ਜਹਾਜ਼ ਦੇ ਵਿੰਗ ''ਚ ਧਮਾਕਾ ਹੋਣ ਕਾਰਨ ਲੱਗੀ ਭਿਆਨਕ ਅੱਗ, 184 ਯਾਤਰੀਆਂ ਵਿਚਾਲੇ ਪਿਆ ਚੀਕ ਚਿਹਾੜਾ

ਇੰਟਰਨੈਸ਼ਨਲ ਡੈਸਕ : ਇਟਲੀ ਦੇ ਬ੍ਰਿੰਡੀਸੀ ਹਵਾਈ ਅੱਡੇ 'ਤੇ ਅੱਜ ਸਵੇਰੇ ਰਾਇਨਏਅਰ ਦੇ ਜਹਾਜ਼ 'ਚ ਵੱਡਾ ਹਾਦਸਾ ਹੋਣ ਤੋਂ ਵਾਲ ਵਾਲ ਬਚ ਗਿਆ। ਟਿਊਰਿਨ ਤੋਂ ਉਡਾਣ ਭਰਨ ਵਾਲੇ ਜਹਾਜ਼ ਦੀ ਟੈਕਸਿੰਗ ਦੌਰਾਨ, ਯਾਤਰੀਆਂ ਨੇ ਜਹਾਜ਼ ਦੇ ਖੰਭਾਂ ਦੇ ਹੇਠਾਂ ਅੱਗ ਦੇਖੀ ਗਈ। ਉਸ ਸਮੇਂ ਜਹਾਜ਼ 'ਚ 184 ਯਾਤਰੀ ਸਵਾਰ ਸਨ, ਜਿਨ੍ਹਾਂ ਨੂੰ ਤੁਰੰਤ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ।

ਦੁਰਘਟਨਾ ਦਾ ਕਾਰਨ
ਜਾਣਕਾਰੀ ਮੁਤਾਬਕ ਜਹਾਜ਼ ਦੇ ਇੰਜਣ 'ਚ ਤਕਨੀਕੀ ਖਰਾਬੀ ਕਾਰਨ ਅੱਗ ਲੱਗ ਗਈ। ਹਾਦਸੇ 'ਚ ਕਿਸੇ ਵੀ ਯਾਤਰੀ ਨੂੰ ਕੋਈ ਸੱਟ ਨਹੀਂ ਲੱਗੀ ਅਤੇ ਫਾਇਰ ਬ੍ਰਿਗੇਡ ਦੀ ਟੀਮ ਨੇ ਸਮੇਂ 'ਤੇ ਅੱਗ 'ਤੇ ਕਾਬੂ ਪਾ ਲਿਆ।

ਹਵਾਈ ਅੱਡੇ ਦਾ ਹਾਲ
ਇਸ ਹਾਦਸੇ ਤੋਂ ਬਾਅਦ ਬ੍ਰਿੰਡੀਸੀ ਹਵਾਈ ਅੱਡੇ ਤੋਂ ਆਉਣ-ਜਾਣ ਵਾਲੀਆਂ ਸਾਰੀਆਂ ਉਡਾਣਾਂ ਨੂੰ ਅਸਥਾਈ ਤੌਰ 'ਤੇ ਰੋਕ ਦਿੱਤਾ ਗਿਆ ਹੈ। ਯਾਤਰੀਆਂ ਨੂੰ ਬੱਸ ਰਾਹੀਂ ਟਰਮੀਨਲ 'ਤੇ ਵਾਪਸ ਲਿਜਾਇਆ ਗਿਆ ਤੇ ਏਅਰਲਾਈਨ ਨੇ ਅਸੁਵਿਧਾ ਲਈ ਮੁਆਫੀ ਮੰਗੀ।

ਇਸ ਤੋਂ ਪਹਿਲਾਂ ਵੀ ਹਾਦਸੇ ਵਾਪਰ ਚੁੱਕੇ
ਇਸ ਤੋਂ ਪਹਿਲਾਂ ਵੀ ਰਾਇਨਏਅਰ ਦੇ ਜਹਾਜ਼ਾਂ ਨਾਲ ਹਾਦਸੇ ਵਾਪਰ ਚੁੱਕੇ ਹਨ। ਇਕ ਘਟਨਾ 'ਚ ਲੈਂਡਿੰਗ ਦੌਰਾਨ ਜਹਾਜ਼ ਦਾ ਟਾਇਰ ਫਟ ਗਿਆ, ਜਦਕਿ ਇਕ ਹੋਰ ਘਟਨਾ 'ਚ ਯਾਤਰੀਆਂ ਦੇ ਕੰਨਾਂ ਤੇ ਮੂੰਹ 'ਚੋਂ ਖੂਨ ਨਿਕਲਣ ਲੱਗਾ, ਜਿਸ ਕਾਰਨ ਜਹਾਜ਼ ਦੀ ਐਮਰਜੈਂਸੀ ਲੈਂਡਿੰਗ ਕਰਨੀ ਪਈ।