀ ਕੋਰੀਆ ਆਪਣੇ ਸੰਵਿਧਾਨ 'ਚ ਦੱਖਣੀ ਕੋਰੀਆ ਪ੍ਰਤੀ ਆਪਣੇ ਦੁਸ਼ਮਣੀ ਵਾਲੇ ਰਵੱਈਏ ਨੂੰ ਅਧਿਕਾਰਤ ਤੌਰ 'ਤੇ ਦਰਜ ਕਰੇਗਾ। ਮੰਨਿਆ ਜਾ ਰਿਹਾ ਹੈ ਕਿ ਸੰਵਿਧਾਨ 'ਚ ਦੋਵੇਂ ਕੋਰੀਆਈ ਦੇਸ਼ਾਂ ਨੂੰ ਇਕ-ਦੂਜੇ ਦੇ ਕੱਟੜ ਦੁਸ਼ਮਣ ਵਜੋਂ ਪਰਿਭਾਸ਼ਿਤ ਕੀਤਾ ਜਾ ਸਕਦਾ ਹੈ।

ਵੱਡਾ ਸਿਆਸੀ ਫੇਰਬਦਲ

70 ਫੀਸਦੀ ਨਵੇਂ ਚਿਹਰੇ ਚੋਣਾਂ ਦੇ ਨਤੀਜਿਆਂ ਨੇ ਦੇਸ਼ ਦੇ ਅੰਦਰੂਨੀ ਸੱਤਾ ਢਾਂਚੇ 'ਚ ਵੱਡੇ ਬਦਲਾਅ ਦੇ ਸੰਕੇਤ ਦਿੱਤੇ ਹਨ। ਰਿਪੋਰਟਾਂ ਅਨੁਸਾਰ, ਇਸ ਵਾਰ 70 ਫੀਸਦੀ ਤੋਂ ਵੱਧ ਪ੍ਰਤੀਨਿਧੀਆਂ ਨੂੰ ਬਦਲ ਦਿੱਤਾ ਗਿਆ ਹੈ, ਜਿਸ ਨੂੰ ਕਿਮ ਜੋਂਗ ਉਨ ਦੀ ਪੂਰਨ ਸੱਤਾ ਨੂੰ ਹੋਰ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਵਜੋਂ ਦੇਖਿਆ ਜਾ ਰਿਹਾ ਹੈ। ਨਵੇਂ ਚੁਣੇ ਗਏ 687 ਡਿਪਟੀਆਂ 'ਚ ਕਿਮ ਦੀ ਪ੍ਰਭਾਵਸ਼ਾਲੀ ਭੈਣ ਕਿਮ ਯੋ-ਜੋਂਗ ਅਤੇ ਵਿਦੇਸ਼ ਮੰਤਰੀ ਚੋਏ ਸੋਨ-ਹੁਈ ਵੀ ਸ਼ਾਮਲ ਹਨ। ਕਿਮ ਦੇ ਕਰੀਬੀ ਸਹਿਯੋਗੀ ਜੋ ਯੋਂਗ-ਵੋਨ ਨੂੰ ਅਸੈਂਬਲੀ ਦੀ ਸਟੈਂਡਿੰਗ ਕਮੇਟੀ ਦਾ ਨਵਾਂ ਚੇਅਰਮੈਨ ਬਣਾਇਆ ਜਾ ਸਕਦਾ ਹੈ।

ਵਿਰੋਧ 'ਚ ਪਈਆਂ ਵੋਟਾਂ: ਸਿਰਫ ਇਕ ਦਿਖਾਵਾ? 

ਦਿਲਚਸਪ ਗੱਲ ਇਹ ਹੈ ਕਿ ਸਰਕਾਰੀ ਮੀਡੀਆ ਨੇ ਰਿਪੋਰਟ ਦਿੱਤੀ ਹੈ ਕਿ 0.07 ਫੀਸਦੀ ਵੋਟਰਾਂ ਨੇ ਉਮੀਦਵਾਰਾਂ ਦੇ ਵਿਰੁੱਧ ਵੋਟ ਪਾਈ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਹ ਉੱਤਰੀ ਕੋਰੀਆ ਦੀ ਇਕ ਪ੍ਰਚਾਰ ਰਣਨੀਤੀ ਹੈ ਤਾਂ ਜੋ ਇਹ ਦਰਸਾਇਆ ਜਾ ਸਕੇ ਕਿ ਦੇਸ਼ 'ਚ ਲੋਕਾਂ ਨੂੰ ਵਿਰੋਧ ਕਰਨ ਦਾ ਹੱਕ ਹੈ, ਜਦਕਿ ਅਸਲ 'ਚ ਇਹ ਚੋਣਾਂ ਸਿਰਫ ਇਕ ਰਸਮੀ ਕਾਰਵਾਈ ਮਾਤਰ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e