SFJ ਯੂ.ਕੇ. ਨੂੰ ਵੱਡਾ ਝਟਕਾ, ਗੁਰਪਤਵੰਤ ਸਿੰਘ ਪੰਨੂੰ ਦੀ ਅਰਜ਼ੀ ’ਤੇ ਸੁਣਵਾਈ ਜਾਰੀ

ਲੰਡਨ – ਬਰਤਾਨਵੀ ਸਿਆਸੀ ਵਾਤਾਵਰਨ ਵਿੱਚ ਇੱਕ ਹੋਰ ਗੂੰਜਦਾਰ ਮਾਮਲਾ ਸਾਹਮਣੇ ਆਇਆ ਜਿੱਥੇ ਬ੍ਰਿਟੇਨ ਦੇ ਟੋਰੀ ਪੀਅਰ ਲਾਰਡ ਰਮਿੰਦਰ ਸਿੰਘ ਰੇਂਜਰ ਵਿਰੁੱਧ ਸਿੱਖਸ ਫਾਰ ਜਸਟਿਸ ਯੂ.ਕੇ. ਅਤੇ ਅਮਰੀਕਾ ਅਧਾਰਤ ਖਾਲਿਸਤਾਨ ਆਗੂ ਗੁਰਪਤਵੰਤ ਸਿੰਘ ਪੰਨੂੰ ਵੱਲੋਂ ਬਦਨਾਮੀ ਦਾ ਮੁਕੱਦਮਾ ਦਾਇਰ ਕੀਤਾ ਗਿਆ ਸੀ। ਹੁਣ ਲੰਡਨ ਹਾਈ ਕੋਰਟ ਨੇ ਸਿੱਖਸ ਫਾਰ ਜਸਟਿਸ ਦੀ ਯੂ.ਕੇ. ਸ਼ਾਖਾ ਵੱਲੋਂ ਕੀਤੀ ਅਰਜ਼ੀ ਰੱਦ ਕਰ ਦਿੱਤੀ ਹੈ ਪਰ ਗੁਰਪਤਵੰਤ ਸਿੰਘ ਪੰਨੂੰ ਦੀ ਵਿਅਕਤੀਗਤ ਅਰਜ਼ੀ ‘ਤੇ ਕਾਰਵਾਈ ਅਜੇ ਵੀ ਜਾਰੀ ਰਹੇਗੀ।

ਮਾਮਲਾ ਨਵੰਬਰ 2021 ਵਿੱਚ ਸ਼ੁਰੂ ਹੋਇਆ ਸੀ, ਜਦੋਂ ਲਾਰਡ ਰੇਂਜਰ ਨੇ ਦੀ ਪਾਕਿਸਤਾਨ ਡੇਲੀ ਨਾਲ ਗੱਲਬਾਤ ਦੌਰਾਨ ਕਿਹਾ ਸੀ ਕਿ “ਪੰਨੂੰ ਸਿੱਖੀ ਦੀ ਪਾਲਣਾ ਨਹੀਂ ਕਰਦਾ” ਅਤੇ ਉਹ ਅਤੇ SFJ ਲੋਕਾਂ ਨੂੰ ਪੰਜਾਬ ਵਿੱਚ ਸਿੱਖਾਂ ਦੀ ਹਾਲਤ ਬਾਰੇ “ਗੁੰਮਰਾਹ ਕਰ ਰਹੇ ਹਨ”। ਇਸ ਤੋਂ ਇਲਾਵਾ, 1 ਫਰਵਰੀ 2022 ਨੂੰ ਕੀਤੀ ਟਵੀਟ ਵਿੱਚ ਵੀ ਲਾਰਡ ਰੇਂਜਰ ਨੇ ਪੰਨੂੰ ਨੂੰ “ਖੁਦਗਰਜ਼ ਇਨਸਾਨ” ਦੱਸਿਆ ਜੋ “ਭਾਰਤ ਦੇ ਦੁਸ਼ਮਣਾਂ” ਵੱਲੋਂ ਫੰਡ ਲੈਂਦਾ ਹੈ ਦਿਸ ਦਾ ਇਸ਼ਾਰਾ ਪਾਕਿਸਤਾਨ ਵੱਲ ਸੀ।

