ਜਾਪਾਨ ਦਾ ਅਰਬਪਤੀ ਯੁਸਾਕੂ ਮੇਜ਼ਾਵਾ ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ ਲਈ ਹੋਇਆ ਰਵਾਨਾ

ਮਾਸਕੋ (ਭਾਸ਼ਾ): ਜਾਪਾਨ ਦੇ ਇਕ ਅਰਬਪਤੀ ਯੁਸਾਕੂ ਮੇਜ਼ਾਵਾ ਅਤੇ ਉਸ ਦੇ ਸਹਾਇਕ ਯੋਜ਼ੋ ਹੀਰਾਨੋ ਨੇ 2009 ਤੋਂ ਬਾਅਦ ਪਹਿਲੇ ਸਵੈ-ਭੁਗਤਾਨ ਕਰਨ ਵਾਲੇ ਪੁਲਾੜ ਸੈਲਾਨੀਆਂ ਵਜੋਂ ਬੁੱਧਵਾਰ ਨੂੰ ਪੁਲਾੜ ਲਈ ਉਡਾਣ ਭਰੀ।ਫੈਸ਼ਨ ਟਾਈਕੂਨ ਯੁਸਾਕੂ ਮੇਜ਼ਾਵਾ ਅਤੇ ਨਿਰਮਾਤਾ ਯੋਜ਼ੋ ਹੀਰਾਨੋ, ਜੋ ਆਪਣੇ ਮਿਸ਼ਨ ਨੂੰ ਫਿਲਮਾਉਣ ਦੀ ਯੋਜਨਾ ਬਣਾ ਰਹੇ ਹਨ, ਰੂਸੀ ਪੁਲਾੜ ਯਾਤਰੀ ਅਲੈਗਜ਼ੈਂਡਰ ਮਿਸੁਰਕਿਨ ਦੇ ਨਾਲ ਰੂਸੀ ਸੋਯੂਜ਼ ਪੁਲਾੜ ਗੱਡੀ ਵਿੱਚ ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ ਲਈ ਰਵਾਨਾ ਹੋਏ।ਤਿੰਨਾਂ ਨੇ ਕਜ਼ਾਖਸਤਾਨ ਵਿੱਚ ਰੂਸ ਦੀ ਅਗਵਾਈ ਵਾਲੀ ਬਾਈਕੋਨੂਰ ਲਾਂਚ ਸਹੂਲਤ ਤੋਂ ਸੋਯੂਜ਼ MS-20 'ਤੇ ਸਵਾਰ ਹੋ ਕੇ ਦੁਪਹਿਰ 12:38 ਵਜੇ (0738 GMT) ਨਿਰਧਾਰਤ ਸਮੇਂ ਮੁਤਾਬਕ ਉਡਾਣ ਭਰੀ।

ਮੇਜ਼ਾਵਾ ਅਤੇ ਹੀਰਾਨੋ ਪੁਲਾੜ ਵਿੱਚ 12 ਦਿਨ ਬਿਤਾਉਣਗੇ। ਇਹ ਦੋਵੇਂ 2009 ਤੋਂ ਬਾਅਦ ਪੁਲਾੜ ਸਟੇਸ਼ਨ 'ਤੇ ਜਾਣ ਵਾਲੇ ਪਹਿਲੇ ਸਵੈ-ਭੁਗਤਾਨ ਕਰਨ ਵਾਲੇ ਸੈਲਾਨੀ ਹੋਣਗੇ। ਯਾਤਰਾ ਦੀ ਕੀਮਤ ਦਾ ਖੁਲਾਸਾ ਨਹੀਂ ਕੀਤਾ ਗਿਆ ਹੈ। ਮੇਜ਼ਾਵਾ ਨੇ ਮੰਗਲਵਾਰ ਨੂੰ ਇੱਕ ਪ੍ਰੀ-ਫਲਾਈਟ ਨਿਊਜ਼ ਕਾਨਫਰੰਸ ਦੌਰਾਨ ਕਿਹਾ ਕਿ ਮੈਂ ਪੁਲਾੜ ਤੋਂ ਧਰਤੀ ਨੂੰ ਦੇਖਣਾ ਚਾਹਾਂਗਾ। ਮੈਂ ਭਾਰ ਰਹਿਤ ਮਹਿਸੂਸ ਕਰਨ ਦੇ ਮੌਕੇ ਦਾ ਅਨੁਭਵ ਕਰਨਾ ਚਾਹਾਂਗਾ। ਉਹਨਾਂ ਨੇ ਅੱਗੇ ਕਿਹਾ ਕਿ ਮੇਰੀ ਇੱਕ ਨਿੱਜੀ ਇੱਛਾ ਵੀ ਹੈ ਕਿ ਮੈਂ ਉਤਸੁਕ ਹਾਂ ਕਿ ਪੁਲਾੜ ਮੈਨੂੰ ਕਿਵੇਂ ਬਦਲੇਗਾ, ਮੈਂ ਇਸ ਪੁਲਾੜ ਉਡਾਣ ਤੋਂ ਬਾਅਦ ਕਿਵੇਂ ਬਦਲਾਂਗਾ।

