ਇਜ਼ਰਾਈਲ-ਹਮਾਸ ਜੰਗ : ਗਾਜ਼ਾ ''ਚ ਟੈਂਟ ''ਚ ਰਹਿ ਰਹੀ ਮਾਸੂਮ ਦੀ ਠੰਡ ਕਾਰਨ ਮੌਤ

ਯੇਰੂਸ਼ਲਮ (ਏਪੀ) : ਇਜ਼ਰਾਈਲ ਅਤੇ ਹਮਾਸ ਵਿਚਾਲੇ ਚੱਲ ਰਹੀ ਜੰਗ ਕਾਰਨ ਗਾਜ਼ਾ ਵਿੱਚ ਕੜਾਕੇ ਦੀ ਠੰਡ 'ਚ ਤੰਬੂ 'ਚ ਰਹਿਣ ਲਈ ਮਜਬੂਰ ਤਿੰਨ ਹਫ਼ਤਿਆਂ ਦੀ ਬੱਚੀ ਦੀ ਮੌਤ ਹੋ ਗਈ। ਇਹ ਘਟਨਾ ਅਜਿਹੇ ਸਮੇਂ 'ਚ ਹੋਈ ਹੈ ਜਦੋਂ ਇਜ਼ਰਾਈਲ ਅਤੇ ਹਮਾਸ ਇਕ ਦੂਜੇ 'ਤੇ ਜੰਗਬੰਦੀ ਸਮਝੌਤੇ ਨੂੰ ਪੇਚੀਦਾ ਬਣਾਉਣ ਦਾ ਦੋਸ਼ ਲਗਾ ਰਹੇ ਹਨ। ਡਾਕਟਰਾਂ ਨੇ ਦੱਸਿਆ ਕਿ ਹਾਲ ਹੀ ਦੇ ਦਿਨਾਂ 'ਚ ਗਾਜ਼ਾ 'ਚ ਤੰਬੂਆਂ 'ਚ ਰਹਿ ਰਹੇ ਬੱਚੇ ਦੀ ਠੰਡ ਕਾਰਨ ਮੌਤ ਦਾ ਇਹ ਤੀਜਾ ਮਾਮਲਾ ਹੈ। ਇਜ਼ਰਾਈਲ ਅਤੇ ਹਮਾਸ ਵਿਚਾਲੇ ਪਿਛਲੇ 14 ਮਹੀਨਿਆਂ ਤੋਂ ਚੱਲ ਰਹੀ ਜੰਗ ਨੇ ਭਾਰੀ ਤਬਾਹੀ ਮਚਾਈ ਹੈ।

ਗਾਜ਼ਾ ਦੇ ਸਿਹਤ ਮੰਤਰਾਲੇ ਦੇ ਅਨੁਸਾਰ, ਗਾਜ਼ਾ 'ਤੇ ਇਜ਼ਰਾਈਲੀ ਬੰਬਾਰੀ ਅਤੇ ਜ਼ਮੀਨੀ ਹਮਲਿਆਂ ਵਿੱਚ 45,000 ਤੋਂ ਵੱਧ ਫਲਸਤੀਨੀ ਮਾਰੇ ਗਏ ਹਨ, ਜਿਨ੍ਹਾਂ ਵਿੱਚ ਅੱਧੇ ਤੋਂ ਵੱਧ ਔਰਤਾਂ ਅਤੇ ਬੱਚੇ ਹਨ। ਇਸ ਜੰਗ ਕਾਰਨ ਗਾਜ਼ਾ ਦੀ ਲਗਪਗ 23 ਲੱਖ ਆਬਾਦੀ ਵਿੱਚੋਂ 90 ਫ਼ੀਸਦੀ ਲੋਕਾਂ ਨੂੰ ਕਈ ਵਾਰ ਬੇਘਰ ਹੋਣਾ ਪਿਆ ਹੈ। ਠੰਡ ਸ਼ੁਰੂ ਹੋਣ ਕਾਰਨ ਟੈਂਟਾਂ ਵਿੱਚ ਰਹਿ ਰਹੇ ਹਜ਼ਾਰਾਂ ਲੋਕ ਕੰਬ ਰਹੇ ਹਨ। ਸਹਾਇਤਾ ਸਮੂਹ ਭੋਜਨ ਅਤੇ ਹੋਰ ਜ਼ਰੂਰੀ ਚੀਜ਼ਾਂ ਹਾਸਲ ਕਰਨ ਲਈ ਸੰਘਰਸ਼ ਕਰ ਰਹੇ ਹਨ। ਸਹਾਇਤਾ ਸਮੂਹਾਂ ਅਨੁਸਾਰ ਇਨ੍ਹਾਂ ਲੋਕਾਂ ਕੋਲ ਕੰਬਲ ਅਤੇ ਗਰਮ ਕੱਪੜੇ ਵੀ ਨਹੀਂ ਹਨ। ਖਾਨ ਯੂਨਿਸ ਸ਼ਹਿਰ ਦੇ ਬਾਹਰ ਮੁਵਾਸੀ ਖੇਤਰ ਵਿੱਚ ਇੱਕ ਤੰਬੂ ਵਿੱਚ ਰਹਿਣ ਲਈ ਮਜ਼ਬੂਰ ਤਿੰਨ ਹਫ਼ਤਿਆਂ ਦੀ ਸੀਲਾ ਦੇ ਪਿਤਾ ਮਹਿਮੂਦ ਅਲ-ਫਾਸੀਹ ਨੇ ਕਿਹਾ ਕਿ ਉਸਨੇ ਠੰਡ ਤੋਂ ਬਚਾਉਣ ਲਈ ਲੜਕੀ ਨੂੰ ਕੰਬਲ ਵਿੱਚ ਲਪੇਟਿਆ ਸੀ ਪਰ ਇਹ ਕਾਫੀ ਨਹੀਂ ਸੀ। ਉਨ੍ਹਾਂ ਦੱਸਿਆ ਕਿ ਮੰਗਲਵਾਰ ਰਾਤ ਨੂੰ 9 ਡਿਗਰੀ ਸੈਲਸੀਅਸ ਤਾਪਮਾਨ ਦੇ ਵਿਚਕਾਰ ਤੰਬੂ ਅੰਦਰ ਠੰਡੀਆਂ ਹਵਾਵਾਂ ਚੱਲ ਰਹੀਆਂ ਸਨ ਅਤੇ ਜ਼ਮੀਨ ਠੰਡੀ ਹੋ ਗਈ ਸੀ।

ਫਸੀਹ ਨੇ ਦੱਸਿਆ ਕਿ ਸਿਲਾ ਰਾਤ ਨੂੰ ਤਿੰਨ ਵਾਰ ਰੋਂਦੀ ਹੋਈ ਉੱਠੀ ਅਤੇ ਸਵੇਰੇ ਉਨ੍ਹਾਂ ਨੇ ਦੇਖਿਆ ਕਿ ਉਹ ਬੇਹੋਸ਼ ਸੀ ਅਤੇ ਉਸ ਦਾ ਸਰੀਰ ਅਕੜਿਆ ਹੋਇਆ ਸੀ। ਉਹ ਉਸ ਨੂੰ ਹਸਪਤਾਲ ਲੈ ਗਿਆ ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਉਸ ਦੇ ਫੇਫੜਿਆਂ ਨੇ ਕੰਮ ਕਰਨਾ ਬੰਦ ਕਰ ਦਿੱਤਾ ਸੀ।