ਨੌਕਰੀ ਅਤੇ ਵੀਜ਼ਾ ਦੇ ਬਦਲੇ ਮੰਗੇ 94 ਲੱਖ! ਅਮਰੀਕਾ 'ਚ ਭਾਰਤੀ ਕਰਮਚਾਰੀ ਨੇ ਚੁੱਕਿਆ ਵੱਡਾ ਕਦਮ

ਇੰਟਰਨੈਸ਼ਨਲ ਡੈਸਕ- ਅਮਰੀਕਾ ਦੇ ਟੈਕਸਾਸ ਵਿੱਚ ਇੱਕ ਭਾਰਤੀ ਕਰਮਚਾਰੀ ਨੇ ਆਪਣੇ ਮਾਲਕ ਵਿਰੁੱਧ ਮੁਕੱਦਮਾ ਦਾਇਰ ਕੀਤਾ ਹੈ। ਕਰਮਚਾਰੀ ਰਿਸ਼ੀਕੇਸ਼ ਰਾਜ ਮਿਸ਼ਾਲਾ ਨੇ ਦੋਸ਼ ਲਗਾਇਆ ਹੈ ਕਿ ਉਸਦੇ ਮਾਲਕ ਨੇ ਉਸ ਨੂੰ ਨੌਕਰੀ ਅਤੇ ਵੀਜ਼ਾ ਬਚਾਉਣ ਦੇ ਬਦਲੇ ਉਸ ਤੋਂ ਲਗਭਗ 94 ਲੱਖ ਰੁਪਏ (ਇੱਕ ਲੱਖ ਡਾਲਰ) ਦੀ ਮੰਗ ਕੀਤੀ ਹੈ। ਰਿਸ਼ੀਕੇਸ਼ ਦਾ ਕਹਿਣਾ ਹੈ ਕਿ ਉਸਦੇ ਭਾਰਤੀ-ਅਮਰੀਕੀ ਮਾਲਕ ਸਾਈ ਜਿਤੇਂਦਰ ਕਲਾਗਰਾ ਨੇ ਉਸ 'ਤੇ ਪੈਸੇ ਦਾ ਭੁਗਤਾਨ ਕਰਨ ਲਈ ਬਹੁਤ ਦਬਾਅ ਪਾਇਆ।

ਸ਼ਿਕਾਇਤ ਦੇ ਅਨੁਸਾਰ ਜਦੋਂ ਰਿਸ਼ੀਕੇਸ਼ ਨੇ ਪੈਸੇ ਬਾਰੇ ਸਵਾਲ ਕੀਤਾ, ਤਾਂ ਉਸਨੂੰ ਡਰਾਇਆ ਗਿਆ। ਮਾਲਕ ਨੇ ਉਸਨੂੰ ਅਮਰੀਕੀ ਇਮੀਗ੍ਰੇਸ਼ਨ ਵਿਭਾਗ (ICE) ਨੂੰ ਰਿਪੋਰਟ ਕਰਨਐ ਦੀ ਧਮਕੀ ਦਿੱਤੀ। ਇਸ ਤੋਂ ਇਲਾਵਾ ਰਿਸ਼ੀਕੇਸ਼ ਨੇ ਇਹ ਵੀ ਦੋਸ਼ ਲਗਾਇਆ ਕਿ ਉਸਦੇ ਪਿਤਾ ਨੂੰ ਨੁਕਸਾਨ ਪਹੁੰਚਾਉਣ ਦੀ ਧਮਕੀ ਦਿੱਤੀ ਗਈ ਸੀ। ਹਾਲਾਂਕਿ, ਇਹ ਦੋਸ਼ ਅਜੇ ਤੱਕ ਅਦਾਲਤ ਵਿੱਚ ਸਾਬਤ ਨਹੀਂ ਹੋਏ ਹਨ।

ਪੜ੍ਹੋ ਇਹ ਅਹਿਮ ਖ਼ਬਰ- ਅਮਰੀਕਾ ਜਾਣ ਦੇ ਚਾਹਵਾਨ ਪੰਜਾਬੀਆਂ ਨੂੰ ਵੱਡਾ ਝਟਕਾ! ਟਰੰਪ ਸਰਕਾਰ ਨੇ ਕਰ'ਤਾ ਇਹ ਐਲਾਨ

