ਗਾਜ਼ਾ ''ਚ ਇਜ਼ਰਾਈਲੀ ਹਮਲਿਆਂ ''ਚ 13 ਲੋਕਾਂ ਦੀ ਮੌਤ, ਟਰੰਪ ਕਰਨਗੇ ''ਬੋਰਡ ਆਫ਼ ਪੀਸ'' ਦਾ ਐਲਾਨ

ਦੀਰ ਅਲ-ਬਲਾਹ: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਜਲਦ ਹੀ 'ਬੋਰਡ ਆਫ਼ ਪੀਸ' (Board of Peace) ਦਾ ਐਲਾਨ ਕੀਤੇ ਜਾਣ ਦੀ ਉਮੀਦ ਹੈ, ਜੋ ਗਾਜ਼ਾ 'ਚ ਨਾਜ਼ੁਕ ਜੰਗਬੰਦੀ ਦੀ ਨਿਗਰਾਨੀ ਕਰੇਗਾ। ਇਹ ਕਦਮ ਟਰੰਪ ਦੀ ਮੱਧ ਪੂਰਬ ਸ਼ਾਂਤੀ ਯੋਜਨਾ ਦਾ ਇੱਕ ਅਹਿਮ ਹਿੱਸਾ ਮੰਨਿਆ ਜਾ ਰਿਹਾ ਹੈ ਅਤੇ ਉਹ ਖ਼ੁਦ ਇਸ ਬੋਰਡ ਦੀ ਅਗਵਾਈ ਕਰਨਗੇ।

ਕੌਣ ਸੰਭਾਲੇਗਾ ਜ਼ਿੰਮੇਵਾਰੀ?
ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਜਾਣਕਾਰੀ ਦਿੱਤੀ ਹੈ ਕਿ ਬੁਲਗਾਰੀਆਈ ਡਿਪਲੋਮੈਟ ਨਿਕੋਲੇ ਮਲਾਡੇਨੋਵ (Nickolay Mladenov) ਨੂੰ ਇਸ ਬੋਰਡ ਦਾ ਡਾਇਰੈਕਟਰ-ਜਨਰਲ ਨਾਮਜ਼ਦ ਕੀਤਾ ਗਿਆ ਹੈ। ਮਲਾਡੇਨੋਵ ਪਹਿਲਾਂ ਵੀ ਸੰਯੁਕਤ ਰਾਸ਼ਟਰ ਦੇ ਦੂਤ ਵਜੋਂ ਇਜ਼ਰਾਈਲ ਅਤੇ ਹਮਾਸ ਵਿਚਾਲੇ ਤਣਾਅ ਘਟਾਉਣ ਲਈ ਕੰਮ ਕਰ ਚੁੱਕੇ ਹਨ। ਇਸ ਯੋਜਨਾ ਦੇ ਤਹਿਤ, ਇਹ ਬੋਰਡ ਹਮਾਸ ਦੇ ਨਿਹੱਥੇਕਰਨ (Disarmament), ਇੱਕ ਨਵੀਂ ਫਲਸਤੀਨੀ ਸਰਕਾਰ ਦੀ ਨਿਗਰਾਨੀ, ਅੰਤਰਰਾਸ਼ਟਰੀ ਸੁਰੱਖਿਆ ਬਲ ਦੀ ਤਾਇਨਾਤੀ ਅਤੇ ਖੇਤਰ ਦੇ ਮੁੜ ਨਿਰਮਾਣ ਵਰਗੇ ਵੱਡੇ ਕੰਮਾਂ ਦੀ ਦੇਖਰੇਖ ਕਰੇਗਾ।

