ਇਟਲੀ ''ਚ ਗੋਰੇ-ਗੋਰੀਆਂ ਨੇ ਵੀ ਪਾਇਆ ਭੰਗੜਾ, ਮੋਹਿਆ ਸਭ ਦਾ ਮਨ

ਮਿਲਾਨ, (ਸਾਬੀ ਚੀਨੀਆ)— 'ਭੰਗੜਾ ਬੁਆਇਜ਼ ਐਂਡ ਗਰਲਜ਼ ਗਰੁੱਪ' ਇਟਲੀ ਵਲੋਂ ਵਿਸਾਖੀ ਦੇ ਤਿਉਹਾਰ ਮੌਕੇ ਪੰਜਾਬੀ ਸੱਭਿਆਚਾਰ ਦੀ ਜਿੰਦ-ਜਾਨ ਲੋਕ ਨਾਚ ਭੰਗੜੇ ਦੇ ਮੁਕਾਬਲੇ ਕਰਵਾਏ ਗਏ। ਪਾਦੋਵਾ ਸ਼ਹਿਰ ਵਿਖੇ ਕਰਵਾਏ ਗਏ ਇਨ੍ਹਾਂ ਮੁਕਾਬਲਿਆਂ 'ਚ ਪੰਜਾਬੀ ਭੰਗੜਾ ਕਲਾਕਾਰਾਂ ਦੇ ਨਾਲ਼-ਨਾਲ਼ ਭੰਗੜੇ ਨੂੰ ਅਪਣਾ ਚੁੱਕੇ ਇਟਾਲੀਅਨ ਨੌਜਵਾਨਾਂ ਨੇ ਵੀ ਸ਼ਿਰਕਤ ਕਰਕੇ ਜਿੱਥੇ ਆਪਣੀ ਕਲਾ ਦਾ ਪ੍ਰਦਰਸ਼ਨ ਕੀਤਾ ,ਉੱਥੇ ਇਸ ਪ੍ਰਤੀਯੋਗਤਾ 'ਚ ਪ੍ਰਸ਼ੰਸਾਜਨਕ ਸਥਾਨ ਹਾਸਿਲ ਕੀਤੇ।

ਇਨ੍ਹਾਂ ਮੁਕਾਬਲਿਆਂ ਦੇ ਪ੍ਰਬੰਧਕ ਅੰਤਰਰਾਸ਼ਟਰੀ ਭੰਗੜਾ ਕੋਚ ਵਰਿੰਦਰਦੀਪ ਸਿੰਘ ਰਵੀ ਨੇ ਨਤੀਜਿਆਂ ਬਾਰੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਜੋੜੀਆਂ ਦੇ ਮੁਕਾਬਲੇ ਵਿੱਚ ਅਜੇ ਅਤੇ ਉਸ ਦਾ ਸਾਥੀ ਪਹਿਲੇ ਸਥਾਨ 'ਤੇ ਰਹੇ। ਆਨਾ ਅਤੇ ਮੀਕੇਲਾ ਦੀ ਜੋੜੀ ਦੂਜੇ ਸਥਾਨ 'ਤੇ ਅਤੇ ਗੁਰਕੀਰਤ ਤੇ ਅਲੀਸਾ ਤੀਜੇ ਸਥਾਨ 'ਤੇ ਰਹੇ। ਲੜਕੀਆਂ ਦੇ ਸਿੰਗਲ ਵਰਗ ਵਿੱਚ ਇਟਾਲੀਅਨ ਭੰਗੜਚੀ ਆਨਾ ਨੇ ਪਹਿਲਾ ਸਥਾਨ ਹਾਸਿਲ ਕੀਤਾ ਜਦੋਂ ਕਿ ਮਰਤੀਨਾ ਦੂਜੇ ਸਥਾਨ 'ਤੇ ਰਹੀ। ਇਸੇ ਪ੍ਰਕਾਰ ਲੜਕਿਆਂ ਦੇ ਸਿੰਗਲ ਵਰਗ ਵਿੱਚ ਨਿਰਭੈ ਸਿੰਘ ਫਸਟ, ਗੁਰਦੀਪ ਸਿੰਘ ਬਿੱਲਾ ਸੈਕਿੰਡ ਅਤੇ ਚਰਨਜੀਤ ਸਿੰਘ ਚੰਨਾਂ ਥਰਡ ਪੁਜੀਸ਼ਨ 'ਤੇ ਰਹੇ। ਮੁਕਾਬਲਿਆਂ ਦੌਰਾਨ ਜੱਜ ਦੀ ਭੁਮਿਕਾ ਅੰਤਰਰਾਸ਼ਟਰੀ ਭੰਗੜਚੀ ਸਰਬਜੀਤ ਸਿੰਘ ਬਾਜਵਾ ਨਾਰਵੇ, ਬਲਜਿੰਦਰ ਸਿੰਘ ਯੂ. ਕੇ. ਅਤੇ ਕੁਲਬੀਰ ਸਿੰਘ ਯੂ. ਕੇ. ਨੇ ਨਿਭਾਈ। ਜੇਤੂਆਂ ਨੂੰ ਨਕਦ ਇਨਾਮ ਅਤੇ ਦਿਲ ਖਿੱਚਵੇਂ ਯਾਦਗਾਰੀ ਸਨਮਾਨ ਚਿੰਨ੍ਹ ਅਤੇ ਪ੍ਰਸ਼ੰਸਾ ਪੱਤਰਾਂ ਨਾਲ਼ ਸਨਮਾਨਿਤ ਕੀਤਾ ਗਿਆ।