ਰਿਸ਼ੀਕੇਸ਼ 2023 ਵਿੱਚ ਆਪਣੀ ਮਾਸਟਰ ਡਿਗਰੀ ਪੂਰੀ ਕਰਨ ਤੋਂ ਬਾਅਦ ਵਿਦਿਆਰਥੀ ਵੀਜ਼ੇ 'ਤੇ ਅਮਰੀਕਾ ਆਇਆ ਸੀ। ਬਾਅਦ ਵਿੱਚ ਉਸਨੂੰ ਇੱਕ ਕੰਪਨੀ ਵਿੱਚ ਨੌਕਰੀ ਮਿਲੀ ਜੋ H-1B ਵੀਜ਼ਾ ਪ੍ਰਦਾਨ ਕਰਦੀ ਹੈ। ਇਹ ਵੀਜ਼ਾ ਅਮਰੀਕੀ ਕੰਪਨੀਆਂ ਨੂੰ ਵਿਦੇਸ਼ੀ ਪੇਸ਼ੇਵਰਾਂ ਨੂੰ ਨੌਕਰੀ 'ਤੇ ਰੱਖਣ ਦੀ ਆਗਿਆ ਦਿੰਦਾ ਹੈ। ਰਿਸ਼ੀਕੇਸ਼ ਨੂੰ ਉਮੀਦ ਸੀ ਕਿ ਇਹ ਨੌਕਰੀ ਸਥਾਈ ਅਮਰੀਕੀ ਨਾਗਰਿਕਤਾ ਵੱਲ ਲੈ ਜਾਵੇਗੀ। ਹਾਲਾਂਕਿ ਕੰਪਨੀ ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ ਉਸਨੂੰ ਬੈਂਚ 'ਤੇ ਰੱਖਿਆ ਗਿਆ, ਜਿਸਦਾ ਅਰਥ ਹੈ ਕਿ ਕਰਮਚਾਰੀ ਕੋਲ ਕੋਈ ਸਰਗਰਮ ਪ੍ਰੋਜੈਕਟ ਨਹੀਂ ਹੈ। ਕੇਸ ਦੇ ਅਨੁਸਾਰ ਕੋਈ ਕੰਮ ਨਾ ਹੋਣ ਦੇ ਬਾਵਜੂਦ ਰਿਸ਼ੀਕੇਸ਼ ਤੋਂ ਉਸਦੀ ਨੌਕਰੀ ਨੂੰ ਕਾਗਜ਼ 'ਤੇ ਰੱਖਣ ਅਤੇ ਉਸਦਾ H-1B ਵੀਜ਼ਾ ਸੁਰੱਖਿਅਤ ਕਰਨ ਲਈ ਕਾਫ਼ੀ ਰਕਮ ਮੰਗੀ ਗਈ ਸੀ।

ਇਹ ਦੋਸ਼ ਹੈ ਕਿ ਕੰਪਨੀ ਨੇ ਰਿਸ਼ੀਕੇਸ਼ ਦੇ ਤਨਖਾਹ ਦਸਤਾਵੇਜ਼ ਵੀ ਰੋਕ ਦਿੱਤੇ, ਜੋ ਨੌਕਰੀਆਂ ਬਦਲਣ ਜਾਂ ਉਸਦੇ ਵੀਜ਼ਾ ਨੂੰ ਨਵਿਆਉਣ ਲਈ ਮਹੱਤਵਪੂਰਨ ਹਨ। ਰਿਸ਼ੀਕੇਸ਼ ਨੇ ਕਿਹਾ ਕਿ ਆਪਣਾ ਵੀਜ਼ਾ ਗੁਆਉਣ ਦੇ ਡਰੋਂ ਉਸਨੇ ਲਗਭਗ 8,800 ਡਾਲਰ ਨਕਦ ਵੀ ਅਦਾ ਕੀਤੇ। ਹੁਣ ਰਿਸ਼ੀਕੇਸ਼ ਦੀ ਕਾਨੂੰਨੀ ਟੀਮ ਨੇ ਕੰਪਨੀ 'ਤੇ ਮਨੁੱਖੀ ਤਸਕਰੀ ਅਤੇ ਜ਼ਬਰਦਸਤੀ ਮਜ਼ਦੂਰੀ ਦੇ ਗੰਭੀਰ ਦੋਸ਼ ਲਗਾਏ ਹਨ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਕੰਪਨੀ ਨੂੰ ਰਿਸ਼ੀਕੇਸ਼ ਨੂੰ 97,248 ਡਾਲਰ ਵਾਪਸੀ ਤਨਖਾਹ ਅਤੇ ਜਬਰਦਸਤੀ ਲਏ ਗਏ ਪੈਸੇ ਦੇਣੇ ਚਾਹੀਦੇ ਹਨ। ਇਹ ਮਾਮਲਾ ਅਜਿਹੇ ਸਮੇਂ ਆਇਆ ਹੈ ਜਦੋਂ ਸੰਯੁਕਤ ਰਾਜ ਅਮਰੀਕਾ ਵਿੱਚ H-1B ਵੀਜ਼ਾ ਦੀ ਵਿਆਪਕ ਤੌਰ 'ਤੇ ਚਰਚਾ ਹੋ ਰਹੀ ਹੈ। ਭਾਰਤੀ ਇਸ ਵੀਜ਼ੇ ਦੇ ਸਭ ਤੋਂ ਵੱਡੇ ਲਾਭਪਾਤਰੀ ਹਨ। 2024 ਦੇ ਅੰਕੜਿਆਂ ਦੇ ਅਨੁਸਾਰ ਸੰਯੁਕਤ ਰਾਜ ਵਿੱਚ ਪ੍ਰਵਾਨਿਤ ਸਾਰੇ H-1B ਵੀਜ਼ਿਆਂ ਵਿੱਚੋਂ 71 ਪ੍ਰਤੀਸ਼ਤ ਭਾਰਤੀ ਨਾਗਰਿਕਾਂ ਨੂੰ ਦਿੱਤੇ ਗਏ ਹਨ। ਇਹ ਪ੍ਰੋਗਰਾਮ ਤਕਨਾਲੋਜੀ ਅਤੇ ਇੰਜੀਨੀਅਰਿੰਗ ਖੇਤਰਾਂ ਵਿੱਚ ਕੰਪਨੀਆਂ ਲਈ ਮਹੱਤਵਪੂਰਨ ਮੰਨਿਆ ਜਾਂਦਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।