ਹਮਲਿਆਂ 'ਚ ਬੱਚਿਆਂ ਸਣੇ 13 ਹਲਾਕ
ਇੱਕ ਪਾਸੇ ਜਿੱਥੇ ਸ਼ਾਂਤੀ ਦੀਆਂ ਕੋਸ਼ਿਸ਼ਾਂ ਹੋ ਰਹੀਆਂ ਹਨ, ਉੱਥੇ ਹੀ ਦੂਜੇ ਪਾਸੇ ਹਿੰਸਾ ਰੁਕਣ ਦਾ ਨਾਂ ਨਹੀਂ ਲੈ ਰਹੀ। ਤਾਜ਼ਾ ਇਜ਼ਰਾਈਲੀ ਹਮਲਿਆਂ 'ਚ ਘੱਟੋ-ਘੱਟ 13 ਲੋਕ ਮਾਰੇ ਗਏ ਹਨ, ਜਿਨ੍ਹਾਂ 'ਚ ਉੱਤਰੀ ਗਜ਼ਾ ਦੇ ਬੱਚੇ ਵੀ ਸ਼ਾਮਲ ਹਨ। ਇੱਕ ਟੈਂਟ ਕੈਂਪ 'ਤੇ ਹੋਏ ਹਮਲੇ 'ਚ ਇੱਕ 11 ਸਾਲਾ ਬੱਚੀ, ਜੋ ਡਾਕਟਰ ਬਣਨ ਦਾ ਸੁਪਨਾ ਵੇਖਦੀ ਸੀ ਤੇ ਦੋ ਹੋਰ ਮੁੰਡਿਆਂ ਦੀ ਮੌਤ ਹੋ ਗਈ। ਇਜ਼ਰਾਈਲੀ ਫੌਜ ਦਾ ਕਹਿਣਾ ਹੈ ਕਿ ਇਹ ਕਾਰਵਾਈ ਹਮਾਸ ਵੱਲੋਂ ਕੀਤੀ ਗਈ ਮਿਜ਼ਾਈਲ ਫਾਇਰਿੰਗ ਦੇ ਜਵਾਬ 'ਚ ਕੀਤੀ ਗਈ ਹੈ।

ਜੰਗਬੰਦੀ ਦੀ ਸਥਿਤੀ
ਤਿੰਨ ਮਹੀਨੇ ਪਹਿਲਾਂ ਸ਼ੁਰੂ ਹੋਈ ਇਸ ਜੰਗਬੰਦੀ ਦੌਰਾਨ ਹੁਣ ਤੱਕ 400 ਤੋਂ ਵੱਧ ਫਲਸਤੀਨੀ ਆਪਣੀ ਜਾਨ ਗੁਆ ਚੁੱਕੇ ਹਨ। ਇਜ਼ਰਾਈਲ ਤੇ ਹਮਾਸ ਇੱਕ-ਦੂਜੇ ਉੱਤੇ ਸਮਝੌਤੇ ਦੀ ਉਲੰਘਣਾ ਦੇ ਦੋਸ਼ ਲਗਾ ਰਹੇ ਹਨ। ਯੂਰਪੀ ਸੰਘ ਦੀ ਵਿਦੇਸ਼ ਨੀਤੀ ਦੀ ਮੁਖੀ ਕਾਜਾ ਕਾਲਸ ਨੇ ਸਥਿਤੀ ਨੂੰ ਬੇਹੱਦ ਗੰਭੀਰ ਦੱਸਦਿਆਂ ਕਿਹਾ ਕਿ ਹਮਾਸ ਨੇ ਅਜੇ ਤੱਕ ਹਥਿਆਰ ਸੁੱਟਣ ਤੋਂ ਇਨਕਾਰ ਕੀਤਾ ਹੈ। ਫਿਲਹਾਲ, ਗਜ਼ਾ 'ਚ ਆਖਰੀ ਬੰਧਕਾਂ ਦੀਆਂ ਦੇਹਾਂ ਨੂੰ ਬਰਾਮਦ ਕਰਨ ਦੀਆਂ ਕੋਸ਼ਿਸ਼ਾਂ ਜਾਰੀ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e