ਜਾਰਜ ਸੋਰੋਸ ਦੇ ਬੇਟੇ ਨੂੰ ਮਿਲੇ ਮੁਹੰਮਦ ਯੂਨਸ, ਬੰਗਲਾਦੇਸ਼ ਦੇ ਆਰਥਿਕ ਹਾਲਾਤ ’ਤੇ ਕੀਤੀ ਚਰਚਾ

ਢਾਕਾ - ਬੰਗਲਾਦੇਸ਼ ਦੀ ਅੰਤ੍ਰਿਮ ਸਰਕਾਰ ’ਚ ਮੁੱਖ ਸਲਾਹਕਾਰ ਮੁਹੰਮਦ ਯੂਨਸ ਨੇ ਅਮਰੀਕੀ ਕਾਰੋਬਾਰੀ ਜਾਰਜ ਸੋਰੋਸ ਦੇ ਬੇਟੇ ਅਲੈਕਸ ਸੋਰੋਸ ਨਾਲ ਮੁਲਾਕਾਤ ਕੀਤੀ ਹੈ। ਦੋਵਾਂ ਦੀ  ਇਹ ਮੁਲਾਕਾਤ ਢਾਕਾ ’ਚ ਓਪਨ ਸੋਸਾਇਟੀ ਫਾਊਂਡੇਸ਼ਨ ਦੇ ਇਕ ਪ੍ਰੋਗਰਾਮ  ਦੌਰਾਨ ਹੋਈ। ਪਿਛਲੇ 3 ਮਹੀਨਿਆਂ ’ਚ  ਯੂਨਸ ਦੂਜੀ ਵਾਰ ਅਲੈਕਸ ਨੂੰ ਮਿਲੇ ਹਨ। ਯੂਨਸ ਨੇ ਸੋਸ਼ਲ ਮੀਡੀਆ ’ਤੇ ਪੋਸਟ ਕਰ ਕੇ ਮੀਟਿੰਗ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਕਿਹਾ ਕਿ ਮੀਟਿੰਗ ਵਿਚ ਬੰਗਲਾਦੇਸ਼ ਦੀ ਆਰਥਿਕਤਾ ਤੇ ਆਰਥਿਕ ਸੁਧਾਰਾਂ ’ਤੇ ਚਰਚਾ ਕੀਤੀ ਗਈ। ਡੇਲੀ ਸਟਾਰ ਦੀ ਰਿਪੋਰਟ ਅਨੁਸਾਰ ਅਲੈਕਸ ਸੋਰੋਸ ਨੇ ਸੁਧਾਰਾਂ ਨਾਲ   ਜੁੜੇ ਕੰਮਾਂ ਲਈ ਯੂਨਸ ਦੀ ਪ੍ਰਸ਼ੰਸਾ ਵੀ ਕੀਤੀ। ਅਲੈਕਸ ਸੋਰੋਸ ਓਪਨ ਸੋਸਾਇਟੀ ਫਾਊਂਡੇਸ਼ਨ ਦੇ ਚੇਅਰਮੈਨ ਹਨ। ਇਸ ਦੀ ਸਥਾਪਨਾ ਉਸ ਦੇ ਪਿਤਾ ਜਾਰਜ ਸੋਰੋਸ ਨੇ ਕੀਤੀ ਸੀ।