UK ਸਰਕਾਰ ਦਾ ਭਾਰਤੀਆਂ ਨੂੰ ਵੱਡਾ ਤੋਹਫ਼ਾ, ਕੇਅਰ ਵਰਕਰਾਂ ਨੂੰ 5 ਸਾਲਾਂ ''ਚ ਹੀ ਮਿਲੇਗੀ PR
Tuesday, Nov 03, 2026 - 12:00 AM (IST)
ਲੰਡਨ : ਬ੍ਰਿਟੇਨ (ਯੂ.ਕੇ.) ਸਰਕਾਰ ਨੇ ਬ੍ਰਿਟੇਨ ਵਿੱਚ ਕੰਮ ਕਰ ਰਹੇ ਵਿਦੇਸ਼ੀ ਕੇਅਰ ਵਰਕਰਾਂ ਲਈ ਪੱਕੇ ਨਿਵਾਸ ਸਬੰਧੀ ਇੱਕ ਵੱਡਾ ਫੈਸਲਾ ਲਿਆ ਹੈ। ਯੂ.ਕੇ. ਦੀ ਗ੍ਰਹਿ ਮੰਤਰੀ ਸ਼ਬਾਨਾ ਮਹਿਮੂਦ ਨੇ ਸੰਸਦ ਵਿੱਚ ਐਲਾਨ ਕੀਤਾ ਹੈ ਕਿ ਕੋਵਿਡ ਮਹਾਂਮਾਰੀ ਤੋਂ ਬਾਅਦ ਆਏ ਕੇਅਰ ਵਰਕਰਾਂ ਨੂੰ ਪਹਿਲਾਂ ਦੀ ਤਰ੍ਹਾਂ 5 ਸਾਲਾਂ ਵਿੱਚ ਹੀ ਪੱਕੇ ਹੋਣ ਦਾ ਅਧਿਕਾਰ ਮਿਲੇਗਾ। ਸਰਕਾਰ ਦੇ ਇਸ ਫੈਸਲੇ ਦਾ ਸਭ ਤੋਂ ਵੱਡਾ ਲਾਭ ਭਾਰਤੀਆਂ ਨੂੰ ਹੋਵੇਗਾ।
ਬ੍ਰਿਟਿਸ਼ ਗ੍ਰਹਿ ਮੰਤਰਾਲੇ ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ, 'ਹੈਲਥ ਐਂਡ ਸੋਸ਼ਲ ਕੇਅਰ' ਵੀਜ਼ਾ ਸ਼੍ਰੇਣੀ ਤਹਿਤ ਭਾਰਤੀ ਸਭ ਤੋਂ ਅੱਗੇ ਹਨ, ਜਿਨ੍ਹਾਂ ਨੂੰ ਦਸੰਬਰ 2025 ਤੱਕ 1,04,555 ਵੀਜ਼ਾ ਐਕਸਟੈਂਸ਼ਨਾਂ ਮਿਲੀਆਂ ਸਨ। ਨਵੇਂ ਨਿਯਮਾਂ ਨਾਲ ਇਹ ਕੇਅਰ ਵਰਕਰ ਹੁਣ ਤੈਅ 5 ਸਾਲਾਂ ਦੀ ਮਿਆਦ ਅੰਦਰ ਪੱਕੀ ਰਿਹਾਇਸ਼ ਲਈ ਅਰਜ਼ੀ ਦੇਣ ਦੇ ਯੋਗ ਹੋ ਜਾਣਗੇ।
ਸਰਕਾਰ ਵੱਲੋਂ ਜਾਰੀ ਸ਼ਰਤਾਂ ਅਨੁਸਾਰ:
ਘੱਟੋ-ਘੱਟ ਆਮਦਨ: 5 ਸਾਲਾਂ 'ਚ ਸੈਟਲਮੈਂਟ ਲਈ ਕੇਅਰ ਵਰਕਰਾਂ ਦੀ ਸਾਲਾਨਾ ਆਮਦਨ ਘੱਟੋ-ਘੱਟ 25,000 ਪਾਊਂਡ ਹੋਣੀ ਜ਼ਰੂਰੀ ਹੈ।
ਉੱਚੀ ਆਮਦਨ ਅਤੇ ਸਰਕਾਰੀ ਸੇਵਾਵਾਂ: 50,271 ਪਾਊਂਡ ਤੋਂ ਵੱਧ ਸਾਲਾਨਾ ਕਮਾਉਣ ਵਾਲਿਆਂ ਅਤੇ ਡਾਕਟਰਾਂ, ਨਰਸਾਂ ਤੇ ਅਧਿਆਪਕਾਂ ਵਰਗੇ ਜਨਤਕ ਸੇਵਾਵਾਂ ਨਾਲ ਜੁੜੇ ਵਰਕਰਾਂ ਨੂੰ ਵੀ 5 ਸਾਲਾਂ 'ਚ ਪੱਕੇ ਹੋਣ ਦਾ ਮੌਕਾ ਮਿਲੇਗਾ।
