UN ਦੇ ਜਲਵਾਯੂ ਸੰਮੇਲਨ ''ਚ ਲੱਗੀ ਭਿਆਨਕ ਅੱਗ! ਜਾਨ ਬਚਾ ਕੇ ਭੱਜੇ ਡੈਲੀਗੇਟਜ਼ (Video)

ਬੇਲੇਮ : ਬ੍ਰਾਜ਼ੀਲ ਦੇ ਬੇਲੇਮ ਸ਼ਹਿਰ 'ਚ ਚੱਲ ਰਹੇ ਸੰਯੁਕਤ ਰਾਸ਼ਟਰ ਦੇ ਸੀਓਪੀ30 ਜਲਵਾਯੂ ਸੰਮੇਲਨ (UN COP30 climate summit) ਦੇ ਮੁੱਖ ਆਯੋਜਨ ਸਥਾਨ 'ਤੇ ਵੀਰਵਾਰ ਦੁਪਹਿਰ ਨੂੰ ਅੱਗ ਲੱਗਣ ਕਾਰਨ ਹਜ਼ਾਰਾਂ ਲੋਕਾਂ ਨੂੰ ਭੱਜਣਾ ਪਿਆ। ਅੱਗ ਲੱਗਣ ਦੀ ਇਸ ਵੱਡੀ ਘਟਨਾ ਨੇ ਜਲਵਾਯੂ ਪਰਿਵਰਤਨ ਨੂੰ ਰੋਕਣ ਲਈ ਚੱਲ ਰਹੇ ਇਸ ਸਾਲਾਨਾ ਆਲਮੀ ਪ੍ਰੋਗਰਾਮ 'ਚ ਹਲਚਲ ਪੈਦਾ ਕਰ ਦਿੱਤੀ ਹੈ।

ਬਲੂ ਜ਼ੋਨ 'ਚ ਲੱਗੀ ਅੱਗ
ਅੱਗ ਸਥਾਨਕ ਸਮੇਂ ਅਨੁਸਾਰ ਦੁਪਹਿਰ ਕਰੀਬ 2 ਵਜੇ 'ਬਲੂ ਜ਼ੋਨ' 'ਚ ਲੱਗੀ। ਬਲੂ ਜ਼ੋਨ ਉਹ ਪ੍ਰਮੁੱਖ ਖੇਤਰ ਹੈ ਜਿੱਥੇ ਸੰਮੇਲਨ ਦੀਆਂ ਸਾਰੀਆਂ ਮੀਟਿੰਗਾਂ, ਵਾਰਤਾਵਾਂ (negotiations), ਦੇਸ਼-ਵਾਰ ਪਵੇਲੀਅਨ, ਮੀਡੀਆ ਸੈਂਟਰ ਅਤੇ ਸਾਰੇ ਉੱਚ-ਪੱਧਰੀ ਪ੍ਰਤੀਨਿਧੀਆਂ ਦੇ ਦਫ਼ਤਰ ਸਥਿਤ ਹਨ। ਅੱਗ ਲੱਗਣ ਦੀ ਖ਼ਬਰ ਫੈਲਦੇ ਹੀ, ਜਲਵਾਯੂ ਪਰਿਵਰਤਨ ਸੰਯੁਕਤ ਰਾਸ਼ਟਰ ਫਰੇਮਵਰਕ ਕਨਵੈਨਸ਼ਨ (UNFCCC) ਸਕੱਤਰੇਤ ਨੇ ਤੁਰੰਤ ਸਾਰੇ ਲੋਕਾਂ ਨੂੰ ਪ੍ਰੋਗਰਾਮ ਸਥਾਨ ਖਾਲੀ ਕਰਨ ਦੀ ਅਪੀਲ ਕੀਤੀ।

Fire breaks out at main venue of #UNCOP30 Climate Summit in #Brazil 's Belem, 21 people injured

At least 21 people were injured in a fire which broke out at the main venue of the ongoing UN COP30 Climate Summit in Brazil's Belem,forcing thousands of people to run for safety. pic.twitter.com/tGJbDWnwPP

— Smriti Sharma (@SmritiSharma_) November 21, 2025

UN ਸਕੱਤਰ-ਜਨਰਲ ਤੇ ਭਾਰਤੀ ਮੰਤਰੀ ਸੁਰੱਖਿਅਤ
ਘਟਨਾ ਦੇ ਸਮੇਂ ਕਈ ਉੱਚ ਪੱਧਰੀ ਡੈਲੀਗੇਟਸ ਮੌਜੂਦ ਸਨ। ਸੰਯੁਕਤ ਰਾਸ਼ਟਰ ਦੇ ਸਕੱਤਰ-ਜਨਰਲ ਐਂਟੋਨੀਓ ਗੁਟੇਰੇਸ ਵੀ ਪ੍ਰੋਗਰਾਮ ਸਥਾਨ 'ਤੇ ਮੌਜੂਦ ਸਨ, ਜਿਨ੍ਹਾਂ ਨੂੰ ਸੰਯੁਕਤ ਰਾਸ਼ਟਰ ਸੁਰੱਖਿਆ ਵਿਭਾਗ (UNDSS) ਦੇ ਸੁਰੱਖਿਆ ਦਲ ਨੇ ਤੁਰੰਤ ਬਾਹਰ ਕੱਢ ਲਿਆ। ਭਾਰਤ ਦੇ ਵਾਤਾਵਰਣ ਮੰਤਰੀ ਭੂਪੇਂਦਰ ਯਾਦਵ ਵੀ ਉਸ ਸਮੇਂ ਬਲੂ ਜ਼ੋਨ ਵਿੱਚ ਭਾਰਤੀ ਪ੍ਰਤੀਨਿਧੀ ਮੰਡਲ ਦੇ ਨਾਲ ਸਨ। ਮੰਤਰਾਲੇ ਦੇ ਬੁਲਾਰੇ ਨੇ ਪੁਸ਼ਟੀ ਕੀਤੀ ਕਿ ਉਹ ਅਤੇ ਹੋਰ ਅਧਿਕਾਰੀ ਸੁਰੱਖਿਅਤ ਢੰਗ ਨਾਲ ਬਾਹਰ ਨਿਕਲ ਗਏ।

