ਭਾਰਤੀਆਂ ਨੂੰ Donald Trump ''ਤੇ ਭਰੋਸਾ, 84 ਫੀਸਦੀ ਲੋਕਾਂ ਨੇ ਦੂਜੇ ਕਾਰਜਕਾਲ ਨੂੰ ਦੱਸਿਆ ਲਾਭਕਾਰੀ

ਵਾਸ਼ਿੰਗਟਨ- ਅਮਰੀਕਾ ਦੇ ਨਵੇਂ ਚੁਣੇ ਗਏ ਰਾਸ਼ਟਰਪਤੀ ਡੋਨਾਲਡ ਟਰੰਪ 20 ਜਨਵਰੀ ਨੂੰ ਅਹੁਦੇ ਦੀ ਸਹੁੰ ਚੁੱਕਣਗੇ। ਇਸ ਦੌਰਾਨ ਇੱਕ ਯੂਰਪੀਅਨ ਥਿੰਕ-ਟੈਂਕ ਦੁਆਰਾ ਜਾਰੀ ਕੀਤੇ ਗਏ ਇੱਕ ਗਲੋਬਲ ਸਰਵੇਖਣ ਮੁਤਾਬਕ ਜ਼ਿਆਦਾਤਰ ਭਾਰਤੀਆਂ ਦਾ ਮੰਨਣਾ ਹੈ ਕਿ ਡੋਨਾਲਡ ਟਰੰਪ ਦੀ ਅਮਰੀਕੀ ਰਾਸ਼ਟਰਪਤੀ ਵਜੋਂ ਵਾਪਸੀ ਦੁਨੀਆ ਵਿੱਚ ਸ਼ਾਂਤੀ ਅਤੇ ਭਾਰਤ-ਅਮਰੀਕਾ ਸਬੰਧਾਂ ਲਈ ਇੱਕ ਚੰਗੀ ਗੱਲ ਹੋਵੇਗੀ। ਯੂਰਪੀਅਨ ਕੌਂਸਲ ਆਨ ਫੌਰਨ ਰਿਲੇਸ਼ਨਜ਼ (ECFR) ਨੇ ਇਹ ਸਰਵੇਖਣ ਆਕਸਫੋਰਡ ਯੂਨੀਵਰਸਿਟੀ ਦੇ 'Europe in a Changing World' ਪ੍ਰੋਜੈਕਟ ਦੇ ਸਹਿਯੋਗ ਨਾਲ ਕੀਤਾ। ਇਹ ਪਾਇਆ ਗਿਆ ਕਿ ਬਹੁਤ ਸਾਰੇ ਦੇਸ਼ਾਂ ਦੇ ਲੋਕਾਂ ਦਾ ਟਰੰਪ ਦੇ ਦੂਜੇ ਕਾਰਜਕਾਲ ਪ੍ਰਤੀ ਸਕਾਰਾਤਮਕ ਰਵੱਈਆ ਹੈ।