ਪੜ੍ਹੋ ਇਹ ਅਹਿਮ ਖਬਰ -ਅਧਿਐਨ 'ਚ ਖੁਲਾਸਾ, ਅਮਰੀਕਾ 'ਚ ਮਹਿਲਾ ਅਤੇ ਪੁਰਸ਼ ਡਾਕਟਰਾਂ ਦੀ ਕਮਾਈ 'ਚ ਵੱਡਾ ਫਰਕ 

ਇਸ ਪੁਲਾੜ ਯਾਤਰਾ ਦਾ ਆਯੋਜਨ ਕਰਨ ਵਾਲੀ ਕੰਪਨੀ ਸਪੇਸ ਐਡਵੈਂਚਰਜ਼ ਦੇ ਪ੍ਰਧਾਨ ਟੌਮ ਸ਼ੈਲੀ ਨੇ ਕਿਹਾ ਕਿ ਮੇਜ਼ਾਵਾ ਨੇ ਲੋਕਾਂ ਦੇ ਵਿਚਾਰ ਪ੍ਰਾਪਤ ਕਰਨ ਤੋਂ ਬਾਅਦ ਪੁਲਾੜ ਵਿਚ ਕਰਨ ਲਈ 100 ਚੀਜ਼ਾਂ ਦੀ ਸੂਚੀ ਤਿਆਰ ਕੀਤੀ ਹੈ।ਇਸ ਸੂਚੀ ਵਿੱਚ ਰੋਜ਼ਾਨਾ ਜੀਵਨ ਬਾਰੇ ਸਧਾਰਨ ਚੀਜ਼ਾਂ, ਸ਼ਾਇਦ ਕੁਝ ਹੋਰ ਮਜ਼ੇਦਾਰ ਗਤੀਵਿਧੀਆਂ ਅਤੇ ਗੰਭੀਰ ਸਵਾਲ ਵੀ ਸ਼ਾਮਲ ਹਨ। ਸ਼ੈਲੀ ਨੇ ਇਸ ਸਾਲ ਦੇ ਸ਼ੁਰੂ ਵਿੱਚ ਐਸੋਸੀਏਟਿਡ ਪ੍ਰੈਸ ਨੂੰ ਦੱਸਿਆ ਕਿ ਉਹ ਸਪੇਸ ਵਿੱਚ ਆਮ ਲੋਕਾਂ ਨਾਲ ਜੁੜਨ ਦਾ ਇਰਾਦਾ ਰੱਖਦੀ ਹੈ। ਉੱਥੇ ਮੇਜ਼ਾਵਾ ਨੇ ਜਾਪਾਨ ਦਾ ਸਭ ਤੋਂ ਵੱਡਾ ਆਨਲਾਈਨ ਫੈਸ਼ਨ ਮਾਲ ਜੋਜੋਟਾਊਨ ਸ਼ੁਰੂ ਕੀਤਾ ਅਤੇ ਫੈਸ਼ਨ ਦੇ ਖੇਤਰ ਵਿੱਚ ਆਪਣੀ ਕਿਸਮਤ ਅਜ਼ਮਾਈ। ਫੋਰਬਸ ਮੈਗਜ਼ੀਨ ਨੇ ਉਸ ਦੀ ਕੁੱਲ ਜਾਇਦਾਦ ਦੋ ਅਰਬ ਡਾਲਰ ਦੱਸੀ ਗਈ ਹੈ। ਕਾਰੋਬਾਰੀ ਨੇ ਐਲਨ ਮਸਕ ਦੀ ਸਟਾਰਸ਼ਿਪ ਦੁਆਰਾ ਚੰਦਰਮਾ ਦੇ ਆਲੇ-ਦੁਆਲੇ ਚੱਕਰ ਲਗਾਉਣ ਲਈ ਵੀ ਯਾਤਰਾ ਬੁੱਕ ਕੀਤੀ ਹੈ, ਜੋ ਕਿ 2023 ਵਿੱਚ ਹੋਣ ਦੀ ਸੰਭਾਵਨਾ ਹੈ। ਇਸ ਸਫ਼ਰ ਵਿੱਚ ਉਹ ਮੁਕਾਬਲੇ ਰਾਹੀਂ ਅੱਠ ਜੇਤੂਆਂ ਨਾਲ ਸ਼ਾਮਲ ਹੋਣਗੇ।