13 ਲੋਕਾਂ ਦਾ ਮੌਕੇ 'ਤੇ ਇਲਾਜ
ਸ਼ਿਖਰ ਸੰਮੇਲਨ ਦੇ ਪ੍ਰੈਜ਼ੀਡੈਂਸੀ ਅਤੇ ਯੂ.ਐੱਨ.ਐੱਫ.ਸੀ.ਸੀ.ਸੀ. ਵੱਲੋਂ ਇੱਕ ਸਾਂਝੇ ਬਿਆਨ ਵਿੱਚ ਕਿਹਾ ਗਿਆ ਕਿ ਧੂੰਏਂ ਕਾਰਨ 13 ਲੋਕਾਂ ਦਾ ਮੌਕੇ 'ਤੇ ਹੀ ਇਲਾਜ ਕੀਤਾ ਗਿਆ। ਉਨ੍ਹਾਂ ਦੀ ਹਾਲਤ 'ਤੇ ਨਜ਼ਰ ਰੱਖੀ ਜਾ ਰਹੀ ਹੈ। ਸੁਰੱਖਿਆ ਅਧਿਕਾਰੀਆਂ ਨੇ ਦੱਸਿਆ ਕਿ ਘਟਨਾ ਦੌਰਾਨ ਇਲਾਕੇ ਤੋਂ ਬਾਹਰ ਨਿਕਲਣ ਵਾਲੇ ਲੋਕਾਂ 'ਚ ਕੁਝ ਅਫਰਾ-ਤਫਰੀ ਮਚ ਗਈ ਸੀ। ਅੱਗ ਲੱਗਣ ਦੇ ਕੁਝ ਹੀ ਮਿੰਟਾਂ ਬਾਅਦ, ਇਲਾਕੇ 'ਚ ਭਾਰੀ ਬਾਰਿਸ਼ ਹੋ ਗਈ, ਜਿਸ ਨਾਲ ਆਯੋਜਨ ਸਥਾਨ ਤੋਂ ਬਾਹਰ ਖੁੱਲ੍ਹੇ ਵਿੱਚ ਆਏ ਹਜ਼ਾਰਾਂ ਹਾਜ਼ਰੀਨ ਲਈ ਮੁਸ਼ਕਲ ਸਥਿਤੀ ਪੈਦਾ ਹੋ ਗਈ।

ਅੱਗ 'ਤੇ ਛੇ ਮਿੰਟਾਂ 'ਚ ਕਾਬੂ
ਸੰਯੁਕਤ ਬਿਆਨ ਅਨੁਸਾਰ, ਫਾਇਰ ਬ੍ਰਿਗੇਡ ਤੇ ਸੰਯੁਕਤ ਰਾਸ਼ਟਰ ਦੇ ਸੁਰੱਖਿਆ ਅਧਿਕਾਰੀਆਂ ਨੇ ਤੁਰੰਤ ਪ੍ਰਤੀਕਿਰਿਆ ਦਿੱਤੀ ਤੇ ਲਗਭਗ ਛੇ ਮਿੰਟਾਂ 'ਚ ਅੱਗ 'ਤੇ ਕਾਬੂ ਪਾ ਲਿਆ ਗਿਆ। ਅੱਗ ਨਾਲ 'ਗ੍ਰੀਨ ਜ਼ੋਨ' (ਜਿੱਥੇ ਸਟਾਲ ਅਤੇ ਪ੍ਰਦਰਸ਼ਨੀਆਂ ਲੱਗਦੀਆਂ ਹਨ) ਪ੍ਰਭਾਵਿਤ ਨਹੀਂ ਹੋਇਆ ਹੈ। ਹਾਲਾਂਕਿ, ਮੇਜ਼ਬਾਨ ਦੇਸ਼ ਦੇ ਫਾਇਰ ਬ੍ਰਿਗੇਡ ਮੁਖੀ ਨੇ ਪੂਰੇ ਕੰਪਲੈਕਸ ਨੂੰ ਖਾਲੀ ਕਰਨ ਦਾ ਆਦੇਸ਼ ਦਿੱਤਾ ਹੈ। ਪ੍ਰਤੀਨਿਧੀਆਂ ਨੂੰ ਸੂਚਿਤ ਕੀਤਾ ਗਿਆ ਹੈ ਕਿ ਆਯੋਜਨ ਸਥਾਨ ਰਾਤ 8 ਵਜੇ ਤੋਂ ਪਹਿਲਾਂ ਦੁਬਾਰਾ ਨਹੀਂ ਖੁੱਲ੍ਹੇਗਾ। ਪ੍ਰਭਾਵਿਤ ਖੇਤਰ ਇਸ ਸਮੇਂ ਬੰਦ ਹੈ ਅਤੇ ਜਾਂਚ ਜਾਰੀ ਹੈ। ਸੀਓਪੀ30 ਸੰਮੇਲਨ 10 ਤੋਂ 21 ਨਵੰਬਰ ਤੱਕ ਚੱਲਣਾ ਸੀ।