ਪੀ.ਟੀ.ਆਈ ਅਨੁਸਾਰ ਸਰਵੇਖਣ ਵਿੱਚ ਭਾਰਤ ਨੂੰ 'ਟਰੰਪ ਵੈਲਕਮਰਸ' ਦੀ ਸ਼੍ਰੇਣੀ ਵਿੱਚ ਰੱਖਿਆ ਗਿਆ ਹੈ, ਜੋ ਦਰਸਾਉਂਦਾ ਹੈ ਕਿ ਟਰੰਪ ਦਾ ਦੂਜਾ ਕਾਰਜਕਾਲ ਨਾ ਸਿਰਫ਼ ਭਾਰਤ ਲਈ ਸਗੋਂ ਪੂਰੀ ਦੁਨੀਆ ਲਈ ਚੰਗਾ ਹੋ ਸਕਦਾ ਹੈ। ਸਰਵੇਖਣ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਭਾਰਤ, ਚੀਨ, ਤੁਰਕੀ ਅਤੇ ਬ੍ਰਾਜ਼ੀਲ ਵਰਗੇ ਦੇਸ਼ਾਂ ਵਿੱਚ ਜ਼ਿਆਦਾਤਰ ਲੋਕ ਮੰਨਦੇ ਹਨ ਕਿ ਟਰੰਪ ਦਾ ਰਾਸ਼ਟਰਪਤੀ ਬਣਨਾ ਅਮਰੀਕਾ, ਉਨ੍ਹਾਂ ਦੇ ਦੇਸ਼ ਅਤੇ ਵਿਸ਼ਵ ਸ਼ਾਂਤੀ ਲਈ ਲਾਭਦਾਇਕ ਹੋਵੇਗਾ। ਸਰਵੇਖਣ ਅਨੁਸਾਰ ਭਾਰਤ ਵਿੱਚ 82% ਲੋਕ ਮੰਨਦੇ ਹਨ ਕਿ ਟਰੰਪ ਦੀ ਜਿੱਤ ਦੁਨੀਆ ਵਿੱਚ ਸ਼ਾਂਤੀ ਲਈ ਚੰਗੀ ਹੈ। 84% ਲੋਕਾਂ ਦਾ ਕਹਿਣਾ ਹੈ ਕਿ ਇਹ ਭਾਰਤ ਲਈ ਸਕਾਰਾਤਮਕ ਹੈ। ਅਤੇ 85% ਲੋਕਾਂ ਨੇ ਇਸਨੂੰ ਅਮਰੀਕੀ ਨਾਗਰਿਕਾਂ ਲਈ ਲਾਭਦਾਇਕ ਮੰਨਿਆ।

'Never Trumpers' ਸ਼੍ਰੇਣੀ ਵਿੱਚ ਪ੍ਰਤੀਕੂਲ ਹਾਲਾਤ

ਦੂਜੇ ਪਾਸੇ,'Never Trumpers' ਨਾਮਕ ਸ਼੍ਰੇਣੀ ਵਿੱਚ ਉਹ ਲੋਕ ਸ਼ਾਮਲ ਹਨ ਜੋ ਟਰੰਪ ਦੀ ਜਿੱਤ ਨੂੰ ਅਮਰੀਕਾ ਅਤੇ ਵਿਸ਼ਵ ਸ਼ਾਂਤੀ ਲਈ ਨਕਾਰਾਤਮਕ ਮੰਨਦੇ ਹਨ। ਇਹ ਸ਼੍ਰੇਣੀ ਮੁੱਖ ਤੌਰ 'ਤੇ ਯੂਰਪ, ਖਾਸ ਕਰਕੇ ਯੂ.ਕੇ ਵਿੱਚ ਕੇਂਦ੍ਰਿਤ ਹੈ। ਜਿੱਥੇ ਅੱਧੇ ਨਾਗਰਿਕ ਟਰੰਪ ਦੇ ਵਿਰੁੱਧ ਹਨ। ਇਹ ਸਮੂਹ ਨਾ ਸਿਰਫ਼ ਯੂਰਪ ਵਿੱਚ ਸਗੋਂ ਬ੍ਰਾਜ਼ੀਲ, ਦੱਖਣੀ ਕੋਰੀਆ ਅਤੇ ਤੁਰਕੀ ਵਰਗੇ ਦੇਸ਼ਾਂ ਵਿੱਚ ਵੀ ਟਰੰਪ ਦੇ ਪ੍ਰਗਤੀਸ਼ੀਲ ਵਿਰੋਧ ਨੂੰ ਦਰਸਾਉਂਦਾ ਹੈ।

ਪੜ੍ਹੋ ਇਹ ਅਹਿਮ ਖ਼ਬਰ-ਟਰੂਡੋ ਦੇ ਅਸਤੀਫ਼ੇ ਤੋਂ ਬਾਅਦ Canada ਤੋਂ ਆਈ Good news, ਭਾਰਤੀਆਂ ਦੀ ਲੱਗੀ ਲਾਟਰੀ

