ਟਰੰਪ, ਕਲਿੰਟਨ ਤੇ ਬਿਲ ਗੇਟਸ ਨਾਲ Jeffrey Epstein, 19 ਨਵੀਆਂ ਫੋਟੋਆਂ ਜਾਰੀ

ਇੰਟਰਨੈਸ਼ਨਲ ਡੈਸਕ : ਅਮਰੀਕਾ ਦੀ ਡੈਮੋਕ੍ਰੇਟਸ ਹਾਊਸ ਓਵਰਸਾਈਟ ਕਮੇਟੀ ਨੇ ਜਿਨਸੀ ਅਪਰਾਧੀ (Sex Offender) ਜੈਫਰੀ ਐਪਸਟੀਨ ਦੇ ਐਸਟੇਟ ਤੋਂ ਬਰਾਮਦ ਕੀਤੀਆਂ 19 ਤਸਵੀਰਾਂ ਜਾਰੀ ਕਰ ਦਿੱਤੀਆਂ ਹਨ। ਇਹ ਤਸਵੀਰਾਂ ਸ਼ੁੱਕਰਵਾਰ ਨੂੰ ਜਨਤਕ ਕੀਤੀਆਂ ਗਈਆਂ। ਇਨ੍ਹਾਂ ਤਸਵੀਰਾਂ ਵਿੱਚ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ, ਸਾਬਕਾ ਰਾਸ਼ਟਰਪਤੀ ਬਿਲ ਕਲਿੰਟਨ ਤੇ ਬਿਲ ਗੇਟਸ ਸਮੇਤ ਕਈ ਪ੍ਰਮੁੱਖ ਹਸਤੀਆਂ ਨਜ਼ਰ ਆ ਰਹੀਆਂ ਹਨ।
ਜਾਰੀ ਹੋਈਆਂ ਤਸਵੀਰਾਂ ਵਿੱਚੋਂ ਇੱਕ ਤਸਵੀਰ ਡੋਨਾਲਡ ਟਰੰਪ ਦੀ ਹੈ, ਜਿਸ ਵਿੱਚ ਉਹ ਕਈ ਔਰਤਾਂ ਨਾਲ ਖੜ੍ਹੇ ਦਿਖਾਈ ਦਿੰਦੇ ਹਨ, ਹਾਲਾਂਕਿ ਕਮੇਟੀ ਨੇ ਇਨ੍ਹਾਂ ਔਰਤਾਂ ਦੇ ਚਿਹਰਿਆਂ ਨੂੰ ਉਜਾਗਰ ਨਹੀਂ ਕੀਤਾ ਹੈ। ਇੱਕ ਹੋਰ ਤਸਵੀਰ ਵਿੱਚ ਟਰੰਪ ਇੱਕ ਔਰਤ ਨਾਲ ਗੱਲ ਕਰ ਰਹੇ ਹਨ ਅਤੇ ਐਪਸਟੀਨ ਉਨ੍ਹਾਂ ਦੇ ਨਾਲ ਖੜ੍ਹੇ ਹਨ।  

Trump appears 4 times in newly released Epstein photos released by House Democrats. Here they are. https://t.co/c9hRIk8BHl pic.twitter.com/ZH3sq7t9Zq

— Aaron Rupar (@atrupar) December 12, 2025

ਇਨ੍ਹਾਂ ਤਸਵੀਰਾਂ ਵਿੱਚ ਸਾਬਕਾ ਰਾਸ਼ਟਰਪਤੀ ਬਿਲ ਕਲਿੰਟਨ ਨੂੰ ਵੀ ਜੈਫਰੀ ਐਪਸਟੀਨ ਅਤੇ ਉਸਦੀ ਲੰਬੇ ਸਮੇਂ ਦੀ ਸਹਿਯੋਗੀ ਗਿਸਲੇਨ ਮੈਕਸਵੈੱਲ ਦੇ ਨਾਲ ਦੇਖਿਆ ਜਾ ਸਕਦਾ ਹੈ। ਮੈਕਸਵੈੱਲ ਨੂੰ ਬਾਅਦ ਵਿੱਚ ਐਪਸਟੀਨ ਦੇ ਜਿਨਸੀ ਤਸਕਰੀ ਦੇ ਅਪਰਾਧਾਂ ਦੇ ਸਬੰਧ ਵਿੱਚ ਦੋਸ਼ੀ ਠਹਿਰਾਇਆ ਗਿਆ ਸੀ। ਕਲਿੰਟਨ ਵਾਲੀ ਤਸਵੀਰ 'ਤੇ ਸਾਬਕਾ ਰਾਸ਼ਟਰਪਤੀ ਦੇ ਹਸਤਾਖਰ ਵੀ ਹਨ।
ਹਾਲਾਂਕਿ, ਇਨ੍ਹਾਂ ਤਸਵੀਰਾਂ ਵਿੱਚ ਕਿਸੇ ਵੀ ਵਿਅਕਤੀ ਨੂੰ ਕਿਸੇ ਵੀ ਤਰ੍ਹਾਂ ਦੀ ਗੈਰ-ਕਾਨੂੰਨੀ ਗਤੀਵਿਧੀ ਵਿੱਚ ਸ਼ਾਮਲ ਨਹੀਂ ਦਿਖਾਇਆ ਗਿਆ ਹੈ। ਡੋਨਾਲਡ ਟਰੰਪ ਕਈ ਸਾਲਾਂ ਤੋਂ ਐਪਸਟੀਨ ਨੂੰ ਜਾਣਦੇ ਸਨ, ਪਰ ਉਨ੍ਹਾਂ ਦਾ ਦਾਅਵਾ ਹੈ ਕਿ ਉਨ੍ਹਾਂ ਦਾ ਰਿਸ਼ਤਾ 2004 ਦੇ ਆਸਪਾਸ ਹੀ ਖਤਮ ਹੋ ਗਿਆ ਸੀ। ਟਰੰਪ ਨੇ ਵਾਰ-ਵਾਰ ਇਹ ਗੱਲ ਕਹੀ ਹੈ ਕਿ ਐਪਸਟੀਨ ਨਾਲ ਜੁੜੇ ਕਿਸੇ ਵੀ ਗਲਤ ਕੰਮ ਵਿੱਚ ਉਨ੍ਹਾਂ ਦੀ ਕੋਈ ਭੂਮਿਕਾ ਨਹੀਂ ਰਹੀ ਹੈ।
ਬਾਕੀ ਤਸਵੀਰਾਂ ਵਿੱਚ ਤਕਨੀਕੀ ਅਰਬਪਤੀ ਬਿਲ ਗੇਟਸ ਅਤੇ ਪ੍ਰਿੰਸ ਐਂਡਰਿਊ ਇੱਕੱਠੇ ਦਿਖਾਈ ਦਿੰਦੇ ਹਨ। ਇਸ ਤੋਂ ਇਲਾਵਾ ਹਾਰਵਰਡ ਦੇ ਸਾਬਕਾ ਪ੍ਰਧਾਨ ਲੈਰੀ ਸਮਰਸ, ਮਸ਼ਹੂਰ ਵਕੀਲ ਐਲਨ ਡਰਸ਼ੋਵਿਟਜ਼, ਅਤੇ ਸਟੀਵ ਬੈਨਨ ਵੀ ਐਪਸਟੀਨ ਦੀ ਜਾਇਦਾਦ ਤੋਂ ਮਿਲੀਆਂ ਤਸਵੀਰਾਂ ਵਿੱਚ ਸ਼ਾਮਲ ਹਨ।