SFJ ਅਤੇ ਪੰਨੂੰ ਨੇ ਦਲੀਲ ਦਿੱਤੀ ਕਿ ਇਹ ਟਿੱਪਣੀਆਂ ਉਨ੍ਹਾਂ ਦੀ ਇਮਾਨਦਾਰੀ, ਵਿਦੇਸ਼ੀ ਦਾਨਦਾਤਾਵਾਂ ਤੇ ਅੰਦੋਲਨ ਦੀ ਨਿੱਜਤਾ ‘ਤੇ ਸਵਾਲ ਉਠਾਉਂਦੀਆਂ ਹਨ। ਵਕੀਲ ਡੇਵਿਡ ਲੇਮਰ ਨੇ ਅਦਾਲਤ ਵਿੱਚ ਕਿਹਾ ਕਿ ਇਹ ਲੇਖ ਪੜ੍ਹਨ ਵਾਲਿਆਂ ਨੂੰ ਇਹ ਸਮਝ ਆ ਸਕਦੀ ਸੀ ਕਿ ਯੂਕੇ ਦੀ ਸਿੱਖਸ ਫਾਰ ਜਸਟਿਸ ਸ਼ਾਖਾ ਵੀ ਕਿਸੇ ਤਰ੍ਹਾਂ ਭਾਰਤ ਵੱਲੋਂ ਅੱਤਵਾਦੀ ਐਲਾਨ ਕੀਤੀ ਸੰਸਥਾ ਹੈ ਪਰ ਜਸਟਿਸ ਜੇ (Justice Jay) ਨੇ ਸਿੱਖਸ ਫਾਰ ਜਸਟਿਸ ਦੀ ਯੂ.ਕੇ. ਸ਼ਾਖਾ ਦੀ ਅਰਜ਼ੀ ਰੱਦ ਕਰਦਿਆਂ ਕਿਹਾ ਮੈਂ ਇਹ ਨਹੀਂ ਮੰਨ ਸਕਦਾ ਕਿ ਲੇਖ ਵਿੱਚ ਕਿਤੇ ਵੀ ਯੂ.ਕੇ. ਵਾਲੀ ਸਿੱਖਸ ਫਾਰ ਜਸਟਿਸ ਦੀ ਗੱਲ ਕੀਤੀ ਗਈ ਹੈ। ਲੇਖ ਦੀ ਭਾਸ਼ਾ ਅਤੇ ਸੰਦਰਭ ਸਿਰਫ਼ ਅਮਰੀਕਾ ਅਧਾਰਤ ਸਿੱਖਸ ਫਾਰ ਜਸਟਿਸ ਤੇ ਲਾਗੂ ਹੁੰਦੇ ਹਨ। ਲਾਰਡ ਰੇਂਜਰ ਦੇ ਵਕੀਲ ਵਿਲੀਅਮ ਬੈਨੇਟ ਕੇ.ਸੀ. ਨੇ ਵੀ ਆਪਣੇ ਦਲੀਲਾਂ ਵਿੱਚ ਕਿਹਾ ਕਿ ਲੇਖ ਵਿੱਚ ਕਿਸੇ ਵੀ ਗੁੱਪਤ ਸਾਜ਼ਿਸ਼ ਜਾਂ ਪਾਕਿਸਤਾਨ ਵੱਲੋਂ ਫੰਡ ਮਿਲਣ ਦੀ ਝੂਠੀ ਗੱਲ ਨਹੀਂ ਕੀਤੀ ਗਈ। ਪੰਨੂੰ ਦੀ ਵਿਅਕਤੀਗਤ ਸ਼ਿਕਾਇਤ ’ਤੇ ਅਗਲੀ ਸੁਣਵਾਈ ਹਾਲੇ ਹੋਣੀ ਬਾਕੀ ਹੈ, ਜਿਸ ਵਿੱਚ ਲਾਰਡ ਰੇਂਜਰ ਵੱਲੋਂ ਕੀਤੀਆਂ ਟਿੱਪਣੀਆਂ ਦੀ ਕਾਨੂੰਨੀ ਜਾਂਚ ਹੋਵੇਗੀ।