ਯੂਰਪ ਦਾ ਵੱਖਰਾ ਦ੍ਰਿਸ਼ਟੀਕੋਣ 

ਰਿਪੋਰਟ ਦੇ ਸਹਿ-ਲੇਖਕਾਂ ਮਾਰਕ ਲਿਓਨਾਰਡ, ਇਵਾਨ ਕ੍ਰਾਸਟੇਵ ਅਤੇ ਟਿਮੋਥੀ ਗਾਰਟਨ ਐਸ਼ ਨੇ ਸੁਝਾਅ ਦਿੱਤਾ ਕਿ ਯੂਰਪੀਅਨ ਨੇਤਾਵਾਂ ਨੂੰ ਟਰੰਪ ਵਿਰੁੱਧ ਵਿਸ਼ਵਵਿਆਪੀ ਵਿਰੋਧ ਬਣਾਉਣ ਵਿੱਚ ਮੁਸ਼ਕਲ ਆ ਸਕਦੀ ਹੈ। ਯੂਰਪੀਅਨ ਯੂਨੀਅਨ (EU) ਨੂੰ ਆਪਣੀ ਸਥਿਤੀ ਮਜ਼ਬੂਤ ​​ਕਰਨ ਲਈ ਕੁਝ ਕਦਮ ਚੁੱਕਣੇ ਪੈਣਗੇ। ECFR ਦੇ ਸਹਿ-ਸੰਸਥਾਪਕ ਅਤੇ ਨਿਰਦੇਸ਼ਕ ਮਾਰਕ ਲਿਓਨਾਰਡ ਨੇ ਕਿਹਾ ਕਿ ਭਾਵੇਂ ਬਹੁਤ ਸਾਰੇ ਯੂਰਪੀ ਟਰੰਪ ਦੀ ਵਾਪਸੀ ਤੋਂ ਚਿੰਤਤ ਹਨ ਪਰ ਦੁਨੀਆ ਦਾ ਬਹੁਤ ਸਾਰਾ ਹਿੱਸਾ ਇਸਨੂੰ ਅਮਰੀਕਾ, ਯੂਕ੍ਰੇਨ ਅਤੇ ਮੱਧ ਪੂਰਬ ਵਿੱਚ ਸ਼ਾਂਤੀ ਲਈ ਸਕਾਰਾਤਮਕ ਮੰਨਦਾ ਹੈ।

ਸਰਵੇਖਣ ਦਾ ਆਧਾਰ

ਇਹ ਸਰਵੇਖਣ 11 ਯੂਰਪੀ ਸੰਘ ਦੇ ਮੈਂਬਰ ਦੇਸ਼ਾਂ (ਜਰਮਨੀ, ਫਰਾਂਸ, ਇਟਲੀ, ਪੋਲੈਂਡ, ਪੁਰਤਗਾਲ, ਸਪੇਨ, ਡੈਨਮਾਰਕ, ਐਸਟੋਨੀਆ, ਰੋਮਾਨੀਆ, ਬੁਲਗਾਰੀਆ ਅਤੇ ਹੰਗਰੀ) ਦੇ ਨਾਲ-ਨਾਲ ਭਾਰਤ, ਚੀਨ, ਗ੍ਰੇਟ ਬ੍ਰਿਟੇਨ, ਯੂਕ੍ਰੇਨ, ਤੁਰਕੀ, ਰੂਸ, ਸੰਯੁਕਤ ਰਾਜ ਅਮਰੀਕਾ, ਬ੍ਰਾਜ਼ੀਲ, ਸਾਊਦੀ ਅਰਬ, ਦੱਖਣੀ ਅਫਰੀਕਾ, ਇੰਡੋਨੇਸ਼ੀਆ, ਦੱਖਣੀ ਕੋਰੀਆ ਅਤੇ ਸਵਿਟਜ਼ਰਲੈਂਡ ਵਰਗੇ ਦੇਸ਼ਾਂ ਵਿੱਚ ਕੀਤਾ ਗਿਆ ਸੀ। ਇਹ YouGov, Datapraxis ਅਤੇ Gallup International Association ਵਰਗੇ ਪ੍ਰਮੁੱਖ ਪੋਲਸਟਰਾਂ ਦੁਆਰਾ ਕਰਵਾਇਆ ਗਿਆ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।