ਗਲਾਸਗੋ ''ਚ ਬੇਘਰ ਲੋਕਾਂ ਦੀਆਂ ਮੌਤਾਂ ''ਚ ਹੋਇਆ ਵਾਧਾ

ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ)- ਸਕਾਟਲੈਂਡ ਦੇ ਸ਼ਹਿਰ ਗਲਾਸਗੋ ਵਿਚ ਬੇਘਰ ਲੋਕਾਂ ਦੀਆਂ ਹੋਣ ਵਾਲੀਆਂ ਮੌਤਾਂ ਵਿਚ ਭਾਰੀ ਵਾਧਾ ਹੋਇਆ ਹੈ। ਗਲਾਸਗੋ ਵਿਚ ਬੇਘਰ ਹੋਣ ਵਾਲੀਆਂ ਮੌਤਾਂ ਵਿਚ ਇਕ ਸਾਲ ਵਿਚ 84% ਦਾ ਵਾਧਾ ਹੋਇਆ ਹੈ। ਅੰਕੜੇ ਦੱਸਦੇ ਹਨ ਕਿ ਸ਼ਹਿਰ ਵਿਚ ਇਨ੍ਹਾਂ ਲੋਕਾਂ ਦੀ ਮੌਤ ਦੀ ਗਿਣਤੀ 2020 ਵਿਚ 33 ਤੋਂ ਵੱਧ ਕੇ 2021 ਵਿਚ 80 ਹੋ ਗਈ।

ਇਕ ਰਿਪੋਰਟ ਮੁਤਾਬਕ ਇਹ ਅੰਕੜੇ ਮਿਊਜ਼ੀਅਮ ਆਫ ਹੋਮਲੈੱਸਨੈੱਸ (MoH) ਚੈਰਿਟੀ ਤੋਂ ਆਏ ਹਨ। ਰਿਪੋਰਟ ਵਿਚ ਪਾਇਆ ਗਿਆ ਕਿ ਯੂਕੇ ਵਿਚ 2021 ਵਿਚ 1286 ਬੇਘਰ ਲੋਕਾਂ ਦੀ ਮੌਤ ਹੋਈ, ਜਦੋਂ ਕਿ 2019 ਵਿਚ 710 ਲੋਕਾਂ ਦੀ ਮੌਤ ਹੋਈ ਸੀ ਜੋ ਕਿ 81 ਪ੍ਰਤੀਸ਼ਤ ਵਾਧਾ ਹੈ। ਸਕਾਟਿਸ਼ ਕਿਰਾਏਦਾਰ ਐਸੋਸੀਏਸ਼ਨ ਦੇ ਸੀਨ ਕਲਰਕਿਨ ਅਨੁਸਾਰ ਬਹੁਤ ਸਾਰੇ ਬੇਘਰੇ ਲੋਕ ਅਸੁਰੱਖਿਅਤ ਅਤੇ ਅਣਉਚਿਤ ਰਿਹਾਇਸ਼ ਵਿਚ ਮਰ ਗਏ ਅਤੇ ਸ਼ਰਾਬ ਅਤੇ ਨਸ਼ੇ ਦੀ ਆਦਤ ਦੇ ਨਾਲ-ਨਾਲ ਮਾਨਸਿਕ ਸਿਹਤ ਸਮੱਸਿਆਵਾਂ ਲਈ ਸਹਾਇਤਾ ਪ੍ਰਾਪਤ ਕਰਨ ਵਿਚ ਅਸਫ਼ਲ ਰਹੇ। ਸਕਾਟਲੈਂਡ ਵਿਚ ਕਮਜ਼ੋਰ ਅਤੇ ਬੇਘਰ ਲੋਕਾਂ ਦੇ ਮੁੜ-ਵਸੇਬੇ ਲਈ ਤੇਜ਼ੀ ਨਾਲ ਰਿਹਾਇਸ਼ੀ ਤਬਦੀਲੀ ਦੀਆਂ ਯੋਜਨਾਵਾਂ, ਸਟਾਫ਼ ਦੀ ਘਾਟ, ਘੱਟ ਤਨਖਾਹ ਅਤੇ ਅਸਥਾਈ ਕਾਰਨ ਅੜਿੱਕਾ ਬਣ ਰਹੇ ਹਨ।