ਹੋਰ ਜ਼ਰੂਰੀ ਸ਼ਰਤਾਂ: ਬਿਨੈਕਾਰ ਦਾ ਅਪਰਾਧਿਕ ਰਿਕਾਰਡ ਪੂਰੀ ਤਰ੍ਹਾਂ ਸਾਫ਼ ਹੋਣਾ ਚਾਹੀਦਾ ਹੈ, ਅੰਗਰੇਜ਼ੀ ਭਾਸ਼ਾ ਦਾ ਚੰਗਾ ਗਿਆਨ ਹੋਣਾ ਚਾਹੀਦਾ ਹੈ, ਯੂ.ਕੇ. ਟੈਕਸ ਵਿਭਾਗ ਦੀ ਕੋਈ ਦੇਣਦਾਰੀ (ਕਰਜ਼ਾ) ਨਹੀਂ ਹੋਣੀ ਚਾਹੀਦੀ ਅਤੇ ਨੈਸ਼ਨਲ ਇੰਸ਼ੋਰੈਂਸ ਯੋਗਦਾਨ ਲਗਾਤਾਰ ਪੂਰਾ ਹੋਣਾ ਚਾਹੀਦਾ ਹੈ।
ਗ੍ਰਹਿ ਮੰਤਰੀ ਸ਼ਬਾਨਾ ਮਹਿਮੂਦ ਨੇ ਕਿਹਾ ਕਿ ਹੁਣ ਤੋਂ ਪੱਕੀ ਰਿਹਾਇਸ਼ ਮੁਫ਼ਤ ਜਾਂ ਆਟੋਮੈਟਿਕ ਨਹੀਂ ਮਿਲੇਗੀ, ਸਗੋਂ ਇਹ ਆਪਣੀ ਮਿਹਨਤ ਨਾਲ ਹਾਸਲ ਕਰਨੀ ਪਵੇਗੀ। ਜਿਹੜੇ ਕੇਅਰ ਵਰਕਰ 5 ਸਾਲਾਂ ਦੀਆਂ ਸ਼ਰਤਾਂ ਪੂਰੀਆਂ ਨਹੀਂ ਕਰ ਸਕਣਗੇ, ਉਨ੍ਹਾਂ ਨੂੰ ਇੱਕ ਹੋਰ 5 ਸਾਲਾਂ ਦਾ ਵੀਜ਼ਾ ਦਿੱਤਾ ਜਾਵੇਗਾ, ਜਿਸ ਤੋਂ ਬਾਅਦ ਹੀ ਉਹ ਅਪਲਾਈ ਕਰ ਸਕਣਗੇ। ਹੋਰ ਸ਼੍ਰੇਣੀਆਂ ਲਈ ਪੱਕੇ ਹੋਣ ਦੀ ਡਿਫ਼ਾਲਟ ਮਿਆਦ 10 ਸਾਲ ਤੈਅ ਕੀਤੀ ਗਈ ਹੈ, ਜਦਕਿ ਇਮੀਗ੍ਰੇਸ਼ਨ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲਿਆਂ ਜਾਂ ਗੈਰ-ਕਾਨੂੰਨੀ ਤਰੀਕੇ ਨਾਲ ਆਉਣ ਵਾਲਿਆਂ ਨੂੰ 20 ਤੋਂ 30 ਸਾਲ ਤੱਕ ਇੰਤਜ਼ਾਰ ਕਰਨਾ ਪਵੇਗਾ।
ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਐਂਡੀ ਬਰਨਹੈਮ ਨੇ ਇਸ ਨੀਤੀ ਦਾ ਸਮਰਥਨ ਕਰਦਿਆਂ ਕਿਹਾ ਕਿ ਦੇਸ਼ ਵਿੱਚ ਯੋਗਦਾਨ ਪਾਉਣ ਵਾਲੇ ਅਤੇ ਨਿਯਮਾਂ ਦੀ ਪਾਲਣਾ ਕਰਨ ਵਾਲੇ ਵਿਦੇਸ਼ੀ ਕਾਮਿਆਂ ਨੂੰ ਪਹਿਲਾਂ ਸੈਟਲ ਹੋਣ ਦਾ ਮੌਕਾ ਮਿਲਣਾ ਪੂਰੀ ਤਰ੍ਹਾਂ ਵਾਜਬ ਹੈ।
